قازاقستاندىق سپورتشىلار وتە مىقتى بولادى - قىتايلىق ۆولەيبولشى

ريو- دە- جانەيرو. قازاقپارات - قازاقستان سپورتشىلارى وتە مىقتى. مەن قازاقستاندىقتاردى جاقسى بىلەمىن.

بۇل تۋرالى ريودا جۇرگەن قازاقپارات تىلشىسىنە قىتايدىڭ ۆولەيبول كومانداسىنىڭ مۇشەسى حەن ەسىمدى ازامات ءمالىم ەتتى.

«مەن قازاقستاندىق سپورتشىلاردى وتە جاقسى بىلەمىن. ولاردىڭ ءبارى مىقتى. وليمپيادادا جاقسى ناتيجە كورسەتەدى. وسىعان دەيىن دە كوپ مەدال الىپ جۇرسىزدەر. ازيا قۇرلىعىندا قازاق بوكسشىلارىنىڭ الدىنا تۇسەتىن ەشكىم جوق. سىزدەر بيىل بوكستان كوپ مەدال الاسىزدار دەپ ويلايمىن. ءبىزدىڭ قىتايدا جەڭىل سپورت جاقسى دامىعانىمەن بوكس ءالى دامىعان جوق»، - دەپ اتاپ ءوتتى قىتايلىق سپورتشى.

سونداي-اق، قازاق ۇلتىنىڭ قوناقجاي حالىق ەكەنىن دە جاقسىلاپ ايتتى.

«مەن قازاقتاردىڭ قوناقجاي حالىق ەكەنىن جاقسى بىلەم. ءبىر رەت قازاقستاندىق سپورتشىلارمەن بولدىم. وتە باۋىرمال حالىق. سىزدەرگە ريودا جاقسى تابىستار تىلەيمىن»، - دەدى حەن ەسىمدى ازامات.

قىتاي سپورتشىسى وزدەرىنىڭ كومانداسىنداعى ريو وليمپياداسىنا قاتىساتىن جالعىز قازاق بالاسىن دا تانيتىنىن ايتتى.

«ءبىزدىڭ كۇرەس كوماندامىزدا ءبىر قازاق بالا بار. مەن ونى جاقسى بىلەمىن. ەسىمى ەرلانبەك كاتەي. جاقسى كۇرەسەدى. ول قازاق بولسا دا، قىتايعا مەدال الىپ بەرۋگە كەلدى. ءبىز قازاق بالاسىنىڭ جەڭىس تۇعىرىنا كوتەرىلگەنىن قولدايمىز. ءوزى دە جاقسى ەڭبەك ەتەدى. ءبىز ونى جاقسى كورەمىز. بىزدە ەرلانبەك سياقتى مىقتى بالۋاندار از»، - دەدى ول.

ەستەرىڭىزگە سالا كەتەيىك، قىتاي مەملەكەتى وليمپيادا تاريحىندا ريوعا تۇڭعىش رەت ەڭ كوپ جولداما جەڭىپ الىپتى. ولار بۇل تۋرالى وزدەرىنىڭ jingji.sports.cn سايتىندا جاريالادى.

قىتاي دەرەككوزىنە سۇيەنسەك، ولار وليمپياداعا 26 سپورت تۇرىنەن 416 جولداما جەڭىپ العان. جالپى ريوعا 711 ادام باراتىنى ايتىلعان. جولداما جەڭىپ العان سپورتشىلاردىڭ 256 سى ايەل، 160 ى ەر. وسى 416 سپورتشىعا ريودا 259 ادام قىزمەت ەتەدى. ولار باپكەرلەر، دارىگەرلەر، پسيحولوگ ماماندار. بۇلاردىڭ ىشىندە 29 ادام ارنايى گەرمانيا، ا ق ش سياقتى وزگە ەلدەن كەلىپ، قىتايلىق سپورتشىلارعا جوعارى جەتىستىككە جەتۋگە اتسالىسىپ جۇرگەندەر. ريودا ونەر كورسەتەتىن سپورتشىلاردىڭ 108 ى لوندون وليمپياداسىنا قاتىسقان. جالپى ريودا قىتاي قۇراماسىنىڭ ساپىندا 35 وليمپيادا چەمپيونى ونەر كورسەتەدى. ونىڭ 27 سى لوندون وليمپياداسىنىڭ چەمپيوندارى. 416 سپورتشىنىڭ ىشىندە ەڭ جاسى ءجۇزۋشى يانحان - 14 جاستا. ەڭ جاسى ۇلكەنى وق اتۋ سپورتىنان وليمپيادا چەمپيونى 39 جاستاعى چەن ين. قىتايدىڭ 29 ولكەسىنەن جاساقتالعان سپورتشىلاردىڭ قاتارىندا قازاق، موڭعول، دۇنگەن، مانزۋ سياقتى ون از ۇلت وكىلىنەن 32 سپورتشى جولداما جەڭىپ العان.

اۆتور: كۇنسۇلتان وتارباي