اتىراۋ وبلىسىندا ءىرى قارا مالدارداعى ىندەت افريكا قۇرلىعىنان كەلىپتى
قازاقستان ءۇشىن تاڭسىق اۋرۋ رەسەي اۋماعىنان كەلگەن. بۇل تۋرالى بۇگىن ق ر اۋىل شارۋاشىلىعى مينيسترلىگىندە ۆەتەرينارلىق باقىلاۋ جانە قاداعالاۋ كوميتەتى ءتوراعاسىنىڭ ورىنباسارى ولجاس اۋسابايەۆ ءمالىم ەتتى.
«قازىرگى ۋاقىتتا اتالعان اۋرۋدىڭ وشاعىندا جويۋ جۇمىستارى جۇرگىزىلۋدە. 3 مىڭنان استام ءىرى قارا وسى دەرتكە شالدىققان، 294 باس سيىر شىعىن بولدى. اۋرۋ مالدى ايىقتىرۋ شارالارى جۇرگىزىلۋدە. جاعداي ءسال تۇراقتالا باستادى»، - دەدى ول.
ەسكە سالا كەتەيىك، بۇرىن اتىراۋ وبلىسى قۇرمانعازى جانە يساتاي اۋداندارىندا ءىرى قارا مال ىشىندە افريكا قۇرلىعىنا ءتان - نودۋليارلى دەرماتيت اتتى ەكزوتيكالىق اۋرۋ بەلگىلەرى تابىلعان بولاتىن. 27 -شىلدەدە اتالعان اۋماقتاردا 30 كۇندىك كارانتين جاريالاندى. وسىعان بايلانىستى رەسەيدەن ءىرى قارا مالدى اكەلۋگە تىيىم سالىندى.
اۆتور: جاسۇلان جولدىبايەۆ
