سولتۇستىك كورەيا كورشىلەرىنىڭ نارازىلىعىن تۋدىردى

استانا. قازاقپارات - كورەيا تۇبەگىندەگى جاعداي تاعى دا ۋشىعىپ تۇر. بۇل جولى كورەي حالىقتىق دەموكراتيالىق رەسپۋبليكاسى ەكى بالليستيكالىق زىمىراندى قاتار ۇشىردى.

ولاردىڭ ءبىرى جاپونياعا قاراستى شىعىس تەڭىزىنە قۇلادى.

توكيو مۇنى ۇلتتىق قاۋىپسىزدىككە تونگەن زور قاتەر دەپ اتادى. ال سەۋل پحەنياننان مۇنداي اراڭداتۋ ارەكەتتەرىن توقتاتۋدى تالاپ ەتتى. بالليستيكالىق زىمىراننىڭ كەزەكتى ۇشىرىلۋىن سولتۇستىك كورەيا تاڭەرتەڭگى 8 شاماسىندا جۇزەگە اسىردى. بۇل ايماقتاعى جاعدايدى تۇراقسىزداندىرۋعا جاسالعان سوڭعى ەكى اپتا ىشىندەگى ەكىنشى ارەكەت.

سوندىقتان وڭتۇستىك كورەيا سولتۇستىك كورشىلەرىنىڭ بۇل قيمىلىن ناعىز ارانداتۋ رەتىندە قابىلداپ وتىر.

چون جۋن حي، وڭتۇستىك كورەيانىڭ قايتا بىرىگۋ ىستەرى جونىندەگى مينيسترلىگىنىڭ وكىلى: - سولتۇستىك كورەيانىڭ زىمىران ۇشىرۋى بالليستيكالىق تەحنولوگيانى پايدالانعان كەز- كەلگەن نىسانداردى ۇشىرۋعا تىيىم سالعان ب ۇ ۇ قاۋىپسىزدىك كەڭەسىنىڭ قارارىن بۇزعان بولىپ تابىلادى. ءبىزدىڭ سولتۇستىك كورشىمىز مۇنداي ارەكەتتەرىن جەدەل توقتاتىپ، ءوز حالقىنىڭ حال- اقۋالىن جاقسارتۋعا كوبىرەك كۇش سالادى دەپ ۇمىتتەنەمىز.

وڭتۇستىك كورەيانىڭ قارۋلى كۇشتەرى ءبىر ۋاقىتتا، ورتاشا قاشىقتىققا قولدانىلاتىن ەكى بىردەي «نودون» زىمىرانىنىڭ ۇشىرىلعانىن حابارلادى. ولاردىڭ ءبىرى اۋەگە كوتەرىلگەن بويدا جارىلعان بولسا، ەكىنشىسى جاپونيانىڭ وكا تۇبەگىنەن 250 شاقىرىم جەردە ورنالاسقان اكيتا پرەفەكتۋراسىنداعى شىعىس تەڭىزىنە بارىپ ءتۇستى.

سيندزو ابە، جاپونيانىڭ پرەمەر- ءمينيسترى:

- سولتۇستىك كورەيا ۇشىرعان زىمىراننىڭ جاپونيانىڭ ەكسكليۋزيۆتىك ەكونوميكالىق ايماعى شەكاراسىنداعى تەڭىزگە قۇلاۋى ءبىزدىڭ ەلىمىزدىڭ ۇلتتىق قاۋىپسىزدىگىنە ايتارلىقتاي قاتەر توندىرەدى. مەن بۇۇ قاۋىپسىزدىك كەڭەسىنىڭ قارارىن كوپە- كورنەۋ بۇزىپ وتىرعان سولتۇستىك كورەيانىڭ كەشىرىلمەس ارەكەتىنە قاتاڭ تۇردە قارسىلىعىمدى بىلدىرەمىن. جاپونيا مۇنداي ارەكەتتەرمەن ا ق ش جانە وڭتۇستىك كورەيامەن بىرلەسە وتىرىپ كۇرەسەتىن بولادى. سولتۇستىك كورەيانىڭ زىمىران ۇشىرۋدى جيىلەتۋىن پحەنياننىڭ كورەيا تۇبەگىندە زىمىرانعا قارسى كەشەندەر ورنالاستىرۋ تۋرالى جوسپارعا جاۋابى دەۋگە بولادى. بۇل جولعى ارانداتۋ سەۋل مەن ۆاشينگتون قابىلداعان وسى شەشىمنىڭ دۇرىستىعىن تاعى دا دالەلدەپ بەردى دەپ سانايدى وڭتۇستىك كورەيا بيلىگى. ەل باسشىلارى، امەريكانىڭ پرو جۇيەسى سولتۇستىك كورەيا زىمىراندارىنا قارسى ءتيىمدى قورعانىس قۇرالى بولاتىنىنا سەنىمدى.

www.24.kz