ەدىل سۇلەيمەنوۆ پارامەن ۇستالاردان ءبىر كۇن بۇرىن «سوڭعى» بايانداماسىن جاساعان
ءبىر كۇندە قاتارىنان ەكى پارا العان ول 27 - شىلدەدە، ياعني، پارامەن ۇستالاردان ءبىر كۇن بۇرىن قالالىق قوعامدىق كەڭەستىڭ تىڭدالىمىندا حالىققا ءوز باسقارماسىنىڭ جۇمىسى جايلى بايانداما جاساعان.
بۇگىن استانا قالاسى اكىمدىگىنىڭ جانىنداعى قوعامدىق كەڭەس جۋرناليستەرگە ارناپ بريفينگ وتكىزدى. بريفينگ تاقىرىبى 27 - شىلدەدەگى قوعامدىق كەڭەستىڭ قوعامدىق تىڭدالىمىنىڭ قورىتىندىسى بولدى. بريفينگكە قاتىسقان قوعامدىڭ كەڭەستىڭ ءتوراعاسى سانسىزباي ەسىلوۆ پارامەن ۇستالعان شەنەۋنىكتەردى جازالاۋ قۇقىق قورعاۋ ورگاندارىنىڭ جۇمىسى دەيدى.
«ارينە، جەمقورلىققا قارسى شارا قولدانۋ، جەرگىلىكتى پروبلەمالار بولسا، وعان پىكىر ايتۋ قوعامدىق كەڭەستىڭ مىندەتى. ءبىراق، ءاربىر شەنەۋنىك وسىنداي جۇمىسپەن شۇعىلدانىپ، قولعا تۇسسە، زاڭدى تۇردە زاڭ قورعاۋشى ورگانداردىڭ الدىندا باسىمەن جاۋاپ بەرۋى كەرەك. ءبىزدىڭ جۇمىسىمىز وسى ماسەلەنى مونيتورينگ ەتىپ، زەرتتەپ، نەدەن پايدا بولىپ جاتىر، قاي جولمەن توسقاۋىل قويۋ كەرەك دەگەن ماسەلەلەر بويىنشا اكىمگە نەمەسە ءماسليحاتقا ۇسىنىس ءبىلدىرۋ. ەدىل سۇلەيمەنوۆتى ءىسىن زەرتتەپ، انىقتاپ، ارى قاراي سوتقا جولداۋ قۇقىق قورعاۋ ورگاندارىنىڭ مىندەتى»، - دەيدى سانسىزباي ەسىلوۆ.
س. ەسىلوۆ جولاۋشىلار باسقارماسىنىڭ بۇرىنعى جەتەكشىسى ەدىل سۇلەيمەنوۆتىڭ پارامەن ۇستالعانىن بۇگىن ەستىپ وتىر ەكەن.
«مەن ەدىل سۇلەيمەنوۆتىڭ ۇستالعانىن سىزدەردەن ەستىپ وتىرمىن. كۇنى كەشە عانا ول ءبىزدىڭ الدىمىزدا قوسىمشا بايانداما جاساعان ەدى... مەن ونىمەن تىكەلەي جۇمىس ىستەگەن جوقپىن. وسىعان دەيىن قالالىق ءماسليحات حاتشىسىمەن جۇمىس ىستەگەن ەدىك. ول باسقارما جەتەكشىسى بولىپ جۇمىس ىستەگەننەن بەرى ءبىر جىل ءتىپتى ودان دا از ۋاقىت وتكەن شىعار... ونىڭ قولعا تۇسكەنىن بىلگەن جوقپىن... »، - دەدى س. ەسىلوۆ.
سانسىزباي ەسىلوۆتىڭ حابارلاۋىنشا، 27 - شىلدە كۇنى ەدىل سۇلەيمەنوۆ استانا قالاسى اكىمىنىڭ ءبىرىنشى ورىنباسارى سەرگەي حوروشۋننان كەيىن، وسى جولاۋشىلار تاسىمالى، قوعامدىق كولىك سالاسىندا اتقارىپ جاتقان جۇمىسى تۋرالى قوسىمشا بايانداما جاساعان. ال، استانا قالاسى بويىنشا ۇلتتىق سىبايلاس جەمقورلىققا قارسى ءىس- ارەكەت دەپارتامەنتىنىڭ حابارلاۋىنشا، ەدىل سۇلەيمەنوۆ جولداعى كەدىر- بۇدىر بەلگىلەردىڭ جوندەلگەنى تۋرالى جاساندى اكت قابىلداپ، ونىڭ ۇستىنە، سول كاسىپكەردى «قارا تىزىمدەگى» كاسىپكەرلەر تىزىمىنە ەنگىزبەۋ ءۇشىن 1,5 ميلليون تەڭگە، ەكىنشى كاسىپكەردەن ايالداما پاۆيلوندارىن سىرلاۋ جانە جۋۋ بويىنشا ورىندالعان جۇمىس اكتىلەرىنە قول قويعانى ءۇشىن پارا تۇرىندە تاعى 600 مىڭ تەڭگە العان.
بۇل جۇمىستاردىڭ ورىندالماعانىن بىلە تۇرا، ورىندالدى دەپ قول قويۋ ءۇشىن پارا سۇراعان ەدىل سۇلەيمەنوۆ قوعام الدىندا قوعامدىق كولىك تاسىمالىن جاقسارتۋ ءۇشىن جۇمىس ىستەپ جاتىرمىز دەپ بايانداما جاساعان.
قوعامدىڭ كەڭەستىڭ ءتوراعاسى سانسىزباي ەسىلوۆتەن ەدىل سۇلەيمەنوۆتىڭ بايانداماسىن تىڭداعان ادام رەتىندە ونىڭ «سوڭعى» بايانداماسى نە جايلى بولدى دەپ سۇرادىق.
«ەكى كۇن بۇرىن ول قوعامدىق كەڭەستىڭ الدىندا قوعامدىق كولىكتىڭ جۇمىسى جونىندە اكىمنىڭ ءبىرىنشى ورىنباسارى سەرگەي حوروشۋننان كەيىن قوسىمشا بايانداما جاسادى. بايانداما بارىسىندا قوعامدىق كولىكتىڭ جاعدايى جونىندە، اكىمدىك قولداناتىن شارالار تۋرالى، اۆتوبۋستاردىڭ جاڭارۋى، ەلەكتروندى تولەماقى جونىندە ايتتى. قوعامدىق جولاۋشىلار تاسىمالىنىڭ جاعدايى جاقسى دەگەن جوق. ءبىراق بۇگىنگى جاعدايى جونىندە، قولدانىپ جاتقان شارالار جونىندە ايتىپ بەردى. جالپى، ءبارى جاقسى دەپ ايتۋعا اكىمشىلىكتىڭ اۋزى بارماي جاتىر. ەندىگى جىلى ەكسپو وتەدى، ال اتقاراتىن جۇمىس ءالى كوپ»، - دەدى ە. سۇلەيمەنوۆ.
ەستەرىڭىزگە سالا كەتەيىك، استانا قالاسىنىڭ بۇرىنعى اكىمى ادىلبەك جاقسىبەكوۆ اكىمدىكتەگى باسقارمالاردىڭ سانىن قىسقارتا وتىرىپ، 2015 -جىلدىڭ 16 - قاراشاسىندا ەدىل سۇلەيمەنوۆتى جولاۋشىلار كولىگى باسقارماسىنىڭ باسشىسى ەتىپ تاعايىنداعان.
اۆتور: كەنجەكەي توقتامۇرات قىزى
