ريو ساپارىنان: ەل نامىسىن ارقالاعان وليمپياداشىلارمەن ۇشاقتا ەمەن- جارقىن سىرلاستىق
ءبىز وتىرعان ۇشاقپەن وليمپيادادا ەل نامىسىن قورعايتىن گرەك- ريم، دزيۋدو جانە اۋىر اتلەتيكا قۇرامالارى بىرگە ۇشىپ كەلدى. امستەردام اۋە جايىنا قونعاننان كەيىن وسى اتالعان قۇراما سپورتشىلارىمەن ەركىن اڭگىمەلەسىپ، بىرگە سۋرەتكە ءتۇسۋدىڭ دە ءساتى ءتۇستى. ەلدە جۇرگەندە ۇستاتا بەرمەيتىن سپورتشىلار وزگە ەلگە بىرگە اتتانىپ بارا جاتقاننان بولار، جاقىن سىرلاسىپ، ەركىن اڭگىمەلەسىپ، سۇحبات قۇردى.
قازاقتىڭ باس بالۋانى، اتاقتى بالۋان شولاقتىڭ شوبەرەسى نۇرمۇحان تىناليەۆ قانا جۋرناليستەرگە ساراڭ سويلەپ، مەنىڭ «دايىندىق قالاي؟ » دەگەن سۇراعىما: « ءبارىن بوزكىلەم كورسەتەدى. سوندىقتان قازىر ەشتەڭە ايتقىم كەلمەيدى. بۇگىن امان- ەسەن جەتىپ الايىق. سوسىن سويلەسەرمىز» دەپ قىسقا قايىردى اڭگىمەسىن.
ال وزگە سپورتشىلار «الدىن الا ءبارىن كەسىپ- ءپىشىپ ايتۋعا بولمايدى. جەڭىلۋ ءۇشىن ەمەس جەڭۋ ءۇشىن كەلدىك. اللانىڭ باسقا سالعانىن كورەمىز » ، - دەپ اعىنان جارىلىپ، وزىمىزبەن جاقىن تانىسىپ جاتتى. ءتىپتى، سپورتشىلار وزدەرى تانىسىپ، قايسىمىز قاي اقپارات كوزىنەن ەكەنىمىزدى سۇراۋدى دا ۇمىتپادى.
مەنىڭ «قازاقپارات» اگەنتتىگىنەن ەكەنىمدى بىلگەن المات كەبىسبايەۆ تۋىسقانىنا «قازاقپارات» اگەنتتىگىنىڭ ءتىلشىسى بار ەكەن، دەپ، جارىس كەزىندە وسى سايتتى قاراپ وتىرۋدى تاپسىرىپ جاتتى. وسىلايشا ءبىر ۇشاقتا سپورتشىلارمەن ەمىن- ەركىن اڭگىمەلەسۋدىڭ ءساتى ءتۇستى.
باپكەرلەر دە تىلشىلەرمەن جاقىن سويلەسىپ، ءوز ەرىكتەرىمەن سۇحبات بەردى. ول تۋرالى الداعى ۋاقىتتا كەڭىرەك جازاتىن بولامىز. قازىر قىسقاشا توقتالىپ وتەيىك. قازاقستان قۇراماسىنىڭ اعا جاتتىقتىرۋشىسى ، الەم چەمپيونى باقتيار بايسەيىتوۆ تە جىگىتتەرگە سەنىمدى، «بارلىق وقۋ- جاتتىعۋ جيىندارىن تىڭعىلىقتى وتكىزدىك. راس، ءبىز ريوعا ءۇش قانا بالۋان اكەلدىك، ءبىراق، ۇشەۋى دە الەمدىك ساناتتاعى مىقتى سپورتشىلار. جەرەبە ءساتتى بولسا، ۇشەۋى دە جۇلدەگە يە بولادى» - دەيدى.
ال گرەك- ريم كۇرەسىنىڭ باس باپكەرى تاڭات ساعىندىقوۆ تا سان ەمەس ساپاعا جۇمىس جاساعاندارىن ايتتى. قازاق جاستارىنان العاش رەت سامبودان الەم چەمپيونى بولعان قانات بايشولاقوۆتىڭ تۋعان باۋىرى تالعات بايشولاقوۆ ماكسيم راكوۆتىڭ باپكەرى. ماكسيمنىڭ ءوز سالماعىنداعى بارلىق بالۋانداردى ءار ءتۇرلى جارىستاردا جەڭگەنىن ايتىپ، بۇل جولى شاكىرتى جۇلدەمەن قايتادى دەپ سەندىردى ءبىزدى.
ارينە، سوڭعى جىلدارى قازاقستان قۇراماسى سەركەسىنىڭ اناۋ ايتقانداي جولى ونشالىقتى بولمادى. استانادا وتكەن الەم چەمپيوناتىندا ماكسيمنىڭ كوڭىلى قاتتى قۇلازىعانىن بايقاعانبىز. قولىنان كەلگەنىن ايانعان جوق، ءبىراق، كۇرەسى ويىنان شىقپادى. ۇنەمى فورمادا بولۋ مۇمكىن ەمەس، ايتپەسە وسى ماكسيم گۋانجوۋدا وتكەن ازيا ويىندارىندا موڭعول حالقىنا عانا ەمەس ، دۇنيە جۇزىنە ايگىلى بالۋان نايداننىڭ شاڭىن تۋلاقتاي قاعىپ العانىن ءوزىمىز دە كورگەنبىز.
ال استانادان ءبىر ۇشاققا وتىرعان اۋىر اتلەتتەر سان- پاۋلۋعا كەلگەن سوڭ ريوعا بولەك رەيسپەن ۇشىپ كەتتى. لوندوندا قازاق ءانۇرانىن حيتقا اينالدىرعان باپكەردىڭ كوڭىلى الاڭداۋلى ەكەنىن بايقاپ، بىزدەر دە ونى مازالاي بەرمەدىك.
ەندى امستەردام اۋە جايىنداعى سپورتشىلار مەن جۋرناليستەردىڭ رەيس كۇتۋى بارىسىنداعى تۇسىرىلگەن فوتوكورىنىستەردى نازارلارىڭىزعا ۇسىنامىز. 
