ۆاسيلي لەۆيت قىتايلىق بوكسشىنى وڭدىرماي سابادى

91 كەلى سالماقتا ەل نامىسىن قورعاپ جاتقان قازاق بوكسشىسى ۆاسيلي ليەۆيت قىتايلىق قارسىلاسى يۋي فەنكايدى تەحنيكالىق نوكاۋتپەن ەكىنشى راۋندتا جارىس جولىنان تايدىردى.
وسىعان دەيىن ءبىرجان جاقىپوۆ پەن جانىبەك ءالىمحان ۇلى ەل سەنىمىن اقتاپ، العاشقى كەزدەسۋلەرىن ءساتتى باستادى. وكىنىشكە قاراي وليمپيادانىڭ العاشقى كۇنى بەرىك ءابدىراحمانوۆ ا ق ش بوكسشىسىنان ۇتىلىپ قالعان ەدى.
ەستەرىڭىزگە سالا كەتەيىك، وسىعان دەيىن قازاق بوكسشىلارىنىڭ وليمپيادا ويىندارىنا بارۋعا ۇستاتپاي جۇرگەن 91 كەلى سالماق دارەجەسىندەگى جولدامانى بيىل وتانداسىمىز ۆاسيلي ليەۆيت قانجىعاسىنا بايلاپ، تاۋەلسىز قازاق ەلى اتىنان وسى سالماقتا تۇڭعىش رەت وليمپيادا ويىندارىندا ونەر كورسەتۋ قۇقىعىنا يە بولدى.
مىنە، العاشقى جەكپە- جەگىن وتە تاماشا ناتيجەمەن اياقتادى.
91 كەلى سالماقتا قازاقستان بوكسشىلارى وليمپياداعا بارماعانىن ەسكەرسەك، ۆاسيلي ليەۆيتتىڭ جولداماسى ءبىز ءۇشىن وتە قۇندى. قازاقستان تاۋەلسىزدىك العالى بەرى 91 كەلىدەگى بوكسشىلارىمىز وليمپ شىڭىن باعىندىرۋعا قانشا تالپىنسا دا، ءتورتجىلدىقتىڭ باستى دوداسىنا جولدارى تۇسپەپ ەدى.
ۆاسيلي ليەۆيتتىڭ لوندون وليمپياداسىنا بارۋعا مۇمكىندىگى بولعان. الايدا، «قىرسىق ءبىر اينالدىرسا، شىر اينالدىرادى» دەگەندەي ليەۆيت استانادا وتكەن ىرىكتەۋ تۋرنيرىندە جەڭىلىس تاۋىپ، وليمپياداعا باراتىنداردىڭ قاتارىنا كىرە المادى. ەندى، مىنە، ۆاسيا وسىدان ءتورت جىل بۇرىن جىبەرگەن قاتەلىگىن تۇزەپ، قازاقستان بوكسشىلارى اراسىنان ەكىنشى بولىپ، وليمپيادا ويىندارىنا جولداما الدى.
ۆاسيلي ليەۆيت بۇكىلالەمدىك بوكس سەرياسىنىڭ «استانا ارلارندارى» قۇرامىندا ونەر كورسەتىپ، «ارگەنتينا كوندورسپەن» بولعان كەزدەسۋدە قارسىلاسىن تەحنيكالىق نوكاۋتپەن ۇتتى. سونىڭ ناتيجەسىندە ول WSB- ءدىڭ جەكە رەيتينگتىك كورسەتكىشى بويىنشا تۇراقتى ماۋسىمدا ءبىرىنشى ورىن الدى. ءسويتىپ، ريو- دە- جانەيرو وليمپياداسىنا بەرىلەر جولدامانى يەمدەندى.
ۆاسيليي ليەۆيت
تۋعان كۇنى/جىلى: 24.02.1988
تۋعان جەرى: قوستاناي وبلىسى
سالماعى: 91 كەلى
جەتىستىكتەرى:
2009، 2011 -جىلدارى قازاقستان چەمپيونى؛
2009 -جىلى ازيا چەمپيونى؛
بىرنەشە حالىقارالىق تۋرنيرلەردىڭ جەڭىمپازى؛
WSB جوباسى اياسىندا ءوز سالماعى بويىنشا كوش باستاپ، وليمپيادا-2016 جولداماسىنا يەلىك ەتتى.
ەندى ۆاسيلي ليەۆيت ءوزى تۇڭعىش قاتىسىپ جاتقان وليمپياداسىندا قازاقتىڭ تۋىن جەلبىرەتىپ، ءان ۇرانىن اسقاقتاتىپ قايتادى دەگەن ۇمىتتەمىز.
اۆتور: كۇنسۇلتان وتارباي