مەن بۇلاقتىڭ كوزىن عانا اشتىم، بۇدان ارعىسى جانىبەكتىڭ ءوز ەڭبەگى - باۋىرجان وسپانوۆ
- ءسىز قازاق سپورتىنا ەڭ جاقىن جاناشىر تۇلعالاردىڭ ءبىرىسىز. مىنە، ريوعا دا سول سپورتشىلارىمىزعا قولداۋ كورسەتۋگە كەلىپسىز. كىمدەردەن ءۇمىت كۇتەسىز؟
- بۇل وليمپيادا ويىندارى! قازىر تورتكۇل دۇنيەنىڭ كوزى وسى ريو- دە- جانەيرو وليمپياداسىندا. سوندىقتان بارلىق سپورتشىلارىمىزعا ءۇمىت ارتامىز. بۇل الاماندا ەلدىگىمىزدىڭ نامىسى سىنعا تۇسەدى. قانشا كوپ مەدال الساق، ەلگە سونشا ۇلكەن ابىروي. ەندى ەكى كۇننەن كەيىن جارىس باستالادى. وليمپياداشىلارىمىزعا ساتتىلىك جولداس بولسا ەكەن دەپ تىلەيمىن. سپورتتا جەڭىس پەن جەڭىلىس ەگىز. ءبىراق، ءبىزدىڭ سپورتشىلارىمىز جەڭىس تۇعىرىنان كورىنسىن دەپ تىلەيىك. ال ءوز باسىم بوكسشىلارعا كوبىرەك ءۇمىت ارتامىن.
- بوكسشىلاردىڭ ىشىنەن كىمدەر مەدال الادى دەپ وتىرسىز؟
- اناۋ الادى، مىناۋ المايدى دەپ ەشكىمدى بولە جارعىم كەلمەيدى. ءبارى دە جەڭىس تۇعىرىنان كورىنسەك دەپ ارمانداپ كەلدى. سول ارماندارىنا جەتسىن. باعى دا، بابى دا قاتار شاپسىن. ءبىزدىڭ بوكسشىلاردان كوپتەگەن ەلدىڭ سپورتشىلارى قورقادى. سەبەبى، ءبىزدىڭ جىگىتتەر مىقتى. وليمپياداعا ىرىكتەلگەن بوكسشىلاردىڭ بارلىعىنىڭ دا الەمدە وزىندىك ورىندارى بار. ءبىراز بيىكتەردى باعىندىرعان، تاجىريبەلەرى دە مول. سوندىقتان ريودان قۇر كەتپەيمىز دەپ ويلايمىن. وسىعان دەيىنگى وليمپيادالاردا دا قورجىنىمىز قۇر قايتپاعان. بۇل جولى دا سول يگى ءداستۇرىمىز ساقتالادى دەگەن ۇمىتتەمىن.
- جانىبەك ءالىمحان ۇلىن بوكس الەمىنە ءسىزدىڭ الىپ كەلگەنىڭىزدى جۇرت جاقسى بىلەدى. مىنە، العاشقى وليمپياداسىنا كەلىپ جاتىر. وسى باۋىرىڭىزعا قانشالىق سەنىم ارتىپ وتىرسىز؟
- جانىبەك تالانتتى ازامات. وتە ەڭبەكقور. سونداي- اق، تاربيەلى، بيازى، وتە اقىلدى بالا. ول ارتىندا ءۇمىت كۇتىپ قالعان ەلى بار ەكەنىن جاقسى بىلەدى. سوندىقتان، بۇل جولى مەدال ءۇشىن بارىن سالادى دەپ ويلايمىن. قازاقتا "بۇلاق كورسەڭ كوزىن اش" دەگەن ادەمى ءسوز بار. سول سياقتى مەن بۇلاقتىڭ كوزىن عانا اشتىم. ءارى قاراي ول ءوزىنىڭ ەڭبەقورلىعىنىڭ ارقاسىندا وسىنداي جەتىستىككە جەتتى. الەم چەمپيونى اتاندى. مىنە، جارىستاردىڭ تورەسى وليمپياداعا كەلىپ جاتىر. وليمپياداعا جولداما الۋ ءۇشىن دە قانشاما سىناقتاردان ءوتتى. وسى ءتورتجىلدىق دوداعا قاتىسۋ ارمان بولىپ جۇرگەن قانشاما سپورتشىلار بار. ەندى، ريودا جانىبەكتىڭ باعى جانىپ، ەلىمىزگە قۋانىش سىيلاسا بىزگە سودان ارتىق باقىت جوق.
- وزگە سپورت تۇرلەرىنەن قاي سپورتشىلارعا سەنىم ارتۋعا بولادى؟
- جەڭىل اتلەتتەرىمىز بار، اۋىر اتلەتتەرىمىز بار. ولار دا مەدال الادى دەپ ويلايمىن. ال بالۋاندارىمىز دا بيىل جۇلدەسىز قالماس.
- بيىل رەسەي سپورتتىڭ ءبىر ەمەس، بىرنەشە تۇرىنەن شەتتەتىلىپ، وليمپياداعا تولىق قۇرامدا قاتىسا المايتىن بولدى. وسى تۋرالى ويىڭىزبەن بولىسە كەتسەڭىز.. .
- نەگىزى سپورتتىڭ ءبىر ءتۇرىن ءبىراق شەكتەپ سالۋ دۇرىس ەمەس. بۇل باسەكەلەستىكتى قۇرتادى. كىم دوپينگ قولداندى، سونى عانا جازالاپ، كىناسىزدەرىن وليمپياداعا جىبەرۋ كەرەك ەدى. ءبىراق، بۇل ءبىزدىڭ قولىمىزدان كەلمەيتىن شارۋا. جالپى دۇرىس ەمەس دەپ ويلايمىن.
- ەندى اڭگىمەمىزدى قايتا ريوعا بۇرىپ، سونىمەن تۇيىندەسەك. برازيليانىڭ وليمپياداعا دايىندىعى قالاي سياقتى؟ سىزگە ۇيىمداستىرۋ جاعى ۇناپ جاتىر ما؟
- ەڭ باستىسى، ەل نامىسىن قورعايتىن سپورتشىلارىمىزعا بارلىق جاعدايدى جاساپتى. جاتقان ورىندارى جايلى ەكەن. بارلىعىن كورىپ شىقتىم. ال باسقا جاعىنا كەلسەك، كوڭىلىمىز تولماي جاتقان دۇنيەلەر دە جوق ەمەس. ءبىراق، ول بىزگە اسا ماڭىزدى ەمەس. سوندىقتان، سپورتشىلارىمىزعا جاساعان جاعدايدى بىزگە جاساعان جاعداي دەپ تۇسىنەيىك.
- اڭگىمەڭىزگە راحمەت!
اۆتور: كۇنسۇلتان وتارباي
