نۇرسۇلتان نازاربايەۆ قانات بوزىمبايەۆپەن تەڭىزدىڭ وندىرىستىك قۋاتتارىن كەڭەيتۋدى تالقىلادى

 استانا. قازاقپارات - مەملەكەت باسشىسى نۇرسۇلتان نازاربايەۆ ەنەرگەتيكا ءمينيسترى قانات بوزىمبايەۆپەن كەزدەسۋ وتكىزدى، دەپ حابارلادى اقوردانىڭ باسپا ءسوز قىزمەتى.

كەزدەسۋ بارىسىندا ق. بوزىمبايەۆ ەلباسىنا مۇناي- گاز، مۇناي- گاز حيمياسى جانە ەنەرگەتيكا سالالارىنداعى دامۋدىڭ نەگىزگى كورسەتكىشتەرى تۋرالى باياندادى، سونداي- اق الداعى كەزەڭگە ارنالعان جۇمىس جوسپارىن حابارلادى.

بۇدان بولەك، مۇناي وڭدەۋ جانە ەنەرگەتيكا ونەركاسىبىندەگى ءىرى ينۆەستيتسيالىق جوبالاردىڭ ىسكە اسىرىلۋ بارىسى، ونىڭ ىشىندە جىل سوڭىنا دەيىن قاشاعان كەن ورنىن قولدانىسقا ەنگىزۋ جوسپارى، تەڭىزدىڭ وندىرىستىك قۋاتتىلىعىن كەڭەيتۋ جانە قاراشىعاناق كەن ورنىنداعى سۇيىق كومىرسۋتەگى ءوندىرىسىن ارتتىرۋ تالقىلاندى.

مەملەكەت باسشىسى جوعارعى دەڭگەيدەگى باسەكەگە قابىلەتتىلىكتى قامتاماسىز ەتۋ جانە ەكونوميكاداعى ەنەرگيا تاسىمالداۋعا ارتىپ وتىرعان قاجەتتىلىكتەردى قاناعاتتاندىرۋ ماقساتىندا وتىن- ەنەرگەتيكا كەشەنىن ودان ءارى دامىتۋ كەرەكتىگىنە نازار اۋداردى. بۇدان بولەك، قازاقستان پرەزيدەنتى ەلدىڭ عىلىمي- تەحنولوگيالىق الەۋەتىن ارتتىرۋ ءۇشىن شارالار قابىلداۋ جانە تومەن كومىرتەكتى دامۋ مەن «جاسىل ەكونوميكاعا» ءوتۋىن قامتاماسىز ەتۋ جونىندە جاعدايلار تۋعىزۋدىڭ ماڭىزدىلىعىن اتاپ ءوتتى.

ەنەرگەتيكا ءمينيسترى بيىل مۇناي ءوندىرۋ كولەمىنىڭ ازداپ ازايۋى الەمدەگى نەگىزگى ەنەرگەتيكالىق رەسۋرستارعا باعانىڭ قۇلدىراۋىمەن بايلانىستى بولىپ وتىرعانىن اتاپ ءوتتى.

- ءبىرىنشى جارتىجىلدىقتىڭ قورىتىندىسى بويىنشا 38,8 ميلليون توننا مۇناي ءوندىرىلدى. ول وتكەن جىلعى وسى كەزەڭنىڭ ءوندىرۋ كولەمىمەن سالىستىرعاندا % 97 قۇرايدى. بيىل جىل سوڭىنا دەيىن ءوندىرۋ كولەمىن 75 ميلليون تونناعا دەيىن ارتتىرۋ جوسپارلانىپ وتىر. سونىمەن قاتار 6,9 ميلليون توننا مۇناي وڭدەلدى، ول بىلتىرعى جىلدىڭ كورسەتكىشىمەن سالىستىرعاندا شامامەن % 5 ارتىق، - دەدى ق. بوزىمبايەۆ.

ەلباسى كەزدەسۋ قورىتىندىسى بويىنشا ءبىرقاتار ناقتى تاپسىرما بەردى.