وڭتۇستىك كورەيادا تاتۋلاستىرۋ جانە ايىقتىرۋ قورى اشىلدى

استانا. قازاقپارات - جۇمىسىن باستاعان ۇيىم ەكىنشى دۇنيەجۇزىلىك سوعىس كەزىندە جاپونيادا جەزوكشەلىكپەن اينالىسۋعا ماجبۇرلەنگەن ايەلدەرگە كومەك بەرۋدى كوزدەيدى.

بىلتىر رەسمي توكيو وسى قىلمىسقا قاتىستى جاۋاپكەرشىلىكتى موينىنا العاننان كەيىن قور قۇرۋ تۋرالى كەلىسىم جاسالعان بولاتىن. جاپونيا وسى ماقساتقا 9,5 ميلليون دوللار قارجى بولەدى. وڭتۇستىك كورەيا ۇكىمەتىنىڭ مالىمەتىنشە، قازىر بايىرعى جەزوكشەلەردىڭ ورتا جاسى 89 دا. رەسمي تۇردە كۇڭدىكتە وتكەنىن مويىنداعان 238 ايەلدىڭ بۇگىندە قىرقىنىڭ عانا كوزى ءتىرى. كەيبىر تاريحشىلاردىڭ مالىمدەۋىنشە، وسى قىلمىستان 200 مىڭنان اسا ايەل زارداپ شەككەن.
كيم تە حەن، «تاتۋلاستىرۋ مەن ايىعۋ قورىنىڭ» ءتورايىمى:

- بۇل قور وسى ايەلدەردىڭ ابىرويى مەن نامىسىن ساقتاۋعا ارنالعان. ءبىز قانداي دا ءبىر وزگە ماقساتتارعا قارجىنى جۇمسامايمىز جانە ونداي مۇمكىندىگىمىز دە جوق.

قوردىڭ قۇرىلۋىنا بايلانىستى باسپا ءسوز ماسليحاتى باستالار الدىندا جيىرما شاقتى ستۋدەنت قىز ساحناعا شىعىپ، نارازىلىق شاراسىن وتكىزدى. ولار جاپون اسكەريلەرى جاساعان قىلمىستان زارداپ شەككەندەرگە لايىقتى وتەماقى تولەۋدى تالاپ ەتكەن. سونداي-اق قور قۇرۋعا اقشا الىپ، جاپونيامەن داۋلى وسى ماسەلەنى شەشۋگە تىرىسقان وڭتۇستىك كورەيا ۇكىمەتىن ايىپتادى.

www.24.kz