ق ر ق ك قىزمەتتىك يتتەرى رەسەيدەگى «ادال دوس» بايقاۋىندا ءساتتى ونەر كورسەتتى - فوتو

استانا. قازاقپارات - قازاقستان رەسپۋبليكاسى قارۋلى كۇشتەرى اسكەري پوليتسياسىنىڭ قىزمەتتىك يتتەرى رەسەيدەگى «ادال دوس» بايقاۋىندا ءساتتى ونەر كورسەتتى.

 ءبىرىنشى كەزەڭدە كينولوگتارىمىز بەن ولاردىڭ ءتورت اياقتى كومەكشىلەرى بەلارۋستىڭ كومانداسىنان وزا شاۋىپ جانە قىتاي مەن رەسەيدىڭ وكىلدەرىنە جول بەرىپ، ءۇشىنشى ورىندى ەنشىلەدى، دەپ حابارلايدى ق ر قورعانىس مينيسترلىگىنىڭ باسپا ءسوز قىزمەتى.

«كينولوگ - قىزمەتتىك يت» جۇبىندا ولار 800 مەتردەن ءتورت اينالىمداعى قاشىقتىقتان ءوتتى جانە وق اتۋدى ورىندادى. ءبىزدىڭ كوماندا سەنىمدى قادام مەن العاشقى ناتيجەلەرگە كوڭىلى كونشىپ وتىر. الايدا، بۇل سىناقتىڭ سوڭى ەمەس. كينولوگتار مەن ءتورت اياقتى «جاۋىنگەرلەرگە» قىزمەتتىك مىندەتتەردى، ياعني، ۇستاۋ، تەكسەرۋ جانە بۇزاقوردى ايداۋىلداۋدى ورىنداۋدا وزدەرىنىڭ ارتىقشىلىقتارىن، سونداي- اق، كەدەرگىلەر جولاعىنان وتۋدە دەنە دايارلىقتارىن دالەلدەۋگە تۋرا كەلەدى.

 ق ر ق ك اسكەري پوليتسياسى باس باسقارماسىندا اتاپ وتكەندەي، بايقاۋعا قاتىسۋ ءۇشىن قىزمەتتىك يتتەردى دايىنداۋ كەزىندە مالينۋا جانە نەمىس وۆچاركاسى تۇقىمداس يتتەرگە باسىمدىق بەرىلدى. «ادال دوس» - جانۋارلار قاتىستىرىلاتىن ارميا حالىقارالىق ويىندارى-2016-نىڭ بىردەن- ءبىر سايىسى. ۇيىمداستىرۋشىلاردىڭ باعاسى بويىنشا بارلىق قاتىسۋشىلار لايىقتى تۇردە سىناقتاردان ءوتىپ، جوعارى كاسىپقويلىقتارىن راستاۋدا. اسكەري كينولوگتاردىڭ العاشقى حالىقارالىق بايقاۋىنا بارلىعى شىعىس- ەۋروپالىق، نەمىس جانە بەلگيالىق وۆچاركا ءۇش تۇقىمداس 25 قىزمەتتىك يتپەن بىرگە 50 اسكەري قىزمەتشى قاتىسۋدا.