قوستانايلىق ساربازدار ەلىمىزدىڭ تۇكپىر-تۇكپىرىندەگى اتا-انالارىمەن بايلانىسقا شىقتى - فوتو

استانا. قازاقپارات - قازاقستاننىڭ ءاربىر وڭىرىنەن ۇلتتىق ۇلان قاتارىنا شاقىرىلعان ساربازدار ونلاين- رەجيمدە اتا- انالارىمەن بايلانىسقا شىقتى.

بۇل شارا قوعامدىق ءتارتىپ اسكەرىندە ءوتىپ جاتقان «جاۋىنگەرلىك جانۇياداي ۇيىسقان، ۇلتتىق ۇلان - ەلى مەن حالقىنا قورعان!» اتتى اكسيا اياسىندا ءوتىپ جاتىر.

ۇلتتىق ۇلان باسپا ءسوز قىزمەتىنىڭ حابارلاۋىنشا، 2016 -جىلعى 29 -شىلدە كۇنى بايلانىسقا العاش بوپ اسكەري قىزمەتكە قوستاناي وبلىسىنان شاقىرىلعان ساربازداردىڭ اتا- انالارى قوسىلدى. 100 دەن اسا اكە مەن انا ق ر ۇلتتىق ۇلانىنىڭ قوستاناي قالاسىنداعى 6697 اسكەري بولىمىنە كەلىپ، ساربازداردىڭ ومىرىمەن، تۇرمىستىق جاعدايىمەن تانىستى.

شاراعا ۇلتتىق ۇلان باس قولباسشىسىنىڭ تاربيە جانە الەۋمەتتىك- قۇقىقتىق جۇمىستار جونىندەگى ورىنباسارى گەنەرال- مايور مۇحامەتقالي ساتوۆ، قوستاناي گارنيزونىنىڭ اسكەري پروكۋرورى، وبلىستىڭ قورعانىس ىستەرى جونىندەگى دەپارتامەنت باستىعى، سونىمەن قاتار 2015 -جىلعى جەلتوقسان مەن 2016 -جىلعى ماۋسىمدا قوستاناي وبلىسىنان شاقىرتىلعان جاۋىنگەرلەردىڭ جاقىندارى قاتىستى.

كورسەتىلگەن ۋاقىت ارالىعىندا وبلىستان ۇلتتىق ۇلانعا اسكەردىڭ قىر- سىرىن مەڭگەرۋ ءۇشىن بارلىعى 600 دەن اسا جاس وركەن اتتانعان.

وتكەن اپتادا ۇلتتىق ۇلاندا باستاۋ العان «جاۋىنگەرلىك جانۇياداي ۇيىسقان، ۇلتتىق ۇلان - ەلى مەن حالقىنا قورعان!» اتتى اكسيا اياسىندا اسكەري- پاتريوتتىق باعىتتاعى كوپتەگەن ءىس-شارالار وتكىزۋ جوسپارلانىپ وتىر. سونىڭ ءبىرى، بۇگىنگى جوبا - ۇلتتىق ۇلان باسشىلىعى مەن اسكەري ءبولىم جەتەكشىلەرىنىڭ سارباز اتا- انالارىمەن كەزدەسۋى جانە ولارعا پەرزەنتتەرىنىڭ اسكەري بورىشىن قانداي جاعدايدا وتكەرىپ جاتقاندىعىن ءوز كوزدەرىمەن كورۋگە جاسالعان مۇمكىندىك.

كەزدەسۋ بارىسىندا اتا-انالار الدىندا ۇلتتىق ۇلان باس قولباسشىسىنىڭ تاربيە جانە الەۋمەتتىك- قۇقىقتىق جۇمىستار جونىندەگى ورىنباسارى گەنەرال- مايور مۇحامەتقالي ساتوۆ ءسوز سويلەپ، قوعامدىق ءتارتىپ اسكەرىنىڭ جاۋىنگەرلىك قىزمەتى مەن اتقاراتىن مىندەتتەرى جايلى ءتۇسىندىرىپ، كوپشىلىكتىڭ كوكەيىندە جۇرگەن ساۋالدارىنا جاۋاپ بەردى. سونداي- اق، قوناقتاردىڭ نازارىنا بالالارىنىڭ سالەمدەمەسى جولدانعان بەينەجازبالار ۇسىنىلىپ، پەرزەنتتەرى قىزمەت اتقارىپ جاتقان اسكەري بولىمنەن تىكەلەي حابارلاسۋعا مۇمكىندىك تۋدى. تاعى ءبىر ايتا كەتەرلىگى، شارادا ۇلتتىق ۇلاننىڭ اسكەري بولىمدەرىندەگى ايەلدەر كەڭەسىنىڭ كونتاكتىلەرى بەرىلدى، ەندى اتا- انالار وسى نومىرلەر ارقىلى الداعى ۋاقىتتا ۇلدارىنىڭ قىزمەتى قالاي ءوتىپ جاتقانىن وزدەرىنەن بىلە الادى.

مۇنان بولەك، اتا- انالارعا اسكەري بولىمگە ەكسكۋرسيا ۇيىمداستىرىلدى، ياعني ولار ءبولىم اۋماعىن، ساربازداردىڭ جاتىن ورنىن، اسحاناسىن، مەديتسينالىق لازارەتىن كورىپ، قارۋ-جاراق جانە تەحنيكاسىن تاماشالادى.

ايتا كەتەيىك، بۇل شارا قازاقستان قارۋلى كۇشتەرى اراسىندا العاش رەت وتكىزىلىپ وتىر. تامىز باسىندا اتالمىش ەستافەتانى اسكەرگە اقمولا وبلىسىنان شاقىرىلعان ساربازداردىڭ اتا- انالارى جالعاستىرماق. جىلدىڭ سوڭىنا دەيىن وسى تەكتەس كەزدەسۋلەردى ۇلتتىق ۇلاننىڭ بارلىق اسكەري بولىمدەرىندە وتكىزۋ جوسپاردا بار.