قىتاي مەن رەسەي داۋلى تەڭىزدە اسكەري جاتتىعۋ وتكىزبەك

استانا. قازاقپارات - قىتاي مەن رەسەي قىركۇيەكتە وڭتۇستىك قىتاي تەڭىزىندە «جوسپارلى» اسكەري- تەڭىز كۇشتەرى جاتتىعۋىن وتكىزبەك. قىتاي قورعانىس مينيسترلىگىنىڭ حابارلاۋىنشا، جاتتىعۋ اسكەري ىنتىماقتاستىقتى كۇشەيتۋ ءۇشىن وتكىزىلمەك.

جاتتىعۋ وڭتۇستىك قىتاي تەڭىزى ايماعىنىڭ تەرريتوريالىق مارتەبەسىنە قاتىستى داۋ كۇشەيگەن تۇستا وتەيىن دەپ وتىر. وسى ايدا گااگاداعى حالىقارالىق سوت قىتاي وڭتۇستىك قىتاي تەڭىزىندەگى وزىنە تيەسىلى دەپ سانايتىن داۋلى ارالدارعا يە بولۋعا تاريحي قۇقىعى جوق دەگەن شەشىم شىعارعان. ءبىراق پەكين گااگا سوتىنىڭ بۇل شەشىمىن مويىنداماعان. ال رەسەي پەكيننىڭ بۇل ماسەلەگە قاتىستى فيليپپينمەن جانە باسقا دا كورشىلەرىمەن داۋىندا قىتايدى قولداپ شىققان.

«بۇل - ەكى ەل قارۋلى كۇشتەرى اراسىنداعى قىتاي- رەسەي ستراتەگيالىق ىنتىماقتاستىعىن دامىتۋعا ارنالعان ادەتتەگى جاتتىعۋ. جاتتىعۋ ءۇشىنشى ءبىر ەلگە قارسى باعىتتالماعان» دەپ حابارلادى قىتاي قورعانىس مينيسترلىگىنىڭ رەسمي وكىلى يان يۋيتسزيۋن.

وتكەن جىلى قىتاي مەن رەسەي جاپون تەڭىزى مەن جەرورتا تەڭىزىندە بىرلەسكەن اسكەري جاتتىعۋ وتكىزگەن.

ا ق ش مەملەكەتتىك دەپارتامەنتىنىڭ رەسمي وكىلى دجون كيربي قىتاي مەن رەسەيدى حالىقارالىق زاڭمەن ساناسۋعا شاقىردى. «بۇل جەردە جاتتىعۋ وتكىزىپ، شيەلەنىستى كۇشەيتۋدىڭ قاجەتى جوق. جاتتىعۋلار مەن وپەراتسيالار كۇش- قۋاتىن شىڭداۋدى كوزدەيدى. بۇل نارسە جاتتىعۋدىڭ قالاي وتەتىنىنە بايلانىستى. ءبىز بۇل جاتتىعۋلار مەن وپەراتسيالار حالىقارالىق مىندەتتەمەلەر مەن زاڭدارعا ساي وتەدى دەپ كۇتەمىز» دەدى كيربي.

www.azattyq.org