ادىلبەك نيازىمبەتوۆ جەرەبەدەن كەيىنگى اسەرىمەن ءبولىستى

 ريو- دە- جانەيرو. قازاقپارات - بۇگىن برازيليانىڭ ريو- دە جانەيرو قالاسىندا بوكستان وليمپيادا ويىندارىنىڭ جەرەبەسى تارتىلىپ، قازاق بوكسشىلارىنىڭ العاشقى قارسىلاستارىنىڭ ەسىمدەرى بەلگىلى بولعانى تۋرالى حابارلاعان بولاتىنبىز.

جەرەبە تارتۋ ءراسىمى اياقتالعاننان كەيىن، 81 كەلىدە ەل نامىسىن قورعايتىن لوندون وليمپياداسىنىڭ كۇمىس جۇلدەگەرى ادىلبەك نيازىمبەتوۆ ريوداعى «قازاقپارات» تىلشىسىنە ءوز اسەرىمەن ءبولىستى.

«جەرەبە تارتۋ راسىمىنە بوكسشىلار بارعان جوق. باس باپكەرىمىز مىرزاعالي ايتجانوۆ كەتكەن بولاتىن. جەرەبە تارتۋ كوپ ۋاقىتقا سوزىلا قويماپتى. بارۋىنان كەلۋى تەز بولدى. كەلدى دە قاي ەلدىڭ بوكسشىلارىمەن جۇدىرىقتاساتىنىمىزدى ايتتى. مەن ءبىرىنشى اينالىمدا بوس ەكەنمىن. شيرەك فينالدا ۋكراينا جانە ازەربايجان بوكسشىلارىنىڭ قاي جەڭگەنىمەن جەكپە- جەككە شىعامىن. قارسىلاستارىمنىڭ بارلىعىن جاقسى بىلەمىن. سوندىقتان اسا ءبىر قوبالجىپ تۇرعان جوقپىن» ، - دەدى نيازىمبەتوۆ.

ول سونداي- اق، قارسىلاستارىنىڭ ىشىندە مىقتىلارى بار ەكەنىندە اتاپ ءوتتى.

«جارتىلاي فينالعا امان- ەسەن جەتسەم وزبەك بوكسشىسى ەلشود راسۋلوۆپەن جولىم ءتۇيىسۋى مۇمكىن. بۇل بوكسشى دا ماعان جاقىن تانىس. وسىعان دەيىن تالاي كەزدەستىك. ونىڭ قالاي جۇدىرىقتاساتىنى ماعان ءمالىم. ال ءۇش دۇركىن الەم چەمپيونى كۋبالىق حۋليو لا كرۋز ەكىنشى سەبەتكە ءتۇسىپتى. ونىمەن فينالدا جولىققىم كەلەدى. بۇل بوكسشىنىڭ دا قالاي بوكستاساتىنىن جاقسى بىلەمىن. اللا قالاپ، فينالعا جەتسەم ايانىپ قالمايمىن» ، - دەدى ادىلبەك نيازىمبەتوۆ.

 
اۆتور: كۇنسۇلتان وتارباي