فۋتبولشىنىڭ جاراقات العانىن پيسسا جەپ تويلايدى

استانا. قازاقپارات - فۋتبولدان ازۋلى ارگەنتينا قۇراما كومانداسىنىڭ شابۋىلشىسى گونسالو يگۋاين جاقىندا يتالياداعى نەاپول قالاسىنىڭ «ناپولي» كومانداسىنان تۋريننىڭ «يۋۆەنتۋسىنا» وتكەن بولاتىن.

«يۋۆەنتۋس» باسشىلىعى ونى ساتىپ الۋ ءۇشىن 90 ميلليون ەۋرو جۇمسادى. بۇل حابار نەاپول فۋتبول سۇيەر قاۋىمىن قاتتى قاپالاندىردى. سەبەبى، وسى ماۋسىمدا 36 گول سوعىپ، يتاليا چەمپيوناتىنىڭ ۇزدىك سۇرمەرگەنى اتانعان ارگەنتينالىق جەرگىلىكتى «ناپولي» كومانداسىن «سكۋدەتتونىڭ» ەكىنشى ورنىنا ءبىر-اق شىعارعان بولاتىن. ودان بولەك، يگۋاين «ناپولي» ساپىندا 2013/2014-فۋتبول ماۋسىمىندا يتاليا كۋبوگى مەن سۋپەركۋبوگىنا قول جەتكىزگەن.

وسىلايشا، «ناپولي» كومانداسىن وگىزدەي ورگە سۇيرەپ، جەرگىلىكتى جۇرتتىڭ قاھارمانى اتانعان ايگىلى فۋتبولشى تۋريننىڭ «يۋۆەنتۋسىنا» اۋىسىپ، ءبىر-اق ساتتە «حالىق جاۋىنا» اينالىپ كەتتى. كۇنى كەشە گونسالونى ءپىر تۇتىپ جۇرگەن فاناتتار بۇگىندە ونى ساتقىن دەپ اتاپ، فۋتبولشىنىڭ جەيدەلەرىن ورتەۋگە دەيىن باردى. ءتىپتى، نەاپولداعى مەيرامحانالاردىڭ ءبىرى جەرگىلىكتى حالىقتىڭ اشۋىن تۋدىرعان بۇل ماسەلەگە بايلانىستى ەرەكشە ۇسىنىس جاساماقشى.

ناقتىراق ايتساق، نەاپول قالاسىنداعى Show Pizza مەيرامحاناسى قالا تۇرعىندارى مەن قوناقتارىنا ارناپ ەرەكشە ۇسىنىس دايىنداپ جاتىر. BBC اگەنتتىگىنىڭ مالىمەتىنە سايكەس، گونسالو يگۋاين «يۋۆەنتۋس» ساپىندا ويناپ ءجۇرىپ جاراقات العان كۇندەرى مەكەمە «مارگاريتا» پيسساسىن قوماقتى جەڭىلدىكپەن ۇسىنادى. وسىلايشا، ارگەنتينالىقتىڭ العان ءاربىر جاراقاتى رەستوران قوناقتارىنا پيسسانى بار بولعانى 1 ەۋروعا ساتىپ الۋعا مۇمكىندىك بەرەدى. ەندى فۋتبولشىنىڭ جەرگىلىكتى كوماندادان كەتكەنىنە كوڭىلى تولماعان جۇرت ونىڭ جاراقات العانىن پيسسا جەپ تويلايتىن كورىنەدى.

ايدار ورىسبايەۆ،

«ەگەمەن قازاقستان»