ريوداعى باسپا ءسوز ورتالىعى تىلشىلەردىڭ كوڭىلىنەن شىقتى - فوتو
قازاقستان جۋرناليستەرى ورنالاسقان ورىن مەن باس باسپا ءسوز ورتالىعىنىڭ اراسىنا اۆتوبۋسپەن ءبىر ساعاتتان استام ۋاقىت جۇرەدى ەكەنبىز. وسىدان- اق، قالانىڭ قانشالىقتى ۇلكەن ەكەنىن اڭعارۋعا بولادى. باسپاءسوز ورتالىعىنىڭ اينالاسىندا ءالى دە جوندەۋ جۇمىستارى ءجۇرىپ جاتىر. ىرگەسىندە شاعىن كولشىك بار ەكەن. اتام قازاق «اقپاعان سۋ ساسيدى» دەپ جاتۋشى ەدى. تۋرا سونداي جاعىمسىز ءيىس بىردەن قولقانى قابادى...
الايدا، باسپا ءسوز ورتالىعىنىڭ ىشىنە كىرگەندە تازا ءارى سالقىن اۋامەن تىنىستايسىڭ. تىلشىلەرگە دە بارلىق مۇمكىندىكتەر جاسالىپتى. قاز- قاتار تىزىلگەن ۇستەلدەردىڭ ۇستىندە كومپيۋتەر قۇرۋلى. وكىنىشكە قاراي ولارعا وتىرا قالعانىڭىزبەن ءتىل تاڭداۋ كەزىندە قازاق ءتىلىن ەمگە تابا المايسىز. سوندىقتان ءوزىڭىز ارقالاپ بارعان كومپيۋتەرىڭىزدى بوس ۇستەلدەرگە قويىپ بارىپ، ءارى قاراي ەڭبەكتەنۋگە تۋرا كەلەدى. ينتەرنەت تەگىن قىزمەت ەتكەنىمەن ونى قوسۋ بارىسى ءبىراز قيىندىقتار ارقىلى ورىندالاتىنىن دا كوردىك. ەسەسىنە ينتەرنەت جۇيەسى وتە جىلدام جۇمىس ىستەيدى ەكەن.
باسپاءسوز ورتالىعىنا ءبىرى كىرىپ، ءبىرى شىعىپ جاتقان قاربالاس تىرلىكتى كورەسىڭ. بىرەۋدى بىرەۋ بىلمەيدى. ءبىراق، كەز- كەلگەن بىرەۋدەن كومەك سۇراي قالساڭ ءوز تىلدەرىندە بارىنشا، ىمداپ بولسا دا جاردەمدەسۋگە كۇش سالادى.
ءبىزدىڭ بايقاعانىمىز، باسپا ءسوز ورتالىعىنىڭ ماڭىنداعى جوندەۋ جۇمىستارى ءالى ءجۇرىپ جاتسا دا، ورتالىق ءار ەلدەن كەلگەن تىلشىلەردىڭ كوڭىلىنەن شىققان سىڭايلى. ىشىندە اقشا ايىرباستاۋ ورتالىعى، اقشا الاتىن بانكومات، تۇستەنەتىن اسحانا سياقتى كەرەك دۇنيەنىڭ بارلىعى قاراستىرىلىپتى.
