قازاقستاننىڭ وليمپيادالىق فورماسى العاشقى نۇسقاسىنان نە سەبەپتى وزگەردى؟
قازاقستان سپورتشىلارى ريو- دە- جانەيرو وليمپياداسىنا جاڭا ۇلگىدەگى فورمامەن بارادى. ناۋرىز ايىندا بەكىتىلگەن فورما پايدالانىلمايدى.
«وليمپياداعا ارنالعان فورما وليمپيادا قارساڭىندا وزگەرە سالعان جوق. ءبىز ءبىرىنشى رەت ناۋرىز ايىندا العاشقى نۇسقاسىن تانىستىردىق. وندا كوپتەگەن ادامدار الەۋمەتتىك جەلى ارقىلى دا، بايلانىس تەلەفوندارىمەن دە ول ۇلگىنىڭ ۇنامسىز ەكەنىن ايتىپ جاتتى. ءبىز سول كەزدە بۇل تۇپكىلىكتى نۇسقا ەمەس ەكەنىن، اركىمنىڭ پىكىرىنە قاراپ، ءالى دە وزگەرىستەر بولاتىنىن ايتقان ەدىك. وزدەرىڭىز كورىپ جاتقانداي فورمانىڭ ءتۇسى وزگەردى. باسقا وزگەرىپ كەتكەن ەشتەڭەسى جوق. ءتۇسىن وزگەرتۋدەگى ماقساتىمىز - ءبىرىنشى كەزەكتە ءبىز ءوزىمىزدىڭ ءداستۇرلى تۇستەرىمىزگە باسىمدىق بەردىك. سوندىقتان كيىم تۋىمىزبەن تۇستەس. ەكىنشىدەن، اشىق تۇستەر قازاقستاننىڭ باستى سانيتار دارىگەرىنىڭ ءوتىنىشى بويىنشا بەكىتىلدى. سەبەبى بۇل برازيلياداعى زيكا ۆيرۋسىنىڭ الدىن الۋ. اشىق تۇستەن اۋرۋ تاراتاتىن ماسالار مەن جاندىكتەر سپورتشىنىڭ كيىمىنە قونعاندا تەز كورىنەدى. بۇل جاعى دا باستى نازاردا بولدى»، - دەدى ول.
ەستەرىڭىزگە سالا كەتەيىك، ناۋرىز ايىندا فورمانىڭ العاشقى ۇلگىسىن تانىستىرعاندا جەرگىلىكتى جانكۇيەرلەر تارتىمسىز ەكەنىن ايتىپ، وزگەرتۋىن سۇراعان بولاتىن.
فورمانىڭ العاشقى نۇسقاسى:
فورمانىڭ قازىرگى نۇسقاسى:
اۆتور: كۇنسۇلتان وتارباي
