ق ر مادەنيەت جانە سپورت ءمينيسترى ەلدوس سمەتوۆ پەن گالبادراح وتگونسەتسەگتى قۇتتىقتادى

 ريو- دە- جانەيرو. قازاقپارات - ق ر مادەنيەت جانە سپورت ءمينيسترى ارىستانبەك مۇحامەدي ۇلى ەلدوس سمەتوۆ پەن گالبادراح وتگونسەتسەگتى ريو وليمپياداسىنداعى جەڭىستەرىمەن قۇتىقتادى.

 بۇل تۋرالى ريوداعى قازاقپارات ءتىلشىسى حابارلادى.

ريو وليمپياداسىنىڭ العاشقى كۇنى قازاقستان قورجىنىنا ءبىر قولا، ءبىر كۇمىس مەدال ءتۇستى. ونىڭ العاشقىسىن دزيۋدودان 48 كەلىدە ونەر كورسەتكەن ارۋىمىز گالبادراح وتگونسەتسەگ جەڭىپ السا، ەكىنشى كۇمىس مەدالدى ەرلەر اراسىندا 60 كەلىدە ەل نامىسىن قورعاعان دزيۋدشىمىز ەلدوس سمەتوۆ قانجىعاسىنا بايلادى.

 وسى جەڭىستەردەن كەيىن ق ر مادەنيەت جانە سپورت ءمينيسترى ارىستانبەك مۇحامەدي ۇلى ەكى جۇلدەگەرىمىزدى ارنايى قۇتتىقتادى.

قۇتتىقتاۋ بارىسىندا ول وليمپيادانىڭ ءبىرىنشى كۇنى جەڭىپ العان ەكى مەدالدى ۇلكەن جەتىستىك دەپ باعالادى.

«ءبىزدىڭ سپورتشىلارىمىز وليمپيادانىڭ ءبىرىنشى كۇنى ەكى مەدال جەڭىپ الدى. بۇل - ۇلكەن جەتىستىك. وسىدان- اق، قازاقستان سپورتشىلارىنىڭ وليمپياداعا ۇلكەن دايىندىقپەن كەلگەنىن بايقاۋعا بولادى. ەلدوستىڭ فينالعا دەيىن جەتۋى بىزگە ۇلكەن قۋانىش سىيلادى. بۇل - قازاق ەلىنىڭ قۋانىشى. وسىنداي جارقىن جەڭىستەرىڭمەن ءبىزدى قۋانتقان سىزدەردى شىن جۇرەگىممەن قۇتتىقتايمىن»، - دەپ اتاپ ءوتتى مينيستر.

 ەستەرىڭىزگە سالا كەتەيىك، قازاقستاننان ريو وليمپياداسىنا بوكستان 12 سپورتشى (ون جىگىت پەن ەكى قىز)، ەركىن كۇرەستەن - 5، گرەك- ريم كۇرەسىنەن - 3، ايەلدەر كۇرەسىنەن - 4، تاس جولداعى ۆەلوجارىستان - 2، ۆەلوترەكتەن - 1، كوركەم گيمناستيكادان - 1، اكروباتيكادان - 1، قايىقتا ەسكەك ەسۋدەن - 2، بايداركا جانە كانوەدەن - 11، كەدەرگىلەر ارقىلى ەسكەك ەسۋدەن -1، دزيۋدودان - 6، جەڭىل اتلەتيكادان - 26، سۋعا جۇزۋدەن - 3، مانەرلەپ جۇزۋدەن - 2، بەسسايىستان -2، ساداق اتۋدان - 2، نىسانا كوزدەۋدەن - 5، تايەكۆوندودان - 3، تەننيستەن - 2، ۇستەل تەننيسىنەن -1، اۋىر اتلەتيكادان - 8 جانە سەمسەرلەسۋدەن - 1 ادام قاتىسىپ، جالپى 104 سپورتشى ەل نامىسىن قورعاپ جاتىر.

اۆتور: كۇنسۇلتان وتارباي