اللا جىبەرمەك بولعان ءۇش ءتۇرلى بالە

استانا. قازاقپارات - مۇسا پايعامباردىڭ قاۋىمى ناداندىقپەن كۇنالى ىستەردى كوپ جاساپ، اللانىڭ الدىندا ايىپتى بولادى.

اللا تاعالا ولارعا نارازى بولىپ، مۇساعا:

- ءاي، مۇسا، قاۋىمىڭا ەسكەرت. ءۇش ءتۇرلى بالە جىبەرەمىن. بىرەۋىن تاڭداسىن. ءبىرىنشىسى - زۇلمات اشارشىلىق، ەكىنشىسى - ىندەت، ءۇشىنشىسى - ەلدىڭ ىنتىماعىن جويىپ، ءبىر-بىرىمەن الاۋىز قىلامىن. بىرەۋىن تاڭداپ، ءۇش كۇننەن سوڭ جاۋابىن بەرىڭدەر، - دەدى.

مۇسا ەلىنە كەلىپ، اللانىڭ قارالى حابارىن جەتكىزەدى. ەل- جۇرت مىنانى ەستىگەندە، توبەلەرىنەن جاي تۇسكەندەي بولدى. اقساقالدار جينالىپ، كەڭەس قۇردى. ەسەڭگىرەپ قالعان اقساقالدار العاشىندا الاۋىزدىقتى تاڭدادى. «قۇداي اشارشىلىق پەن ەمى جوق اۋرۋدان ساقتاسىن» دەپ شۋلاستى. سول كەزدە ءبىر ابىز:

 -  اللا اشارشىلىق جىبەرسە، ءبارىمىز قىرىلىپ قالماسپىز. تالقانى تاۋسىلعاندار تاعدىرىن اللاعا تاپسىرسىن. ءتىرى قالعاننىڭ تۇقىمى تىرىلەر، ورنىندا بار وڭالار. ىندەت جىبەرسە دە، اللا بارلىعىمىزدى تۇگەل قىرمايتىن سىڭايلى. ءبارىبىر قارتتاردىڭ ءبارى ولەدى، جاستاردىڭ اجالدىسى ولەدى. الاۋىز بولساق، بالەدەن كوز اشپايمىز. وتباسى الا بولسا، كەرەگە باسى سايىن ءبىر بالە دەگەن! ەل ءىشى الا بولسا، جاۋ شاپپاي-اق، داۋىل تۇرماي- اق قۇريمىز. جيعان مالىڭ ۇستاعاننىڭ قولىندا، تىستەگەننىڭ اۋزىندا كەتەدى.  ۇلىمىز قۇل بولار، قىزىمىز كۇڭ بولار. سانىمىز از بولساق تا، ساز بولىپ، جۇمىلعان جۇدىرىقتاي ءبىراۋىزدان اللا قالاعان ەكى اپاتتىڭ ءبىرىن قارسى الىپ، توزەيىك. بەتەگە كەتسە بەل قالار، بەكتەر كەتسە ەل قالار، بەرەكەڭ كەتسە نەڭ قالار؟ -  دەپ توقتاۋ سالدى. سوندا عانا اقساقالدار ەس جيناپ، وسى بايلامعا توقتاپتى. مۇسا قاۋىمىنىڭ تاڭداۋىن اللاعا جەتكىزدى.

ۇلىق اللا:

- قاۋىمىڭ دۇرىس تاڭداۋ جاسادى. ەلدىڭ بىرلىگى مەن ىنتىماعىن تاڭداعانى ءۇشىن مەن ولاردى كەشىردىم. ەندى ەشقانداي اپات جىبەرمەيمىن، - دەدى.

وسىدان باستاپ حالىق اراسىندا «ەلدىڭ ىنتىماعىن ويلاماعان ادام اللانى ءبىر دەپ تانىمايدى!» دەگەن ءتامسىل ءسوز تاراپتى.

degdar.kz