اقتوبەدە كورەيا تەحنولوگياسى بويىنشا مەديتسينالىق كلاستەر قۇرىلادى

اقتوبە. قازاقپارات - وبلىس اكىمى بەردىبەك ساپاربايەۆ وڭتۇستىك كورەيانىڭ ىسكەرلىك جانە مادەني ورتالىعى سەۋل قالاسىندا يەنسە ۋنيۆەرسيتەتىنىڭ پرەزيدەنتى كيم ەنگ حاك مىرزامەن كەزدەستى،

  دەپ جازادى «اقتوبە» گازەتى.

1885 -جىلى نەگىزى قالانعان بەدەلدى بۇل وقۋ ورنى ەلدەگى ۇزدىك ۇشتىككە ەنگەن.

تاراپتار كورەيا رەسپۋبليكاسىنىڭ جەتەكشى مەديتسينالىق جانە عىلىمي ورتالىقتارىمەن ءتيىمدى سەرىكتەستىك بايلانىس ورناتۋ جانە دامىتۋ مۇمكىندىكتەرىن، سونىڭ ىشىندە بىرلەسكەن عىلىم جانە تاجىريبەدەگى دەنساۋلىق ساقتاۋ باعدارلامالارىن ازىرلەۋ جولدارىن تالقىلادى.

بەردىبەك ساپاربايەۆ ق ر پرەزيدەنتى نۇرسۇلتان نازاربايەۆتىڭ تاپسىرماسىمەن وڭىردە انا مەن بالا ءولىمىن ەكى ەسە ازايتىپ، تۇرعىندار ءومىرىن 72 جاسقا دەيىن جوعارىلاتۋ بويىنشا شارالار قولعا الىنىپ جاتقانىن جەتكىزدى. اقتوبە وبلىسىندا پەريناتالدى ورتالىق پەن كوپسالالى اۋرۋحانالار جانىندا 15 بوسانۋ بولىمشەلەرى جۇمىس ىستەيدى. وبلىس بويىنشا جىلىنا 20 مىڭ ءسابي دۇنيەگە كەلەدى. سوڭعى ون جىلدا بالا تۋۋ سانى 23 پايىزعا ارتتى.

2008 -جىلى زاماناۋي پەريناتالدى تەحنولوگيالاردى ەنگىزۋ ارقىلى سوڭعى بەس جىل بويىنشا انا ءولىمى كورسەتكىشىن التى ەسەگە، بالا ءولىمىن %33- عا ازايتۋ مۇمكىن بولدى.

«انا مەن بالا دەنساۋلىعىن ساقتاۋ سەكىلدى اسپەكتىلەر بويىنشا جاعدايدى جاقسارتۋ ءۇشىن رەزەرۆ بار. بيىل كورەيا رەسپۋبليكاسىنان العان تاجىريبەنى تولىقتاي جۇزەگە اسىرامىز دەپ سەنەمىز. ءسىزدىڭ ەلدىڭ دەنساۋلىق ساقتاۋ سالاسىنداعى رەفورمالار انا مەن بالا ءولىمىن ازايتۋعا جانە تەك ازيا وڭىرىندە ەمەس، بۇكىل الەم بويىنشا كوشباسشى پوزيتسيادا كورىنۋلەرىڭىزگە ىقپال ەتتى»، - دەپ اتاپ ءوتتى وبلىس باسشىسى كەزدەسۋ بارىسىندا.

كوپشىلىك مويىنداعانداي، وڭتۇستىك كورەياداعى دەنساۋلىق ساقتاۋ سالاسى - ينفورماتيكا مەن بيوتەحنولوگياداعى سوڭعى جەتىستىكتەردى قولدانىپ وتىرعان مەديتسينالىق قىزمەتتەردىڭ ەڭ جوعارعى دەڭگەيى. ەمحانالارى الدىڭعى قاتارلى جابدىقتار جانە زاماناۋي تەحنيكامەن قامتاماسىز ەتىلگەن، بۇل ءوز كەزەگىندە مەديتسينالىق قىزمەتتەردىڭ الەمدىك ستاندارتقا ساي بولۋىنا ىقپال ەتەدى. اۋرۋحانالاردى اككرەديتاتسيالاۋ جانە قاتاڭ باعالاۋ ارقىلى ۇكىمەت تاراپىنان باقىلانىپ وتىراتىن كورەياداعى مەديتسينالىق قىزمەتتىڭ ساپاسىنا كۇمان كەلتىرۋگە بولمايى. كورەيا ماماندارى حالىقارالىق مەديتسينالىق قاۋىمداستىقتا جوعارى باعالانادى.

كەزدەسۋ بارىسىندا بىرلەسە وتىرىپ دەنساۋلىق ساقتاۋ سالاسىنىڭ وكىلدەرىنە شەبەرلىك دارىستەرى مەن سەمينارلار وتكىزىپ، دارىگەرلەر مەن مەدبيكەلەردى دەنساۋلىق ساقتاۋ سالاسىنداعى وزەكتى ماسەلەلەر بويىنشا وقىتۋ تۋرالى كەلىسىمگە قول جەتكىزىلدى.

 «كورەيانىڭ جەتەكشى مەدتسينالىق جانە عىلىمي ورتالىقتارىمەن ءتيىمدى سەرىكتەستىك بايلانىستار ورناتۋ جانە دامىتۋ ارقىلى دەنساۋلىق ساقتاۋ سالاسىندا ىنتىماقتاستىقتا عىلىمي جانە تاجىريبەلىك باعدارلامالار ازىرلەۋگە بولادى. حالىقارالىق ستاندارتتارعا ساي بىرلەسىپ شەبەرلىك دارىستەرى مەن سەمينارلار وتكىزۋ، دارىگەرلەر مەن مەدبيكەلەردى دەنساۋلىق ساقتاۋ سالاسىنىڭ وزەكتى ماسەلەلەرى بويىنشا وقىتۋ ەكى ەلدىڭ ىسكەرلىك جانە گۋمانيتارلىق بايلانىستارىن دامىتۋعا سەپتىگىن تيگىزەدى»، - دەدى ءوڭىر باسشىسى.