وسكەمەنگە توپتىق ۆيزامەن قىتايدىڭ العاشقى تۋريستەرى كەلدى

بۇل - ق ر ينۆەستيتسيالار جانە دامۋ مينيسترلىگى مەن ق ح ر تۋريزم ىستەرى بويىنشا مەملەكەتتىك باسقارماسى اراسىندا جاسالعان قىتاي ازاماتتارىنىڭ قازاقستانعا توپتىق تۋريستىك ساپارلارىن وڭايلاتۋ كەلىسىمىنەن كەيىن كەلگەن قىتاي تۋريستەرىنىڭ العاشقى توبى.
وڭايلاتىلعان توپتىق ۆيزامەن ۇشىپ كەلگەن قىتايلىق تۋريستەردى سالتاناتپەن قارسى الدى. اسپاناستى ەلىنىڭ تۇرعىندارى ءۇشىن ۇلكەن مادەني باعدارلاما جاسالعان. وبلىس اۋماعىندا وتكىزەتىن ءۇش كۇن ىشىندە قوناقتار ات ۇيرەتەتىن ورىنعا، مۋزەيلەرگە بارىپ، قازاقتىڭ ءداستۇرلى تۇرمىسىمەن تانىس بولادى جانە كالليگرافيا بويىنشا شەبەرلىك ساعاتتارىنا قاتىسادى. العاشقى قىتايلىق تۋريستەر ءۇشىن «تيتان» اسىل تۇقىمدى جىلقى زاۋىتىنا، سول جاعالاۋ مۋزەي- قورىعىنا، «باگراتيون» شارۋاشىلىق قوجالىعىنا ەكسكۋرسيا جاسالادى.
العاشقى تۋريستىك ساپاردى شىعىس قازاقستاندىق «پرەمەر- تۋر» تۋريستىك وپەراتورى ۇيىمداستىردى.
بۇگىن تاڭەرتەڭ قىتايلىق تۋريستەر ۆيننوە اۋىلىنداعى جابىق ات سپورتى ورنىنا باردى. قوناقتار اسىل تۇقىمدى جىلقى تۇرلەرىمەن: ورلوۆ جەلىستى جىلقىسى، اعىلشىن سالت اتى، ارابتىڭ تازا قاندى جىلقىلارىمەن تانىس بولدى، ولاردىڭ اراسىندا حالىقارالىق جارىستاردىڭ جۇلدەگەرلەرى بار. قىتايلىق كورەرمەندەرگە ۇلتتىق سالت- ءداستۇرىمىز كورىنىس تاپقان «عاسىرلار بويى ات ۇستىندە» تاريحي سپەكتاكلى قويىلدى.
كۇننىڭ ەكىنشى بولىگىن قىتايلىق تۋريستەر توبى شىعىس قازاقستان وبلىستىق تاريحي- ولكەنتانۋ مۋزەيىندە وتكىزەدى. وندا تۋريستەردى كالليگرافيا ساباقتارى، جاس جاۋىنگەر كۋرسى جانە مايدان اندەرىنىڭ كاراوكەسى قارسى الماق.
تۋريزم باسقارماسىنىڭ حابارلاۋىنشا، مۇنداي ساپارلار ايماقتىق تۋريزمنىڭ دامۋىنا جانە شىعىس قازاقستاننىڭ كورىكتى جەرلەرىنىڭ قىتاي تۋريستەرىنىڭ نازارىنا ىلىگۋىنە سەپتىگىن تيگىزەدى.