فرانسيادا جاعاجايعا ۇلكەن سومكە الىپ كەلۋگە تىيىم سالىنادى

استانا. قازاقپارات - فرانسيانىڭ كانن قالاسىنىڭ باسشىلىعى جاعاجايلارعا كولەمى ۇلكەن سومكە، چەمودان جانە پاكەت الىپ كەلۋگە تىيىم سالدى، دەپ حابارلايدى 24.kz تەلەارناسى.

بۇل - قاۋىپسىزدىك ءۇشىن قابىلدانعان شارا. ويتكەنى ولاردىڭ ىشىنە قارۋ-جاراق، بومبا جانە وزگە دە قاۋىپتى زاتتار سالىنۋى مۇمكىن دەگەن كۇدىك بار. ەندى جاڭا ەرەجە 31 -قازانعا دەيىن كۇشىن جويمايدى.

- بىزگە وسىنداي شارا قابىلداۋعا تۋرا كەلدى. وسىلايشا، پوليتسەيلەر كۇدىكتى جاعداي تۋىنداعاندا، سوت شەشىمىن نەمەسە وردەردى كۇتپەي-اق، لەزدە ارەكەت ەتە الادى. ءبىزدىڭ باستى ماقساتىمىز - تۇرعىندار مەن قالا قوناقتارىنىڭ قاۋىپسىزدىگىن قامتاماسىز ەتۋ، - دەيدى كانن قالاسىنىڭ ءمەرى دەۆيد ليسنارد.

ەستەرىڭىزدە بولسا، 14 -شىلدەدە فرانسيانىڭ نيتستسا قالاسىندا جۇك كولىگىن تىزگىندەگەن ەر ادام وتشاشۋدى تاماشاۋلاعا جيىلعان ءبىر توپ كىسىنى قاعىپ وتكەن ەدى. سالدارىنان 84 ادام اجال قۇشىپ، تاعى 300 گە جۋىعى جارالانعان بولاتىن.

 

فوتو: ru.rfi.fr