قازاقستاندىق سپورتشىلار ريوداعى العاشقى اسەرلەرىمەن بولىسۋدە - فوتو، ۆيدەو
العاشقى ۆيدەولار دا ينتەرنەت كەڭىستىگىندە پايدا بولدى. «قازاقپارات» اگەنتتىگى ءبىزدىڭ سپورتشىلار مەن جانكۇيەرلەردىڭ تۇسىرگەن ۆيدەولاردىڭ توپتاماسىن نازارلارىڭىزعا ۇسىنادى.
سپورتشىلار ينستاگرامداعى پاراقشالارىندا ريوداعى وزدەرىنىڭ العاشقى ۆيدەولارىمەن بولىسۋدە. تەننيسشى گالينا ۆوسكوبويەۆا ريو- دە- جانەيروداعى وليمپيادالىق قالاشىقتى تولىق شولىپ شىققانعا ۇقسايدى. ول قازاقستاندىق قۇرامانىڭ جاتقان جەرىن، تەننيس ورتالىعىن، ءتىپتى وليمپيادا چەمپيونى ەندي ماررەيدىڭ جاتتىعۋ ءساتىن دە جاريالاپ ۇلگەرگەن. دانيار ەلەۋسىنوۆ بولسا، قايرات ەراليەۆپەن، بەرىك ابدراحمانوۆپەن، ادىلبەك نيازىمبەتوۆپەن بىرگە وليمپيادا قالاشىعىندا تۇسكەن بىرلەسكەن فوتونى جۇرت نازارىنا ۇسىندى. ال قازاقستان پالۋاندارى ريولىقتارمەن بىرگە «ولا، برازيل، سالەم، قازاقستان!» اتتى ۆيدەو سالەمدەمە جىبەرىپتى.
ايتا كەتەيىك، قازاقستان نامىسىن قورعاۋعا ەلىمىزدەن 104 سپورتشى اتتاندى. 2016 -جىلعى 3 - تامىزدا قازاقستان رەسپۋبليكاسىنىڭ مەملەكەتتىك تۋىن كوتەرۋ ءراسىمى وتەدى. ال 5 - تامىزدا ХХХІ جازعى وليمپيادا ويىندارىنىڭ اشىلۋ سالتاناتى، 21 - تامىزدا وليمپيادانىڭ جابىلۋ ءراسىمى بولادى دەپ كۇتىلۋدە.
اۆتور: جاسۇلان جولدىبايەۆ 
