بۇدان بىلاي ەلوردالىقتاردىڭ ىشەتىن سۋىندا حلوردىڭ ءدامى تاتىمايدى

استانا. قازاقپارات -  قۇبىر ارقىلى كەلەتىن سۋ ىشۋگە جارامدى. «استانا سۋ ارناسى» تىرشىلىك ءنارىن قايناتپاي- اق تۇتىنۋعا شاقىرادى. مامانداردىڭ ايتۋىنشا، ەلوردالىقتار پايدالاناتىن سۋ دەنساۋلىققا پايدالى.

ەلوردالىقتار جىلىنا 94 ميلليون تەكشە مەتر سۋ تۇتىنادى. ال سول تىرشىلىك ءنارى بىزگە قايدان جانە قالاي كەلەدى.

استانا تۇرعىندارى ەسىل وزەنىنىڭ سۋىن پايدالانادى. ول بۇرىنعى ۆياچەسلاۆ، قازىرگى استانا سۋ قويماسىنان كەلىپ، سورعى- سۇزگى ستانتسياسىنا قۇيادى. مۇندا بىرىنشىدەن، سۋ تەحنيكالىق قويماعا جونەلتىلەدى. ودان وندىرىستىك قاجەتتىلىك ءۇشىن جىلۋ ەلەكتر ستانساسى مەن كاسىپورىندارعا تاراتىلادى. ستانسيادا تىرشىلىك كوزىن تازارتاتىن ەكى بلوك بار. العاشقىسى كۇردەلى جوندەۋدەن ءوتىپ جاتىر. ال ەكىنشىسىندە ەسىلدەن كەلگەن سۋ زالالسىزداندىرىلىپ، ساۋلەلەندىرىلىپ، سۇزگىلەۋدەن وتەدى. ەندى ىشۋگە جارامدى سۋ ءۇش رەزەرۆۋارعا كەلىپ ءتۇسىپ، كەيىن تۇتىنۋشىلارعا جەتكىزىلەدى.

ءۋاليحان دوسايەۆ، «استانا سۋ ارناسى» م ك ك باس ديرەكتورى:

- بلوك 2010 -جىلى پايدالانۋعا بەرىلدى. ونىڭ قۋاتتىلىعى تاۋلىگىنە  100000 تەكشە مەتردى قۇرايدى. تابيعي سۋ وسى جەرگە كەلىپ تۇسەدى. وسىندا تازالاۋدىڭ بارلىق كەزەڭىنەن ءوتىپ، ءتيىستى نورمالارعا سايكەس ىشۋگە جارامدى كۇيگە دەيىن جەتكىزىلەدى.

 بۇدان بىلاي ەلوردالىقتاردىڭ ىشەتىن سۋىندا حلوردىڭ ءدامى تاتىمايدى. بۇرىن تىرشىلىك ءنارىن تازارتۋ ءۇشىن سۇيىق حلور پايدالانعان. ال قازىر ناتريدىڭ گيپوحلوريدىن قولدانادى. ياعني، تابيعي سۋ جوعارى ساپالى اس تۇزى ارقىلى تازارتىلادى. تىڭ تەحنولوگيا ماۋسىم ايىندا ەنگىزىلدى. ەندى كرانداعى سۋ ىشۋگە جارامدى. جاي «جارامدى» عانا ەمەس، «ىشۋگە پايدالى». بۇل مامانداردىڭ ايتقانى.

راشيد مايتدينوۆ، «استانا سۋ ارناسى» م ك ك ءبولىم باسشىسى:

 - كرانداعى سۋىق سۋدى قايناتپاي- اق ىشۋگە بولادى. ونىڭ ساپاسى جوعارى ءارى پايدالى. ويتكەنى، ءبىز تۇتىناتىن تىرشىلىك كوزىندە قاجەتتى مينەرالدار مەن تۇزدار بار.

ماماننىڭ ءسوزىن مەكەمەنىڭ باس ديرەكتورى دا راستاپ وتىر. ول دا سۋدى كراننان ىشەدى. «استانا سۋ ارناسى» ءيىسى قولقانى قاباتىن تالدىكولدىڭ ماسەلەسىن دە شەشتى. ەستەرىڭىزدە بولسا، سول جاعالاۋداعى جاعىمسىز ءيىس ەلوردالىقتاردى عانا ەمەس، ەلباسىنى دا الاڭداتقان ەدى. ماماندار تىعىراقتان شىعۋدىڭ جولىن تاپتى. قاسكەن تىلەۋبايەۆ، كارىز تازارتۋ عيماراتىنىڭ جەتەكشىسى:

 - قازىر جاعىمسىز ءيىس جوق. بۇرىن پايدالانعان سۋ تالدىكولگە قۇيىلاتىن. قازىر ولاي ەمەس. سۋ الدىمەن تازارتىلىپ، ۋلتراكۇلگىنمەن زالالسىزداندىرىلىپ بارىپ، ەندى ەسىلگە توگىلەدى. ال جىل سوڭىنا دەيىن تازارتۋ عيماراتىنىڭ ەكىنشى كەزەگى پايدالانۋعا بەرىلمەك. جاعىمسىز ءيىس ماسەلەسى سول كەزدە ءبىرجولا شەشىلەدى، - دەيدى ماماندار.

اۆتورلارى: ج. بىركەنوۆ جانە ءا. تاۋەكەلوۆ.

www.24.kz