جانىبەك ءالىمحان ۇلى: جارىستى اسىعا كۇتىپ ءجۇرمىن
وسى ورايدا جانىبەك الىمحان ۇلىمەن سويلەسىپ، جارىسقا دايىندىعىن سۇرادىق.
- دايىندىعىڭ قالاي؟
- دايىندىعىم جامان ەمەس. وسى وليمپيادا دەپ تىنباي تەر توكتىك. ەندى سونىڭ جەمىسىن جەيتىن ۋاقىت كەلدى. جارىستى اسىعا كۇتىپ ءجۇرمىن.
- باستى قارسىلاستارىڭ تۋرالى ايتىپ بەرسەڭ...
- بۇل وليمپيادا! سوندىقتان ەشكىم جەڭىلەم دەپ كەلمەيدى. سونداي- اق ناشار بوكسشى بۇل جارىسقا قاتىسا المايدى. دەمەك، بارلىق بوكسشى مەنىڭ قارسىلاسىم. ولاردى جەكە- جەكە اناۋ وسال، مىناۋ مىقتى دەپ ايتا المايمىن. كىمنىڭ كىم ەكەنىن تەك رينگ كورسەتەدى.
- ريوعا كەلگەننەن بەرى كليمات كەرى اسەر ەتىپ جاتقان جوق پا؟
- جوق، ءبارى جاقسى. ءبىز كەلگەلى اۋا رايى دا جاقسى بولىپ تۇر. كۇن قاتتى ىستىق ەمەس. تاڭەرتەڭ جانە تۇستەن كەيىن ەكى مەزگىل جاتتىعۋدامىز.
- جاتقان جەرلەرىڭىز جايلى ما؟
- ءيا، وتە تاماشا! تازا ءارى رەتتى. بارلىق جاعداي جاسالعان. ۋاقىتىندا دەمالىپ، ۋاقىتىندا جاتتىعۋ جاساپ جاتىرمىز.
- سىزدەرگە بەرەتىن تاماقتارى قالاي؟
- تاماقتارى دا وتە جاقسى. ءبىراق، ءوزىمىزدىڭ تاماقتاي قايدان بولسىن. ءبىز وزىمىزبەن بىرگە، قازى- قارتا، قىمىز، شۇبات، قۇرت الا كەلگەمىز. بۇنىڭ بارلىعىن مۇندا تاماقتىڭ جوقتىعىنان ەمەس، وزىمىزگە كۇش- قۋات الۋ ءۇشىن اكەلدىك. كۇندە مىنا جاقتىڭ بەرگەن تاماعىنىڭ سىرتىندا ءوزىمىز اكەلگەن تاماقتان دا جەپ تۇرامىز.
- ەل- جۇرتقا وليمپيادا الدىندا قانداي سالەم جولدايسىڭ؟
- بارلىق قازاقستاندىق جانكۇيەرلەرىم، مەن سىزدەردىڭ ۇمىتتەرىڭدى اقتاۋعا كەتتىم. اللا قالاسا العاشقى وليمپيادامدا قازاقستان قورجىنىنا مەدال سالام دەپ وتىرمىن. سىزدەر مەنىڭ تىلەۋىمدى تىلەسەڭىزدەر، مەن ۇمىتتەرىڭىزدى اقتاۋعا بار كۇش- جىگەرىمدى سالامىن. قۋانىشتا جۇزدەسەيىك.
- اڭگىمەڭە راحمەت. تەك ساتتىلىك تىلەيمىز!
اۆتور: كۇنسۇلتان وتارباي
