الەكسەي ني: چەمپيوندارىمىز وليمپياداعا قاتىسپاسا دا، مەدال الامىز

ريو- دە- جانەيرو. قازاقپارات - چەمپيوندارىمىز وليمپياداعا قاتىسپاسا دا، مەدال الامىز. بۇل تۋرالى اۋىر اتلەتيكادان قازاقستان ۇلتتىق قۇراماسىنىڭ باس باپكەرى الەكسەي ني ريوداعى قازاقپارات تىلشىسىنە بەرگەن سۇحباتىندا ءمالىم ەتتى.

 «چەمپيوندارىمىز (يليا يلين، ءزۇلفيا چينشانلو، مايا مانەزا، سۆەتلانا پودوبەدوۆا - اگەنتتىك) وليمپياداعا قاتىسپاسا دا، مەدال الامىز. بۇگىنگى ريوعا كەلگەن قۇرامامىز دا جامان ەمەس. ەڭ باستىسى سپورتشىلارىمىز جارىسقا دەيىن جاتتىعۋ كەزىندە جاراقات الىپ قالماسا بولدى. لوندوندا 4 التىن العان چەمپيوندارىمىزدىڭ ريوعا كەلە الماعانى ارينە وكىنىشتى. بۇل جولى باسقا اتلەتتەرىمىز مەدال اپەرەدى. بۇرىنعى مىقتىلارى جوق ەكەن دەپ اۋىر اتلەتتەردى نازاردان شىعارۋعا بولمايدى»، - دەپ اتاپ ءوتتى ني.

سونىمەن قاتار ول دوپينگ داۋىن ويلاعىسى كەلمەيتىنىن، ويلايتىن ۋاقىتى دا جوق ەكەنىن اشىپ ايتتى.

«تىلشىلەرگە جاقىنداپ كەتسەم، بىردەن دوپينگ داۋىن سۇرايدى. مەندە قازىر ول تۋرالى ايتاتىن، ويلاناتىن ۋاقىتىم جوق. ويلاعىمدا كەلىپ جۇرگەن جوق. قازىر بار ويلايتىنىم ريو وليمپياداسى. سپورتشىلارىمدى جارىسقا قالاي شىعارامىن، كىمنىڭ كۇشى قانشا كوتەرۋگە جەتەدى، جارىس كەزىندە كىمگە قانشا سالماق كوتەرۋگە تاپسىرىس بەرەم دەپ سونىمەن ويلانىپ ءجۇرمىن»، - دەدى اۋىر اتلەتيكادان قازاقستان ۇلتتىق قۇراماسىنىڭ باس باپكەرى. 

ەستەرىڭىزگە سالا كەتەيىك، ريو وليمپياداسىندا اۋىر اتلەتتەرىمىز 6 - تامىز كۇنى ساعات 19:00-دە (استانا ۋاقىتى بويىنشا 7 - تامىز تاڭعى ساعات 04:00) جارىستارىن باستايدى. بۇل كۇنى ايەلدەر اراسىنداعى باسەكەدە 48 كەلىدەگى قىزىمىز م. ەليسەيەۆا ونەر كورسەتەدى.

ال جارىستىڭ ەكىنشى كۇنى ساعات 19:00-دە (استانا ۋاقىتى بويىنشا 8 - تامىز تاڭعى ساعات 04:00) ەرلەر اراسىندا 56 كەلى سالماقتاعى لەگيونەرىمىز ا. چونتەي ەل نامىسىن قورعايدى.

تامىزدىڭ 8- كۇنى ساعات 19:00-دە (استانا ۋاقىتى بويىنشا 9 - تامىز تاڭعى ساعات 04:00) تاعى ءبىر لەگيونەر، اۋىر اتلەتىمىز 62 كەلى سالماقتاعى ف. حاركيدىڭ زىلتەمىردى قالاي كوتەرگەنىن كورەتىن بولامىز.

 تامىزدىڭ 9-ى كۇنى ساعات 15:30-دا (استانا ۋاقىتى بويىنشا 10 - تامىز ساعات 00:30) 63 كەلى سالماقتاعى اۋىر اتلەت قىزىمىز ل. گوريچيەۆانىڭ ونەرىن تاماشالايمىز.

تامىزدىڭ 10-ى كۇنى 15:30-دا (استانا ۋاقىتى بويىنشا 11 - تامىز ساعات 00:30) قازاقتىڭ قاراكوز قىزى ج. جاپپارقۇل 69 كەلى سالماقتا ەل نامىسىن قورعايدى. وسى كۇنى كەشكى ساعات 19:00-دە (استانا ۋاقىتى بويىنشا 11 تامىز تاڭعى ساعات 04:00) 77 كەلىدە ەرلەر اراسىندا ن. راحيموۆ سىنعا تۇسەدى.

 تامىزدىڭ 12- كۇنى ساعات 19:00-دە (استانا ۋاقىتى بويىنشا 13 - تامىز تاڭعى ساعات 04:00) ەرلەر اراسىندا 85 كەلى سالماقتا د. ۇلانوۆ ءوز ونەرىن پاش ەتەدى.

اۋىر اتلەتتەرىمىزدىڭ باسەكەسى ءۇش كۇن ۇزىلىستەن كەيىن، ياعني تامىزدىڭ 15- كۇنى قايتا جالعاسادى. بۇل كۇنى ساعات 19:00-دە (استانا ۋاقىتى بويىنشا 16 - تامىز تاڭعى ساعات 04:00) +105 كەلى سالماقتاعى زىلتەمىرشىمىز قىزىلوردالىق ا. زايچيكوۆ ەل نامىسىن قورعايدى.

اۆتور: كۇنسۇلتان وتارباي