تۇركيا ەلشىسى قازاق- تۇرىك ليتسەيلەرىنە قاتىستى پىكىر ءبىلدىردى

استانا. قازاقپارات - قازاق- تۇرىك ءبىلىم بەرۋ مەكەمەلەرىنە تۇركيانىڭ ەش قاتىسى جوق.

بۇل تۋرالى تۇركيانىڭ قازاقستانداعى توتەنشە جانە وكىلەتتى ەلشىسى نەۆزات ۋيانىك ءمالىم ەتتى.

«قازاقستان مەن تۇركيانىڭ رەسمي بيلىگىنىڭ قولداۋىمەن اشىلعان جالعىز ءبىلىم ورداسى بار، ول - وڭتۇستىك قازاقستان وبلىسى تۇركىستان قالاسىندا ياسساۋي اتىنداعى قازاق-تۇرىك ۋنيۆەرسيتەتى. قازاقستاندا قازاق-تۇرىك اتاۋى بار ءبىلىم مەكەمەلەرى تۇركيانىڭ رەسمي بيلىگىنە تۇك قاتىسى جوق. ولاردىڭ قىزمەتىنە قاتىستى بارلىق شەشىمدەرمەن قازاقستاننىڭ قۇزىرلى ورگاندارى، قازاقستاننىڭ ءبىلىم جانە عىلىم مينيسترلىگى اينالىسادى»، - دەپ اتاپ ءوتتى ول.

ونىڭ ايتۋىنشا، قازاق-تۇرىك ليتسەيلەرىنىڭ ىشكى ماسەلەلەرىمەن قازاقستان بيلىگى اينالىسادى جانە ەلشىلىك ولاردىڭ جۇمىسىنا قاتىستى ماسەلەلەردى تالقىلاي المايدى. دەگەنمەن ونىڭ ءسوزى بويىنشا، تۇركيادا بۇلىك جاساۋشى لاڭكەستىك ۇيىمنىڭ تامىرى بارشا الەمگە تاراپ وتىر. «ولار حالىقتىڭ اقشاسىنا ساتىپ الىنعان تانكتەرمەن، ۇشاقتارمەن مەملەكەتتى باسىپ الماق بولدى. تۇركياداعى توڭكەرىس 30 جىل بويى ۇيىمداستىرىلعان. ولار وتە قاۋىپتى ەكەنى انىق. سوندىقتان ولاردىڭ تامىرى جايىلعان مەملەكەتتەر وسىنى ەسكەرۋى ءتيىس»، - دەدى ەلشى مىرزا.

ايتا كەتەيىك، 15 -شىلدە كۇنى ىستامبۇلدا اسكەري بۇلىك ورىن الىپ، 200 دەن استام بەيبىت ازامات قازا تاپتى. قازىرگى ۋاقىتتا 10 مىڭنان استام بۇلىكشى ۇستالدى، بۇلىك بارىسىندا ولاردىڭ 100 گە جۋىعى ءولتىرىلدى. بۇل كوتەرىلىسكە «تۇرىك قارۋلى كۇشتەرىنە ەنىپ العان فەتحۋللاحشىل لاڭكەستىك ۇيىمى ۇيىمداستىردى» دەپ جاريالاندى.

وسىعان وراي، قازاقستاندا قوعام اراسىندا KATEV قورىمەن قۇرىلعان قازاق- تۇرىك ليتسەيلەرىنىڭ تاعدىرى تاقىرىبى قىزۋ تالقىعا تۇسە باستادى.

 اۆتور: جاسۇلان جولدىبايەۆ