ورىستىڭ اتاقتى ەسترادا ءانشىسى بوياۋسىز ءجۇزىن كورسەتىپ، جۇرتتى شۋلاتتى

استانا. قازاقپارات- اللا پۋگاچيەۆا ءوزىنىڭ جاسى مەن قارتايىپ باراجاتقان ءجۇزىن جاسىرۋعا تىرىسقان دا ەمەس. ول قايتا بوياۋسىز ءجۇزىن جاقىننان ءتۇسىرىپ، سىمباتىن انىق كورسەتەتىن اشىق كيىمدەر كيگەندى ۇناتادى.

ءانشى 67 جاسىندا ەش بوياۋسىز ءارى اجىمدەرى كورىنگەن ءجۇزىنىڭ سۋرەتىن ينستاگرام پاراقشاسىنا جۇكتەدى. از عانا ۋاقىتتىڭ ىشىندە ونىڭ تىڭدارماندارى ءانشىنىڭ سۋرەتىنە قاتىستى ءتۇرلى ويلارىن جازدى. ءتىپتى ولاردىڭ اراسىندا پۋگاچيەۆانى كەمسىتكەندەرى دە بولدى.

دەگەنمەن ءانشىنىڭ جاسىن جاسىرماي تۇسكەن سۋرەتىنە جاعىمسىز پىكىر قالدىرعاندارعا قاراعاندا، ونىڭ اشىقتىعى مەن شىنشىلدىعىنا ريزا بولعاندار قاتارى كوپ بولدى.

«وسىنداي اشىق ءارى ەش بوياۋسىز سۋرەتىنىڭىزدى جۇكتەگەنىڭىزگە راحمەت. تۋرا ءبىر جاقىن ادامدارداي سەزىنىپ قالادى ەكەنسىڭ ءوزىڭدى»، «مەن وسى سۋرەتىڭىزگە قاراپ قىزىڭىز كريستينانىڭ سىزگە قاتتى ۇقسايتىنىن ءتۇسىندىم. بوياۋمەن ساحنادا شىققانىڭىزدا مۇنى بايقاۋ قيىن»، «ءجۇزىڭىز جارقىن، ادەمى. باقىتتى بولىڭىز»، «التىن اللا وتە باتىل جانسىز. مەن ءوزىم مۇنداي سۋرەتىمدى جەلىگە جۇكتەي الماس ەدىم. وتە تالانتتى جانسىز» دەگەن سىندى پىكىرلەر كوپ جازىلعان.

Stan.kz

***

اللا بوريسوۆنا پۋگاچيەۆا 1949 -جىلدىڭ 15 - ساۋىرىندە ماسكەۋدە دۇنيەگە كەلگەن. ول - كەڭەستىك جانە رەسەيلىك ەسترادا ءانشىسى، كومپوزيتور- ءانشى، ەسترادالىق رەجيسسەر، پروديۋسەر، كينواكتريسا جانە تەلەجۇرگىزۋشى. 1991 - جىلى كەڭەس وداعىنىڭ حالىق ءارتىسى اتاعىن الدى. 1995 - جىلى ر ف- نىڭ مەملەكەتتىك سىيلىعىنىڭ يەگەرى اتاندى.

 ونىڭ رەپەرتۋارىندا ورىس، اعىلشىن، نەمىس، فرانسۋز، يۆريت، فين، ۋكراين تىلدەرىندەگى 500-دەن استام ءان بولسا، ال ديسكوگرافياسىندا جەكە ورىنداۋىنداعى اندەر جازىلعان 100-دەن اسا كۇيتاباق پەن ديسكىلەر بار ەكەن. رەسەي مەن كەڭەس وداعىنىڭ قۇرامىنا كىرگەن مەملەكەتتەردەن بولەك، پۋگاچيەۆانىڭ البومدارى جاپونيا، كورەيا، شۆەتسيا، فينليانديا، گەرمانيا، پولشا، چەحوسلوۆاكيا، بولگاريا مەملەكەتتەرىندە جارىق كورگەن. ديسكىلەردىڭ جالپى تارالىمى 250 ميلليون دانادان اسادى.

 اللا پۋگاچيەۆا بۇكىلوداقتىق ايگىلىلىككە جەتىپ قانا قويماي، ەۋروپا، ازيا جانە سولتۇستىك امەريكا مەملەكەتتەرىنىڭ حالىقارالىق مۋزىكالىق ساحنالارىندا دا ايگىلى بولدى. بۇگىنگى كۇنى ءانشىنى «پريمادوننا»، «ەسترادا پاتشايىمى»، «رەسەيدىڭ باستى ءانشىسى» دەپ اتايدى. 1976 -جىلدان 1990 -جىلداردىڭ باسىنا دەيىن بۇكىلوداقتىق مۋزىكالىق حيت- پارادتار جۇرگىزگەن ساۋالناما ناتيجەسىندە جىلدىڭ ۇزدىك ءانشىسى رەتىندە مويىندالعان. 1970-1980 -جىلدارداعى شەتەلدىك باسىلىمداردا بىرنەشە مارتە كەڭەستىك ساحنانىڭ №1 جۇلدىزى، «soviet superstar» مويىندالدى.

قازىرگى ۋاقىتتا ءانشى بەلسەندى شىعارماشىلىق قىزمەتتەن الىستاپ، گاسترولدىك ساپارلارعا شىقپايتىنىن جاريالادى. ماكسيم گالكينمەن وتباسىن قۇرعان. ءبىر ۇلى، ەكى قىزى جانە ءۇش نەمەرەسى بار.

surak.szh.kz