الماتىدا قوقىس سۇرىپتايتىن زاۋىت سالىنادى - فوتو

الماتى. قازاقپارات - الماتىدا مەملەكەتتىك- جەكە مەنشىك ارىپتەستىك اياسىندا قوقىس سۇرىپتايتىن زاۋىت سالىنادى.

بۇگىن «ءتارتىپ» ا ق باسقارما ءتوراعاسى ايبەك راحىموۆ جاڭا زاۋىتتىڭ جوباسىن قالا اكىمى باۋىرجان بايبەككە تانىستىردى.

اۋماعى 7,2 گەكتار جەردى الاتىن زاۋىت الماتى قالاسىنىڭ الاتاۋ اۋدانىندا «جىلۋ ەلەكتر ستانساسى-2» مەملەكەتتىك كاسىپورنىنىڭ تومەنگى جاعىندا بوي كوتەرەتىن بولادى.

ونى سالۋعا 4,5 ميلليارد تەڭگە بولىنگەن.

«زاۋىتتى 2017 -جىلدىڭ ءساۋىر ايىندا ىسكە قوسۋ جوسپارلانعان. وندا جىلىنا 750 توننا قوقىس وڭدەلەتىن بولادى. قوقىستار الدىمەن زاۋىتتىڭ ءبىر بولىگىنە جەتكىزىلەدى. كەيىن ولار سۇرىپتالادى: شىنى، مەتال، پلاستيك جانە باسقا دا زاتتار بولەك جينالادى. بارلىعى 14 ءتۇرلى قالدىق سۇرىپتالادى. بۇدان ءارى قالدىقتار وڭدەلىپ، قايتالاما شيكىزات بولىپ، نىعىزدالادى. مىسالى، ءتۇستى مەتالداردى قايتادان پايدالانۋعا بولادى. ەكىنشى قايتارا قولدانۋعا جارامسىز زاتتار نىعىزدالىپ، پوليگونعا كومىلۋگە جونەلتىلەدى»، - دەدى ا. راحىموۆ.

ايتا كەتكەن ءجون، زاۋىتتىڭ بارلىق جابدىقتارى ەۋروپالىق وندىرۋشىلەردەن ساتىپ الىنعان.

«جاڭا زاۋىت بۇعان دەيىن الماتى مەن استانادا سالىنعان وسى تەكتەس زاۋىتتاردان قوقىستاردى وڭدەۋدىڭ تولىق كەزەڭىن قامتيتىندىعىمەن ەرەكشەلەنەتىن بولادى. بۇعان دەيىنگى زاۋىتتار قوقىستاردى جيناۋ، جونەلتۋ، كومۋمەن اينالىسپايتىن. ال بۇل زاۋىتتىڭ ءوز پوليگونى بار. قوقىستاردى جيناۋ جانە جونەلتۋمەن دە ءوزى اينالىسادى. قۇرىلىسقا بەلگىلەنگەن جەردى قالا اكىمدىگى بەرگەن جوق. ونى زاۋىتتى سالۋشىلار ءوز قارجىلارىنا جەكە ادامداردان ساتىپ العان. ەرتەڭ ءبىز زاۋىت يەلەرىنە بەلگىلەنگەن جەر بويىنشا مەملەكەتتىك اكت بەرەمىز. جالپى، قالادا قوقىستاردى بولەكتەپ جيناۋ ماسەلەسى تالاي رەت كوتەرىلگەن. نەگىزى، مىناداي زاۋىتتى سالماي جاتىپ، قوقىستاردى بولەكتەپ جيناۋدان تۇك پايدا جوق. ويتكەنى، جيناۋ، تاسۋ بارىسىندا قوقىستار ءبارىبىر ارالاسىپ كەتەدى. سوندىقتان الدىمەن ءتيىستى ينفراقۇرىلىمدى جاساپ الۋىمىز كەرەك»، - دەدى الماتى قالاسى اكىمىنىڭ ورىنباسارى ەرلان اۋكەنوۆ.

     

اۆتور: ايبوتا جاپپاربەرگەن