الماتىدا بۇرىنعى ترامۆاي تۇراعىنىڭ ورنىنا ءساندى كەڭىستىك جاساۋ بويىنشا بايقاۋ جاريالاندى
ۇيىمداستىرۋشى - «الماتى قالاسىن دامىتۋ ورتالىعى» ا ق. بۇل بايقاۋ «الماتى قالاسىن دامىتۋ-2020» باعدارلاماسىن جۇزەگە اسىرۋ اياسىندا قولعا الىندى.
«مۇنداي ارحيتەكتۋرالىق بايقاۋ قازاقستاندا تۇڭعىش رەت جاريالاندى. ونىڭ بىرەگەيلىگى سول، بۇعان قاتىسۋعا ساۋلەتشىلەرمەن قاتار، ديزاينەرلەر، جارنامالىق اگەنتتىكتەر، شىعارماشىلىق شەبەرحانالار، قوعامدىق ۇيىمدار، ۆولونتەرلار، ساباقتاس ماماندىق يەلەرى، سونداي-اق، شىعارماشىلىق باعىتتاعى جوعارى وقۋ ورىندارىنىڭ ستۋدەنتتەرى شاقىرىلادى. بايقاۋعا ءبىر اۆتور بولىپ تا، توپ بولىپ تا قاتىسۋعا بولادى»، - دەلىنگەن الماتى قالاسى اكىمىنىڭ باسپا ءسوز قىزمەتىنەن.
بايقاۋدى وتكىزۋدەگى باستى ماقسات - بۇرىنعى ترامۆاي دەپوسىنىڭ اۋماعىن اباتتاندىرۋ، كوركەيتۋ بويىنشا ۇزدىك تۇجىرىمدامالىق يدەيالار مەن ەسكيزدىك جوبالاردى انىقتاۋ.
بۇل جەردە ۋربانيستيكا قاعيدالارى - اۋماقتىڭ قالا تۇرعىندارىنا قول جەتىمدىلىگى، جوبانىڭ قورشاعان ورتانىڭ ساۋلەت- لاندشافتىق كەلبەتىنە سايكەستىلىگى ساقتالۋى ءتيىس.
سونداي-اق، جوبادا ەكولوگيالىق ماتەريالدار، قاراپايىم جانە ۇنەمدى كونسترۋكتورلىق شەشىمدەر قولدانىلۋى كەرەك.
بۇعان دەيىن ترامۆاي دەپوسى ماڭىندا تۇراتىن تۇرعىندار اراسىندا ارنايى ساۋالناما جۇرگىزىلدى. سونىڭ ناتيجەسى بويىنشا، تۇرعىنداردىڭ باسىم كوپشىلىگىنىڭ بۇل اۋماقتىڭ قوعامدىق كەڭىستىككە اينالعانىن قالايتىندىعى بەلگىلى بولدى. ياعني، بۇل اۋماق بوس ۋاقىتتى، ءار ءتۇرلى مادەني شارالاردى، كەزدەسۋلەردى وتكىزۋگە بولاتىن قوعامدىق ورىنعا اينالۋى ءتيىس.
كولىك ينفراقۇرىلىمدارىن قايتا جاڭارتۋعا ارنالعان مۇنداي جوبالار نيۋ-يوركتە («حاي- لاين» ساياباعى)، پاريجدە (سەنا وزەنىنىڭ سول جاق جاعالاۋى) جانە باسقا دا قالالاردا جۇزەگە اسىرىلعان.
مۇنداي كوپ ماقساتتى ساياباق جەلتوقسان- ماقاتايەۆ- مۇقانوۆ- جامبىل كوشەلەرى اۋماعىندا جالعىز قوعامدىق كەڭىستىككە اينالۋى مۇمكىن. ويتكەنى، بۇل اۋماققا ەڭ جاقىن گۇل باعى 2 شاقىرىم جەردە ورنالاسقان. ونىڭ ۇستىنە، دەپو اۋماعىنداعى ەسكى عيماراتتاردى ءسۇرىپ تاستاۋعا دەگەن قاجەتتىلىك ازايادى.
بايقاۋ شارتى بويىنشا قاتىسۋشىلار قوعامدىق كەڭىستىكتىڭ ەسكيزدىك جوباسىن، جوبانىڭ سيپاتتاماسى مەن تۇجىرىمداماسىن جانە جوبانىڭ نەگىزدەمەسىن تاپسىرۋلارى كەرەك.
بۇگىننەن باستاپ، almatydc.kz جانە konkurs@cda.kz ەلەكتروندى پوشتاسى بويىنشا وتىنىمدەر قابىلدانا باستادى. الداعى 2-11 -قىركۇيەك ارالىعىندا ونلاين داۋىس بەرىلەدى جانە ساراپتاۋشى كوميسسيا جىبەرىلگەن جۇمىستاردى باعالايدى. بايقاۋ قورىتىندىسى 18 -قىركۇيەكتە شىعارىلادى.
كوميسسيا قۇرامىنا حالىقارالىق ساۋلەتشىلەر مەن ۋربانيستەر ەندى. ولاردىڭ قاتارىندا GehlArchitects ديرەكتورى ريكاردو ماريني جانە دەلفيي تەحنيكالىق ۋنيۆەرسيتەتىنىڭ پروفەسسورى حيۋگو پريمۋس جانە باسقالار بار.
ەگەر قاتىسۋشىعا ەلەكتروندى پوشتا ارقىلى حابارلاما جىبەرىلسە، وندا ونىڭ جىبەرگەن ءوتىنىمى قابىلدانعان بولىپ سانالادى. بارلىق بايقاۋلىق وتىنىمدەر داۋىس بەرۋ ءۇشىن سايتقا جاريالانادى. بايقاۋ ەرەجەلەرى سايتتا جاريالانعان.
اۆتور: ايبوتا جاپپاربەرگەن
