ايبەك بەكتۇرعانوۆ: ريو جازعى وليمپياداسىنا ارنالعان سالتاناتتى كيىمدەردى تىگۋ - ۇلكەن مارتەبە - فوتو
بۇل جاعدايدا ورىنداۋشى ءوز ەلىنىڭ بەينەسىن جاسايدى دەۋگە بولادى. ويتكەنى، وليمپيادالىق قۇراما كوماندالاردىڭ سالتاناتتى شەرۋىن بۇكىل الەم حالقى تاماشالايدى ەمەس پە.
بيىل، برازيليانىڭ ريو- دە- جانەيرو قالاسىنا باراتىن قازاقستاننىڭ وليمپيادالىق قۇراما كومانداسىنىڭ سالتاناتتىق كيىمىن «قازلەگپروم- الماتى» ج ش س وتاندىق كاسىپورنى ازىرلەدى.
وسىعان بايلانىستى، «قازاقپارات» ءتىلشىسى اتالمىش كومپانيانىڭ ديرەكتورى ايبەك بەكتۇرعانوۆتان سۇحبات العان ەدى.
اڭگىمە الدىندا ايتا كەتكەن ءجون، سپورتشىلاردىڭ كيىمىنىڭ تۇكپىلىكتى نۇسقاسى 2016 -جىلى 16 - ناۋرىزدا ق ر ۇلتتىق وليمپيادا كوميتەتىنىڭ كەزەكتەن تىس سيەزىندە بەكىتىلگەن.
«ءبىزدى وليمپياداعا قاتىساتىن سپورتشىلارىمىزدىڭ سالتاناتتى شەرۋگە كيەتىن كيىمىن تىگۋ شاراسىنا قاتىسۋعا شاقىردى. بىرنەشە جابدىقتاۋشى بولدى. ءبىز كوميسسيا نازارىنا ءوز ءونىمىمىزدى ۇسىندىق. ءسويتىپ، ناتيجەسىندە تاڭداۋ بىزگە ءتۇستى. بۇل ءبىز ءۇشىن العاشقى تاجىريبە بولدى»، - دەدى كومپانيا باسشىسى.
ونىڭ ايتۋىنشا، كيىمنىڭ تۇپكىلىكتى نۇسقاسىن بەكىتۋ ءراسىمى ۇزاققا سوزىلعان.
«ءبىز كوميسسيا الدىنا بىرنەشە رەت باردىق. العاشىندا ءبىز كيىمدەردىڭ نوبايىن سىزدىق، سوعان قاراپ ءپىشىپ، تىگىپ، كوميسسيا نازارىنا ۇسىندىق. ق ر مادەنيەت جانە سپورت مينيسترلىگى قۇرعان بۇل كوميسسيانىڭ قۇرامىندا وليمپيادا چەمپيوندارى مەن تاۋەلسىز ديزاينەرلەر بولدى. ءارقايسىسى ءوز ۇسىنىستارى مەن تىلەكتەرىن ورتاعا سالدى. ءبىز ايتىلعان ۇسىنىستاردىڭ بارلىعىن ەسكەردىك.
كيىمدەردىڭ نوبايلارىن ءبىزدىڭ جاس دارىندى ديزاينەرلەرىمىز ازىرلەدى. ءتىپتى، كوميسسيا مۇشەلەرى ءبىزدىڭ كاسىپورىنعا كەلىپ، ونىڭ ونىمدەردى شىعارۋ قۋاتتىلىعىن كوردى.
ءبىز كيىمدەردىڭ سىنامالى ۇلگىسىن تىگىپ، وعان ۇسىنىستارعا سايكەس، ءبىرقاتار وزگەرىستەر ەنگىزدىك. ءسويتىپ، ءبىزدىڭ كيىم بارلىعىنا ۇنادى. سالتاناتتى فورمانىڭ كوپتەگەن جيناقتالىمى برازيلياعا جەتكىزىلىپ تە قويىلدى. ەندى، 5 - تامىزدا ءبىزدىڭ سپورتشىلاردىڭ سالتاناتتى شەرۋدەگى كيىمىن تەلەديداردان تاماشالايتىن بولامىز»، - دەدى ايبەك بەكتۇرعان ۇلى.
