استانادا ەر ادامدارسىز ءومىر تۋرالى فيلم تۇسىرىلۋدە - فوتو

استانا. قازاقپارات - استانادا «ۆسە يز- زا مۋجيكوۆ» كومەديالىق فيلمىنىڭ ءتۇسىرىلىمى اياقتالۋدا، وندا ءۇش جىگىت تەك ايەلدەر عانا تۇراتىن قازاقستان ەلورداسىنا تاپ بولادى.

ءتۇسىرىلىم بارىسىن كورسەتۋ ءۇشىن قازاقپارات ءتىلشىسى شاقىرىلعان بولاتىن.

«بارلىعىنا ەركەكتەر كىنالى دەپ جاتادى عوي. راسىندا، بارلىعىنا تەك وسى ەركەكتەر كىنالى بولادى ما؟ ءبىز وسىنى انىقتاعىمىز كەلدى»، - دەيدى فيلم پروديۋسەرى الەكساندر سۋسلوۆ.

كارتينا كەيىپكەرلەرى ايەل الەمىندە بولىپ قايتادى. ولاردى مۇندا توبەلەرىنە كوتەرىپ، اسا قاستەرلەيدى. باستاپقىدا بۇل ولارعا جۇماق ورنى سەكىلدەنەدى، الايدا بارلىعى ولار ويلاعانداي كەرەمەت ەمەس ەكەن. جىگىتتەر قىزداردىڭ اراسىندا ءپىر بولعىلارى كەلەدى مە، الدە بۇرىنعى ومىرلەرىنە قايتا اڭساۋعا كوشەدى مە!؟

فيلم اۆتورلارى كومەديا وتە كۇلكىلى بولادى دەپ سەندىرۋدە. سيۋجەتتە كورەرمەندەر ءۇشىن توسىن وقيعالار ورىن الادى. كينولەنتا بويىنشا ءبىر اي بويى، كۇنىنە 12 ساعات، 50 ادامنان قۇرالاتىن ءتۇسىرۋ توبى ەڭبەك ەتۋدە. پروديۋسەر الەكساندر سۋسلوۆتىڭ ايتۋىنشا، ءتۇسىرۋ كەزىندە كينوكوماندا كادرعا بىردە-ءبىر ەر كىسىنىڭ بەينەسى ەنىپ كەتپەۋىن قاداعالاپ وتىرعان.

«بىزگە استانانى ازداپ «وزگەرتۋگە» تۋرا كەلدى. ونى ايەلدەر قالاسىنا اينالدىردىق. كەيبىر ەلەمەنتتەر كومپيۋتەرلىك گرافيكامەن تولىقتىرىلادى. ءتۇسىرۋ وتە قيىن بولدى، اسىرەسە كوشەدە ءجۇرىپ بارا جاتقان كەزدەر ەرەكشە اۋىر ءتۇستى. كادردا ەر كىسىلەر بولماۋى ءۇشىن جولداردى جابۋ كەرەك بولدى. قىزدار الەمىن ەرەكشە جارىق ەتىپ كورسەتۋ ءۇشىن ءبىز كەيبىر كولىكتەردى سارى، جاسىل، قىزعىلت تۇسكە «بويايمىز»، - دەدى ول قازاقپارات تىلشىسىنە بەرگەن سۇحباتىندا.

ونىڭ سوزىنە قاراعاندا، فيلمگە تۇسەتىن اكتەرلەر ءجىتى ىرىكتەۋدەن وتكەن.

ناتيجەسىندە فيلمگە مۇرات بيسەنبين («رەكەتير»)، تاۋەكەل ءمۇسىلىم («ماحابباتىم جۇرەگىمدە»)، ءجانيا جۋرينسكايا («ۆۋزەرى»)، دانيار الشىنوۆ («نيچەگو ليچنوگو»)، سايا ورازعاليەۆا («ۆۋزەرى»)، اسەل اكباروۆا («زاۋال»)، تەمىرحان اسىلبەك تاڭدالىپ الىنعان.

