ريوعا بارا الماعان قازاقستاندىق سپورتشىلار - فوتو
دوپينگ داۋى قازاقستانىڭ اۋىر اتليكاسىنا وڭاي سوققى بولمادى. يليا يلين، ءزۇلفيا چينشانلو، سۆەتلانا پودوبەدوۆا، جاسۇلان قىدىربايەۆ، مايا مانەزا، الماس وتەشوۆ رۇقسات ەتىلمەگەن دارىلىك زاتتاردى قولداندى دەگەن ايىپپەن ءتورتجىلدىقتىڭ باستى دوداسىنان الاستالدى.
يليا ءيليننىڭ باسپا ءسوز قىزمەتى حابارلاعانىنداي، اتاقتى اۋىراتلەتىمىز وليمپيادادان قاعىلعاننان كەيىن، ءوزىنىڭ ءبىلىمىن جەتىلدىرىپ، قازاق جانە اعىلشىن ءتىلىن مەڭگەرۋگە كۇش سالۋدا. بۇرىنعىداي جاتتىعۋعا بەلسەندى قاتىسپاعانىمەن، يليا يلين ارا- تۇرا زالعا بارىپ تۇرۋدى دا ۇمىتپايدى.
سپورتتىق مانساپتىڭ بولاشاعى تۋرالى شەشىمدى ول دوپينگتىك داۋعا قاتىستى ءىس اياقتالعاننان سوڭ جاريا ەتىلەدى.
سۆەتلانا پودوبەدوۆانىڭ الەۋمەتتىك جەلىلەردەگى فوتو مەن ۆيدەولارىنا قارايتىن بولساق، ونىڭ كوڭىلدى ەكەنى انىق. ول جاقىندا عانا زىلتەمىر كوتەرىپ، جاتتىعۋعا قىزۋ كىرىسكەن بولاتىن، الايدا بۇگىن انتالياعا دەمالۋعا اتتاندى.
بۇل جاعدايدىڭ ارتى جاقسىلىقپەن اياقتالاتىنىنا ءزۇلفيا چينشانلو دا سەنىمدى. «بارلىعى جاقسى بولادى. ەشتەڭە ءالى بىتكەن جوق!» دەپ جازادى ول ءوزىنىڭ ينستاگراممداعى پاراقشاسىندا.
23 جاستاعى جاسۇلان قىدىربايەۆ تا الماتىدا ءوز جاتتىعۋىن اياقتاعان جوق. «مەن قازىر جاتتىعىپ ءجۇرمىن، بولاشاقتا دا سپورتتان كەتپەيمىن. جەكە دايىندالىپ جاتىرمىن»، - دەدى ول «قازاقپارات» تىلشىسىنە بەرگەن سۇحباتىندا.
بۇنىڭ الدىندا حابارلاعانىمىزداي، ق ر اۋىر اتلەتيكا فەدەراتسياسى ريوعا كەتەتىن قۇراماعا مارگاريتا ەليسەيەۆانى (48 كەلىگە دەيىن)، كارينا گوريچەۆانى (63 كەلىگە دەيىن)، جازيرا جاپپارقۇلدى (69 كەلىگە دەيىن)، ارلي چونتەيدى (56 كەلىگە دەيىن)، فارحات حاركيدى (62 كەلىگە دەيىن)، نيجات راحيموۆتى (77 كەلىگە دەيىن)، دەنيس ۋلانوۆتى (84 كەلىگە دەيىن)، الەكساندر زايچيكوۆتى (105 كەلىگە دەيىن) قوسقان بولاتىن.
تاعى ءۇش قازاقستاندىق جاراقات الىپ، ريو دوداسىنا بارا المايتىن بولدى. قازىرگى ۋاقىتتا ولار ەم الۋدا. ولاردىڭ ىشىندە ق ر تەننيس قۇراماسىنىڭ ءبىرىنشى راكەتكاسى ميحايل كۋكۋشكين دە بار. ول ۋيمبلدون تۋرنيرىندە جاراقات العان ەدى. تەننيس قۇراماسىنىڭ تاعى ءبىر وكىلى يۋليا پۋتينتسيەۆا دا بار. ول كانادانىڭ مونرەال قالاسىندا WTA تۋرنيرىندە يىعىنا زاقىم كەلتىرىپ الدى. وسىلايشا، قازاقستان نامىسىن ريودا تەك ەكى تەننيسشى - گالينا ۆوسكوبويەۆا مەن ياروسلاۆا شۆەدوۆا قورعايدى.
ۆەلوشاباندوز الەكسەي لۋسەنكو بولسا، فرانسيادا جاتتىعۋ بارىسىندا جولدا كولىكپەن سوقتىعىسىپ، قاتتى جاراقاتتاندى. ول بىردەن موناكو اۋرۋحاناسىنا جەتكىزىلگەن. مەديتسينالىق تەكسەرۋ انىقتاعانىنداي، ونىڭ تابانىنا زاقىم كەلىپتى. وعان كەم دەگەندە ءۇش اپتا اياققا سالماق تاستاماۋ قاجەت. ەندى ونى ريو ويىندارىندا اندرەي زەيس الماستىرادى.
