باتىس قازاقستان وبلىسى يران ەلىمەن ساۋدا- ەكونوميكالىق بايلانىستى جولعا قويماق
ب ق و اكىمىنىڭ باسپا ءسوز قىزمەتىنەن تۇسكەن مالىمەتكە قاراعاندا، دەلەگاتسيا قۇرامىندا مۇنايگاز جانە اۋىل شارۋاشىلىعى سالالارىنداعى ءىرى قازاقستاندىق كومپانيالار وكىلدەرى بولدى.
ساپار بارىسىندا قازاقستاننىڭ يرانداعى ەلشىلىگى تەگەران قالاسىندا بىرنەشە پايدالى جۇزدەسۋ ۇيىمداستىردى. اتاپ ايتقاندا، باتىس قازاقستان وبلىسىنىڭ اكىمى التاي كولگىنوۆ يران يسلام رەسپۋبليكاسى مۇناي ونەركاسىبى جابدىقتارىن وندىرۋشىلەر ۇيىمدارى ديرەكتورلار كەڭەسىنىڭ ءتوراعاسى حاياميا جانە ديرەكتورلار كەڭەسى ءتوراعاسىنىڭ ورىنباسارى ليدەرۆامەن كەزدەستى. وسى شارا اياسىندا ب ق و كاسىپورىندارى مەن يراندىق مۇناي كومپانيالارىنىڭ باسشىلارى دا كەزدەسىپ، وندا باتىس قازاقستان وبلىسىنىڭ مۇمكىندىكتەرى تانىستىرىلىپ، مۇنايگاز سالاسىنا قاتىستى ءبىرقاتار ماسەلەلەر تالقىلاندى.
ساپار بارىسىندا يراننىڭ اۋىل شارۋاشىلىعى، يندۋستريا، شاحتا جانە ساۋدا مينيسترلىكتەرى، ءىرى يراندىق كومپانيالار، مۇناي حيميا ونەركاسىبى قاۋىمداستىعى باسشىلارى جانە وكىلدەرىمەن كەزدەسۋلەر بولدى. وعان قوسا البرۋز پروۆينتسياسىندا بيزنەس- فورۋم بولىپ، وندا ب ق و- نىڭ ءار سالاداعى الەۋەتتى مۇمكىندىكتەرى تانىستىرىلدى.
كەزدەسۋلەر كەزىندە تاراپتار ب ق و مەن يران اراسىنداعى ساۋدا- ەكونوميكالىق، ينۆەستيتسيالىق، كولىك- لوگيستيكالىق ىنتىماقتاستىق ماسەلەلەرىن تالقىلادى.
ساپار سوڭىندا ونەركاسىپ، مۇناي حيميا جانە اۋىل شارۋاشىلىعى سالالارىندا ءبىرقاتار ەكىجاقتى كەلىسىمدەر مەن مەموراندۋمدارعا قول قويىلدى.
ب ق و اكىمى التاي كولگىنوۆتىڭ اتاپ وتكەنىندەي، بيىل ءساۋىر ايىندا ەلباسى يران مەملەكەتىنە رەسمي ساپارمەن باردى. سول كەزدەسۋلەر كەزىندە ساۋدا قارىم- قاتىناسىن دامىتۋ ءۇشىن كاسىپكەرلەرگە ۆيزا بەرۋ ءراسىمىن جەڭىلدەتۋ ماسەلەلەرى قارالدى. سونداي- اق ەكى ەل باسشىلارى اۋىل شارۋاشىلىعى، عىلىم، تەحنولوگيا جانە مادەنيەت سالاسىنداعى ىنتىماقتاستىقتى نىعايتۋ قاجەتتىگىنە نازار اۋداردى. ەندى سول كەلىسىمدەر ناتيجەسىندە ءوڭىرارالىق بايلانىسقا دەن قويىلۋدا.
