قوستاناي وبلىسىنىڭ تۇرعىنى جول اپاتىنان زارداپ شەككەن ۇلىنا كومەكتەسكەن جاندى ىزدەپ جاتىر

استانا. قازاقپارات - ليساكوۆ قالاسىنىڭ تۇرعىنى قوستاناي وبلىسىنداعى جول اپاتى كەزىندە ءوزىنىڭ ۇلىنا كومەكتەسكەن ادامداردى ىزدەپ جاتىر.

بۇل تۋرالى قازاقستان جاڭالىقتارى حابارلايدى.

«تاراتۋعا كومەكتەسىڭىزدەر! چەليابينسك- ءجىتىقارا باعىتىنداعى اۆتوبۋستىڭ اپاتىنان سوڭ ۇلىمدى اۋرۋحاناعا جەتكىزىپ، ءومىرىن ساقتاپ قالۋعا كومەكتەسكەن ادامداردى ىزدەيمىن. تەك وكسانا دەگەن قىزدىڭ ەسىمىن عانا بىلەمىن. حابارلاسىڭىزدار. ءسىزدىڭ كومەگىڭىزدىڭ ارقاسىندا ۇلىم امان قالدى!»، - دەپ جازدى گالينا كوتەلنيكوۆا.

ءىرى جول اپاتى 27 -شىلدە كۇنى كەشكى ساعات 6 شاماسىندا پريۋرالسك اۋىلىنىڭ ماڭىندا بولعان. «يۆەكو» جۇك كولىگى مەن «كيا گرانبەرد» جولاۋشىلار اۆتوبۋسى سوقتىعىسقان. جول اپاتى ناتيجەسىندە التى ادام قايتىس بولىپ (ۇشەۋى ر ف، ۇشەۋى ق ر ازاماتتارى)، 30 دان اسا ادام جارالاندى. جارالانعانداردىڭ 12 سى رەسەي، 17 سى قازاقستان جانە بىرەۋى تاجىكستان ازاماتى. جاعدايلارىنا بايلانىستى قوستانايداعى وبلىستىق اۋرۋحاناعا 13 زارداپ شەككەن ادام جەتكىزىلگەن.

بۇعان دەيىن جول اپاتىنا ۇشىراعان اۆتوبۋس رەيسىنە كەشىگىپ قالعان ەكى ادام تۋرالى دا جاريالانعان بولاتىن.