اڭگىمە بارىسىندا ول شيكىزاتتاردىڭ ساپاسىنا ەرەكشە توقتالدى.
«ءبىز تەك جاقسى شيكىزاتپەن جۇمىس جاسايمىز. ويتكەنى، بۇل ەل بەدەلى سىنعا تۇسەتىن جاۋاپتى جوبا عوي. سوندىقتان، وعان مۇقيات دايىندالدىق. شيكىزاتتىڭ بارلىق نارىقتارىنا بارلاۋ جاسادىق. اقىر سوڭىندا كيىمگە يتاليالىق ەڭ جوعارى ساپالى ماتالاردى قولداندىق. ول وتە جاعىمدى ءارى ىڭعايلى. دايار ۇلگىنى يتاليالىق مودەلدەر نەگىزىندە ءوزىمىز ازىرلەدىك»، - دەدى ول.
«مەن تاعى دا قايتالاپ ايتامىن، بۇل ءبىز ءۇشىن ەل بەدەلى سىنعا تۇسكەن جاۋاپتى جوبا. ءبىز ۇلتتىق قۇراما كوماندامىزدىڭ شەرۋدە ادەمى بولىپ كورىنگەنىن قالادىق. سول ءۇشىن ءاربىر سپورتشىعا ارناپ، ونىڭ بويىنا لايىقتى ەتىپ، جەكە- جەكە كيىم تىگىلدى.
بۇل جەردە ءبىراز قيىندىقتارعا دۋشار بولدىق. ويتكەنى، سپورتشىلاردىڭ جاتتىعۋدان قولدارى بوسامايدى، كەيبىرى ءتىپتى شەت ەلدەردە ءجۇردى. سول ءۇشىن ءبىزدىڭ ماماندار كيىمدەردى شاقتاۋ ءۇشىن كەيدە سپورتشىلارعا وزدەرى بارىپ ءجۇردى. بارلىعىنىڭ كوڭىلدەرىنەن شىعۋعا تىرىستىق. بۇگىنگى تاڭدا رەنجىگەن ەشكىم جوق، كيىمدەر بارلىعىنا ۇنادى. ولار وسى كيىمدە ەلباسىمەن كەزدەستى. مەملەكەت باسشىسىنا دا سپورتشىلاردىڭ كيىمى ۇنادى. ءبىز بارلىق وليمپيادالىق شەرۋلىك كيىمنىڭ 234 جيناقتاماسىن تىگىپ، دايىنداپ قويدىق»، - دەدى ايبەك بەكتۇرعانوۆ.
ول مۇنداي تاپسىرىستاردى ورىنداۋ ۇلكەن مارتەبە ەكەندىگىن دە جەتكىزدى.
«بۇل ءبىز ءۇشىن ۇلكەن ابىروي ءارى مارتەبە. ءبىزدىڭ كومپانيا قانشا ايتقانمەن ۇلكەن ەمەس قوي. ول ەندى بەلگىلى بولىپ كەلەدى. اسىرەسە، نۇرسۇلتان نازاربايەۆ بىزگە كەلگەننەن كەيىن، تانىمال بولا باستادىق. ەلباسىنا ءبىزدىڭ كوستيۋمدەر ۇنادى. ەندى ءبىز وسى سەنىم ۇدەسىنەن شىعۋعا كۇش سالىپ جاتىرمىز. ءبىزدىڭ كومپانيادا ىستەيتىن مامانداردىڭ 80 پايىزى - جاستار. ولاردىڭ بارلىعىنىڭ جوعارى ءبىلىمى بار، جاڭا ادىستەردى تەز مەڭگەرەدى، كۇن سايىن تاجىريبەلەرىن مولايتىپ جاتىر. ەندى، قۇداي قالاسا، جاقىن بولاشاقتا باسقا الەمدىك كومپانيالارمەن يىق تىرەستىرە الامىز دەپ ويلايمىن.
ءبىز زامان تالاپتارىنان قالىس قالعىمىز كەلمەيدى. مىنا جوبانى ويداعىداي جۇزەگە اسىردىق.
