ريو- دە- جانەيرودا وليمپيادا ويىندارىنىڭ اشىلۋ سالتاناتى باستالدى - ۆيدەو
مىنە، تورتكۇل دۇنيەنى دۇرلىكتىرىپ، دۇنيەنى دۋمان مەن ءان- كۇيگە بولەيتىن وليمپيادا ويىندارى دا كەلىپ جەتتى.
كونە ينكىلەردىڭ، اتستەك پەن ۇندىلەردىڭ جەرىندە بۇلقىنىپ جاتقان، ءانى بىرلىكتىڭ اياسىندا توعىسقان، سان عاسىرلىق تاريحى بار، تاباندى تاعدىرى مەن تانىم كوكجيەگىنىڭ كەڭدىگىنىڭ ارقاسىندا الەم شىڭىن باعىندىرعان برازيليا تالايدىڭ ارمانىنا اينالعان وليمپيادا الاۋىن تۇتاتىپ وتىر.
دەگەنمەن وليمپيادانىڭ اشىلۋ سالتاناتى قاراپايىم بولماق، ءارى بەيجىڭ مەن لوندوندا وتكەن وليمپيادا ويىندارىنىڭ دەڭگەيىمەن سالىستىرۋعا كەلمەيدى. برازيليالىق شوۋ شۋلى، ءسان- سالتاناتتى وتپەيتىندىگىن ۇيىمداستىرۋشىلار و باستان- اق ەسكەرتكەن ەدى. شامامەن العاندا، «ماراكانا» ستاديونىنداعى شوۋعا 20 ميلليون دوللار جۇمسالماق.
بۇل - لوندون وليمپياداسىندا وسى شاراعا جۇمسالعان سومادان ەكى ەسە از. بۇنىڭ الدىندا عانا ريودا وتەتىن وليمپيادا ويىندارىنىڭ اشىلۋ سالتاناتىنىڭ اتقارۋشى پروديۋسەرى ماركو باليچ شوۋدىڭ قاراپايىم ءارى بەيجىڭ مەن لوندوندا وتكەن وليمپيادا ويىندارىنىڭ دەڭگەيىمەن سالىستىرۋعا بولمايتىنداي وتەتىنىن مالىمدەگەن. "برازيليادا بولعان جاعدايعا بايلانىستى ءبىزدىڭ بەيجىڭدەگىدەي اسا زاۋلىمدىلىك، افينىداعى ارنايى ەففەكتىلەر مەن لوندونداعى جاڭا تەحنولوگيالىق جاڭارتۋلار بولمايدى. قاراپايىم، ءبىراق زاماناۋي شارا بولادى. بۇل برازيليادا ءومىر ءسۇرۋدىڭ قانشالىقتى كەرەمەت ەكەنىن كورسەتۋ ەمەس"، - دەپ اتاپ ءوتتى باليچ.
سالتاناتتى شاراعا اتاقتى برازيليالىق ءانشى جانە كومپوزيتور كاە تانۋ ۆەلوزۋ قاتىسادى دەپ كۇتىلۋدە. سونىمەن قاتار، «گرەممي» سىيلىعىنىڭ بىرنەشە دۇركىن يەگەرىمەن بىرگە 2003-2008 -جىلدارى برازيليانىڭ مادەنيەت ءمينيسترى بولعان مۋزىكانت جيلبەرتۋ جيل مەن ءانشى انيتتا ءبىر ساحناعا شىعادى.
جالپى، ءۇش ساعاتقا سوزىلاتىن سالتاناتتى شارانىڭ سپورتتىق مارافونىن ۇيىمداستىرۋدى برازيليالىق كارناۆال شەبەرلەرى قولعا الىپتى. نەگىزى، ءتورت جىلدا ءبىر وتەتىن بايراقتى باسەكەنىڭ يەسى اتانعان ءاربىر مەملەكەت سالتاناتتى اشىلۋدا ەل تاريحىنان سىر شەرتەتىن قويىلىمداردى قويۋعا تىرىسادى. برازيليا ەلى دە بۇل داستۇردەن تىس قالمايتىنى انىق. سوناۋ ءۇندى حالقىنان بەرى تامىر جايىپ كەلە جاتقان ىرگەلى ەلدىڭ تاريحى وتە باي. برازيليا بۇرىننان- اق ءبيدىڭ وتانى. شوۋدىڭ سامبا، لامبادا سەكىلدى تانىمال بيلەرمەن باستالۋى دا زاڭدىلىق. نەگىزىنەن اشىلۋ سالتاناتىندا بارىنشا ۇلتتىق ەرەكشەلىكتەر ەسكەرىلمەك.
جالپى شەرۋ كەزىندە 12 مىڭ سپورتشى مەن كوماندا وكىلدەرى ءجۇرىپ وتەدى. قاتىسۋشىلار سوڭىندا بارلىعى ءبىر- ءبىر اعاشتان وتىرعىزىپ، وليمپيادالىق ساياباقتىڭ كوركەيۋىنە ۇلەس قوسپاق.
سپورتشىلار شەرۋى اياقتالعاننان سوڭ، سالتاناتتى شارا سوڭىندا ءداستۇر بويىنشا وليمپيادا الاۋى تۇتانادى.
ايتا كەتەيىك، 79 مىڭدىق «ماراكانا» ستاديونىندا ءوتىپ جاتقان ايتۋلى وقيعانى «حابار»، «قازاقستان» جانە «KazSport» تەلەارنالارى تىكەلەي ەفيردە كورسەتىپ جاتىر.
برازيليانىڭ ريو- دە- جانەيرو قالاسىندا وتەتىن جازعى ويىندارعا الەمنىڭ تۇكپىر- تۇكپىرىنەن 207 ەلدەن 10,5 مىڭ سپورتشى قاتىسادى. ولار سپورتتىڭ 33 ءتۇرى بويىنشا باق سىناسادى. ريو وليمپياداسىندا بارلىعى 306 مەدال جيىنتىعى ساراپقا سالىنباق.
وليمپياداعا ەڭ كوپ سپورتشى اپاراتىن ەل - ا ق ش بولماق. ريو ويىندارى جولداماسىن جەڭىپ العان امەريكالىق سپورتشىلار سانى - 555. وليمپياداعا قاتىساتىن سپورتشىلارىنىڭ سانى جونىنەن ەكىنشى ورىندا برازيليا تۇر. ويىندار قوجايىنى 462 جولداماعا قول جەتكىزىپتى. ريوعا گەرمانيادان - 425, قىتايدان 416 سپورتشى اتتاندى. وسىلاردىڭ اراسىندا، مىسالى، قىتاي قۇراماسى ساپىندا 35 وليمپيادا چەمپيونى بار.
قازاقستان ريو وليمپياداسىنا سپورتتىڭ 26 ءتۇرى بويىنشا 104 سپورتشىنى اتتاندىردى. سپورتشىلارىمىزدىڭ تورتەۋى لوندون وليمپياداسىنىڭ جۇلدەگەرلەرى: ولگا رىپاكوۆا (التىن)، ادىلبەك نيازىمبەتوۆ (كۇمىس)، يۆان دىچكو (قولا) جانە گۋزەل مانيۋروۆا (قولا).
اۆتور: جاسۇلان جولدىبايەۆ
