جامبىل وبلىسىنداعى جىلقى زاۋىتىندا جۇمىس ىستەۋ جاستار ءۇشىن ابىرويلى بولىپ وتىر - فوتو

تاراز. قازاقپارات - جامبىل وبلىسىنداعى «لۋگوۆوي جىلقى زاۋىتى» ج ش س- دا جۇمىس ىستەۋ اۋىل جاستارى ءۇشىن ابىرويلى بولىپ وتىر.

 ايتا كەتسەك، بۇل كۇندە زاۋىتتا 600 جىلقى جانە تازا قاندى سايگۇلىك بار.

بۇل كۇندە سەرىكتەستىكتە مۇنىمەن قوسا ءسۇت- ەت باعىتىنداعى ۇساق جانە ءىرى مال، قاز- ۇيرەك، بەكىرە بالىقتار وسىرىلۋدە. سونداي- اق اۋىل شارۋاشىلىعى ونىمدەرىن، اتاپ ايتقاندا بيدايدى ساقتاۋ، وڭدەۋ جۇمىستارى اتقارىلۋدا.

 وبلىستىق اكىمدىكتىڭ دەرەكتەرىنە قاراعاندا، » لۋگوۆوي جىلقى زاۋىتى» ج ش س 450 اۋىل تۇرعىنىنا جۇمىس تاۋىپ بەرىپ وتىر. ولاردىڭ ورتاشا ەڭبەكاقىسى 90 مىڭ تەڭگەنى قۇرايدى.

 «قازاقپارات» ح ا ءا تىلشىسىنە » لۋگوۆوي جىلقى زاۋىتى» ج ش س باسشىسى حاليت بازاراليەۆ ايتقانداي، سەرىكتەستىكتە جۇمىسشىلاردىڭ الەۋمەتتىك جاعدايىنا باسا كوڭىل بولىنەدى. كاسىپورىندا تۇرعىن ءۇي ماسەلەسى شەشىلگەن. قازىرگى تاڭدا جۇمىسشىلاردىڭ كىلەڭ كوتتەدجدەن قۇرالعان قالاشىعى سالىنۋدا. ەكى قاباتتى، 350 شارشى مەترلىك بۇل پاتەرلەردە ىستىق جانە سۋىق سۋ بولادى.

«ەگەر شارۋاشىلىقتا 25 جىل جۇمىس ىستەسەڭىز، ءۇيدى جەكەمەنشىككە الا الاسىز»، - دەيدى ح. بازاراليەۆ.

سودان دا بولار كوگەرشىن اۋىلىنىڭ، بۇعان جاقىن ەلدى مەكەندەردىڭ جاستارى ءوز تۋعان جەرىندە ەڭبەك ەتىپ قانا قويماي، الەۋمەتتىك جاعدايلارىن دا تۇزەپ الۋدا.