كەز كەلگەن كاسىپكەر شىعىن اكەلەتىن ىسكە بارمايدى. ءبىز دە جاسىراتىنى جوق، وسى جوبا ارقىلى بەلگىلى ءبىر مولشەردە تابىس تاپتىق. ەسەسىنە، لايىقتى ءونىم شىعاردىق»، - دەدى ول.
«قازلەگپروم- الماتى» ج ش س ديرەكتورى سونىمەن قاتار، كاسىپورىننىڭ الداعى جوسپارلارى مەن وسى فابريكادا تىگىلەتىن كوستيۋمدەردىڭ باعاسىنا توقتالدى.
«بارلىعى شيكىزاتقا بايلانىستى. ەگەر، تاپسىرىس بەرۋشى ماتەريالدىڭ قىمبات بولعانىن قالايتىن بولسا، مىسالى يتاليالىق ماتادان تىگىلگەنىن قالاسا، ونداي كوستيۋمنىڭ باعاسى - 100-150 مىڭ تەڭگە كولەمىندە بولادى. ال، تۇركيالىق ماتادان تىگىلگەن كوستيۋم - 50-70 مىڭ تەڭگەگە باعالانادى.
ءبىزدىڭ ونىمدەر ازىرگە ءبىر دۇكەندە عانا ساتىلادى. ەندى استانا قالاسىندا جانە وبلىس ورتالىقتارىندا دا دۇكەندەر اشۋدى جوسپارلاپ وتىرمىز. مەن نەگىزى جۇمىس ورنىن اشاتىن كەز كەلگەن وتاندىق ءوندىرۋشىنى قۇرمەت تۇتامىن. جەڭىل ونەركاسىپ - بۇل الەۋمەتتىك ماڭىزى وتە جوعارى سالا. ويتكەنى، بۇل سالادا دا قاراپايىم قازاقستاندىقتار جۇمىس ىستەدى. ولاردىڭ ءارقايسىسىنىڭ وتباسى بار. سوندىقتان، قازاقستاندىقتاردى جۇمىسپەن قامتيتىن كاسىپورىنداردى قاشاندا قولداۋ قاجەت. ءبىز بىرتىندەپ، ءوزىمىز دە جاڭادان تاۋار جاسايتىن دارەجەگە كوتەرىلىپ جاتىرمىز.
ءبىزدىڭ كاسىپورىن ءالى تولىعىمەن وتەلىمدىلىك دەڭگەيىنە شىققان جوق. باستاپقىدا قوماقتى قارجى جۇمسالدى. ءبىراق، قول قۋسىرىپ وتىرعان ءبىز جوق. قولىمىزدان كەلگەنىنشە قاراجات تاۋىپ جاتىرمىز.
بۇل جەردە كوپ نارسە باسشىلىقتىڭ بىلىكتىلىگىنە دە بايلانىستى شىعار دەپ ويلايمىن» ، - دەدى ا. بەكتۇرعانوۆ.
اڭگىمە سوڭىندا ايبەك بەكتۇرعانوۆ سپورتشىلارىمىزعا وليمپيادا ويىندارىندا ساتتىلىك تىلەدى.
انىقتاما: «قازلەگپروم- الماتى» ج ش س 2013 -جىلى ىسكە قوسىلعان.
قازىر كاسىپورىندا ءبىر مەزەتتە 12 سەح جۇمىس ىستەيدى.
قىزمەتكەرلەردىڭ سانى 450 ادامنان اسادى. كومپانيادا كويلەك، شالبار، اياق كيىم، كۋرتكا، كوستيۋم، ارناۋلى كيىمدەر جانە باسقا دا كيىمدەردىڭ كوپتەگەن تۇرلەرى تىگىلەدى.
كومپانيادا ەكى باعىت: تىگىن جانە اياق كيىم ءوندىرىسى بىرىكتىرىلگەن. بۇل قازاقستان ءۇشىن سيرەك كەزدەسەتىن جاعداي.
ال، شيكىزاتتار تۇركيادان، رەسەيدەن، قىتايدان، يتاليادان، پورتۋگاليادان جانە يسپانيادان جەتكىزىلەدى.
