ۇلى بريتانيادا اينالانى تاماشالاۋعا مۇمكىندىك بەرەتىن الەمدەگى ەڭ بيىك مۇنارا سالىندى - كەسكىن

استانا. قازاقپارات - ۇلى بريتانيادا جاڭا تۋريستىك ورىن پايدا بولدى.

انگليانىڭ وڭتۇستىگىندەگى برايتون قالاسىندا الەمدەگى ەڭ بيىك مۇنارا سالىندى.

جاڭا نىساننىڭ باستى ەرەكشەلىگى - اينالانى قارايتىن جىلجىمالى الاڭى بار. ەندى حالىق سانى 300 مىڭعا دا تولمايتىن شاھارعا تۋريستەردىڭ اعىلاتىن ءتۇرى بار. ساۋلەتشىلەر بۇل جوبا بويىنشا 13 جىل جۇمىس ىستەگەن. تەڭىز جاعاسىنداعى قالادا اشىلعان مۇنارانىڭ بيىكتىگى 160 مەتردەن اسادى. ونىڭ اينالانى قارايتىن الاڭى شىنىدان سالىنعان.

تەڭدەسسىز جوبانىڭ اۆتورلارى -  ەرلى-زايىپتى ساۋلەتشىلەر دەۆيد ماركس ي دجۋليا بارفيلد. ولار بىرىككەن كورولدىك استاناسىنداعى «لوندون كوزى» دەپ اتالاتىن اينالانى قاراۋ شەڭبەرى مەن كەمبريدجدەگى زاماناۋي مەشىتتى تۇرعىزعان ەدى.

دەۆيد ماركس، ساۋلەتشى:

- ءبىزدىڭ يدەيامىز وتە قاراپايىم. مۇنارانى سالۋداعى ماقسات -  ادامدارعا جاقسى كوڭىل- كۇي سىيلاپ، ولاردى شابىتتاندىرىپ، ەرەكشە راحاتقا بولەۋ. حالىققا برايتون قالاسىنىڭ بۇكىل بەينەسىن، جاعالاۋى مەن بارلىق اينالانى جاڭاشا قىرىنان كورسەتكىمىز كەلەدى.

الەمدەگى ەڭ بيىك مۇنارا تاريحي ورىندا سالىنعان. ول جەرگە 1866 -جىلى ساۋلەتشى يۋدجينيۋس بەرچتىڭ جوباسى بويىنشا «باتىس ايلاق» تۇرعىزىلعان ەدى. بۇل -  ەكى جاعىنان دا كەمەلەر كەلىپ توقتاۋ ءۇشىن جاعادان سۋعا قاراتىپ سالىنعان قۇرىلعى. وندا كوڭىل كوتەرۋ پاۆيلوندارى مەن كونتسەرت زالى بار ەدى. وكىنىشكە قاراي، «باتىس پيرس» 2003 -جىلى ورتەنىپ، كەلەسى جىلىندا داۋىل سالدارىنان ءبىرجولا كۇيرەدى.

دجۋليا بارفيلد، ساۋلەتشى:

- ءبىز مۇنارانى تۇرعىزا باستاعاندا برايتونعا جىلىنا 8 ميلليون تۋريست كەلەتىن. ءقازىر ولاردىڭ سانى 11 ميلليونعا جەتتى. بۇل -  وتە قارقىندى دامىپ كەلە جاتقان قالا. مۇندا يننوۆاتسيالىق ساۋلەت ونەرىنە كەڭ جول اشىلعان. برايتون پاۆيلونى مەن «باتىس پيرس» ەسكى مەن جاڭانىڭ كەرەمەت ۇيلەسىمدى ۇندەستىگى ىسپەتتى. دەۆيد وسى الاڭقايعا توقتالعان كەزدە باسقا تاڭداۋ تۋرالى ويلانۋدىڭ دا ەش قاجەتى جوق بولاتىن.

شىنى قابىقتىڭ ىشىنە 200 ادام سىيادى. جوعارى كوتەرىلۋگە كۇندىز 20، ال كەشكى ساعات 6 دان كەيىن 30 مينۋت ۋاقىت كەتەدى. كاپسۋلادا ءدامحانا، ال مۇنارانىڭ ەتەگىندە ۇلكەن مەيرامحانا ورنالاسقان. قۇرىلىس سالۋعا بارلىعى 60 ميلليون دوللار جۇمسالدى. ۇيىمداستىرۋشىلاردىڭ بولجالدى ەسەبى بويىنشا، جاڭا مۇناراعا شىعىپ، شاھاردى بيىكتەن تاماشالاۋ ءۇشىن جىلىنا 700 مىڭ تۋريست كەلەدى جانە ولار قالا قازىناسىنا 42 ميلليون دوللار تابىس اكەلەدى. جەرگىلىكتى بيلىك ءبىر كەزدەرى اتاعى جەر جارعان «باتىس ايلاقتى» دا قايتا قالپىنا كەلتىرەتىن كۇن تۋار دەپ سەنەدى.

www.24.kz