16:31, 08 - تامىز 2016 | GMT +5
وليمپيادا ويىندارىنىڭ جۇلدەگەرى اتانعان تايلاند سپورتشىسىنىڭ اجەسى جارىستى تاماشالاپ وتىرعان كەزدە باقيلىق بولدى
استانا. قازاقپارات - 56 كەلى سالماق دارەجەسىندە ريو- دە- جانەيروداعى وليمپيادا ويىندارىنىڭ قولا جۇلدەگەرى اتانعان تايلاند اۋىر اتلەتى سينپحەتا كرۋايتونگتىڭ اجەسى نەمەرەسى قاتىسقان جارىستى تاماشالاپ وتىرعان كەزدە باقيلىق بولدى.

بۇل تۋرالى The Phuket News حابارلادى.
زىلتەمىرشىنىڭ اتا-اناسىنىڭ ۇيىندە كرۋايتونگتىڭ تۋىستارى مەن دوستارى سپورتشىعا جانكۇيەر بولۋ ءۇشىن جيىلعان، دەپ جازدى lenta.ru.
تەلەترانسلياتسيانى تاماشالاۋ كەزىندە 82 جاستاعى سۋبين كحونگتحاپتىڭ دەنساۋلىعى سىر بەرگەن. كەيۋانانى اۋرۋحاناعا جەتكىزدى، وندا دارىگەرلەر قارتتىڭ كوز جۇمعانىن ايتتى. الدىن الا مالىمەتتەرگە قاراعاندا، وعان ينسۋلت سەبەپ بولعان. كحونگتحاپ تۋىستارى ونىڭ نەمەرەسىنىڭ مەدالعا قول جەتكىزگەنىن كورىپ ۇلگەرمەگەنىن حابارلادى.
جارىس جەكسەنبى كۇنى، 7 -تامىزدا ءوتتى. قىتايلىق لۋن سينسيۋان وليمپيادا چەمپيونى اتاندى، كۇمىس جۇلدەگە سولتۇستىك كورەيا ەلىنىڭ وكىلى وم يۋن چحول يە بولدى.