دانيار الشىنوۆ ماماندىعى بويىنشا اەروعارىش ينجەنەرى. «نيچەگو ليشنەگو» تەلەحيكاياسىندا العاش رەت كينوعا ءتۇستى. كاسكادەرلەردىڭ جەدەلدەتىلگەن كۋرستارىنان ءوتىپ، اقان ساتايەۆتىڭ «رايونى» فيلمىندە جۇدىرىقتاسۋ ساحنالارىنا قاتىسادى. «ۆسە يز- زا مۋجيكوۆ» فيلمىندە ول تەك قانا قىزدار تۇراتىن الەمگە تۇسكەن باقىتتى ءۇش جىگىتتىڭ ءبىرىن سومدايدى.

«مەنىڭشە، مەن سومدايتىن كەيىپكەر بارلىعىنا جاقىن، سەبەبى ول - قاراپايىم جىگىت. ونىڭ بويىندا وركوكىرەكتىك جوق. مەن ءوزىم قاتتى بايىپتى جىگىتتىڭ ءرولىن جاساۋىم كەرەك، ءبىراق وقيعالار وتە كۇلكىلى»، - دەيدى اكتەر.

«دانيار الشىنوۆ پەن ءجانيا جۋرينسكايا «نيچەگو ليشنەگو» تەلەحيكاياسىندا كورەرمەندەر كوزايىمىنا اينالعان بولاتىن. وسى ەكى كەيىپكەردىڭ سيۋجەتتىك جەلىسىن بىردەن وسىلارعا ارناپ جازىلدى. بۇلار ءوز ءىسىنىڭ شەبەرلەرى»، - دەپ اتاپ ءوتتى الەكساندر سۋسلوۆ.

ءوز كەزەگىندە ينستاگراممداعى تانىمال ۆيدەوبلوگەر تەمىرحان اسىلبەك شەتەلدەن كەلگەن ۇسىنىستان باس تارتىپ، قازاقستاندىق فيلمگە تۇسۋگە كەلىسىمىن بەرەدى. «ول ماعان قوڭىراۋ شالىپ: «بۇل مەنىڭ بارلىق ءومىرىمدى وزگەرتەتىن ءرول شىعار؟» دەپ سۇرادى. سوسىن ول ءبىز ءۇشىن فيلمنىڭ ءبىرقاتار تۇستارىن سومداپ بەردى، ءبىز ونى شاقىردىق. ول مالايزياعا ۇشاققا وتىرايىن دەپ جاتقان ەدى، دەگەنمەن ءبىزدى تاڭداپ، استاناعا كەلدى. ول ءوزىنىڭ ءرولىن جاقسى الىپ شىقتى، وكىنىپ قالعان جوقپىز»، - دەيدى ا. سۋسلوۆ.

جوبا رەجيسسەرى ۆيكتور بورموتوۆ اكتەرلەردىڭ شەبەرلىگىن اتاپ ءوتتى جانە ءتۇسىرۋ توبىن ماقتادى.

«بۇل - مەنىڭ رەجيسسەر رەتىندەگى توسسىننان بولعان العاشقى تاجىريبەم. قازاقستاندا جۇمىس ىستەگەن ماعان قاتتى ۇنايدى، سەبەبى مۇنداعى ادامداردىڭ كوزدەرى «جانىپ تۇر». بىزگە قازاق ونەر ۋنيۆەرسيتەتىنىڭ ستۋدەنتتەرى كومەكتەسۋدە. ولار بارىن سالىپ، ءبىزدىڭ جوبامىزدىڭ ءساتتى ورىندالۋىنا قولدان كەلەر بارلىق كومەكتەرىن اياماۋدا»، - دەيدى ول.

كومەديانىڭ العاشقى كورسەتىلىمى 2017 -جىلدىڭ كوكتەمىندە وتەدى دەپ بولجانۋدا. پروديۋسەر ونىڭ پرەمەراسى 8 -ناۋرىزدا دا ءوتۋى ىقتيمال ەكەندىگىن جاسىرمادى. وعان فيلم جەلىسى دە ساي كەلەدى.

        

 

 اۆتور: جاسۇلان جولدىبايەۆ