نۇرلان نوعايەۆ: اكىمدىك بيۋدجەت قارجىسىن وڭدى- سولدى تاراتاتىن اياز اتا ەمەس

استانا. قازاقپارات - اتىراۋ وبلىسى اكىمدىگى ءماجىلىسىنىڭ وتىرىسىندا كاسىپكەرلىكتى جانە اۋىلشارۋاشىلىق باسقارماسى مەملەكەتتىك قولداۋ ارقىلى قۇرىلعان شارۋاشىلىقتاردا قانشا جۇمىس ورنى اشىلدى دەگەن سۇراققا جاۋاپ بەرە المادى.

ساۋالىنا جاۋاپ الا الماعان ايماق باسشىسى باسقارمالار اراسىندا بايلانىستىڭ جوقتىعىن ايتىپ، قاراماعىنداعىلاردى سوكتى.

 - اشىلعان جۇمىس ورنى تۋرالى اقپاراتتى ءبارىڭىز ءبىلىپ وتىرۋىڭىز كەرەك، - دەدى اكىم. - جاۋاپكەرشىلىكتەن قاشىپ، جۇمىستارىڭىزدىڭ اياسىن شەكتەپ وتىرسىزدار. ءاربىر باسقارما بولەك الەمدە ءومىر ءسۇرىپ جاتقانداي. بيۋدجەتتەن بولىنگەن اقشانىڭ باستى ماقساتى - جۇمىس ورىندارىن اشۋ. كاسىپكەرلىك باسقارماسى اقشانىڭ قالاي جۇمسالىپ جاتقانىن بىلمەسە، جۇمىس ورنىمەن قامتۋ باسقارماسى قانشا جۇمىس ورنىنىڭ اشىلىپ جاتقانىن بىلمەسە، اۋىل شارۋاشىلىق باسقارماسى ءوز الدىنا حابارسىز بولسا، نە ءۇشىن جۇمىس ىستەپ جاتىرمىز؟ ءبىزدىڭ ماقساتىمىز اقشا ءبولۋ ەمەس، جۇمىس ورنىن اشۋ، ەكونوميكانى دامىتۋ. اكىمدىك بيۋدجەت قاراجاتىن وڭدى- سولدى تاراتاتىن اياز اتا ەمەس. بولىنگەن اقشانىڭ قالاي پايدالانىلىپ جاتقانىن قاداعالاۋ كەرەك. باسقارمالار اراسىندا بايلانىس بولسىن، - دەدى نۇرلان نوعايەۆ.

ايماق باسشىسى، ايتىلعانداردى ەسكەرە وتىرىپ، اشىلعان جوبالاردىڭ جۇمىسىن ءجىتى باقىلاپ وتىرۋدى تاپسىردى. سونىمەن قاتار، باسقارمالار اراسىندا تىعىز بايلانىستىڭ بولۋىن قاداپ ەسكەرتتى.

ايتا كەتەلىك، سوڭعى 4 جىلدا اتىراۋ وبلىسىندا اۋىل شارۋاشىلىعىن قارجىلاي قولداۋ قورى ارقىلى جەرگىلىكتى بيۋدجەتتەن 807 ميلليون تەڭگە ءبولىندى. بۇل قارجى شارۋالارعا جىلدىق مولشەرلەمەسى 7 پايىز بولاتىن قايتارىمدى نەسيە تۇرىندە بەرىلدى. ناتيجەسىندە قازىر 163 جوبا ماقۇلدانىپ وتىر.

اۆتور: كەنجەكەي توقتامۇرات قىزى