اياتوللانىڭ قولىنداعى شىلىمىن الىپ تاستاعان وڭدەگەن سۋرەت ءۇشىن يران گازەتى سىنعا قالدى
يراندا 1979 - جىلعى يسلام توڭكەرىسىنىڭ نەگىزگى وكىلى، توڭكەرىستەن سوڭ تەگەراندا جۇما نامازىنداعى يمام مىندەتىن اتقارعان باستى تۇلعاعا اينالعان اياتوللا ماحمۋد تالەگاني شىلىمقور ادام ەكەنىن جاسىرمايتىن.
ەلدە كۇندەلىكتى جارىق كورەتىن Shargh گازەتى ءبىرىنشى بەتىنە تالەگانيدىڭ العاشقى جۇما نامازىنىڭ مەرەيتويى تۋرالى ماقالامەن بىرگە ءدىن جەتەكشىسىنىڭ ەڭ تانىمال سۋرەتتەرىنىڭ ءبىرىن جاريالاعان. ءبىراق سۋرەتتە اياتوللانىڭ قولىنداعى شىلىمى «ءتۇسىپ قالعانىن» كوپشىلىك بىردەن بايقاعان.
الەۋمەتتىك جەلى پايدالانۋشىلارى بۇل ارەكەتتى سىناپ، وڭ قولىنا شىلىم ۇستاعان تالەگانيدىڭ ءتۇپنۇسقا فوتوسىن كوپتەپ جاريالادى. كەيبىرەۋلەر «سۋرەتتى بۇرمالاپ شىعاراتىن گازەتتىڭ مازمۇنىنا سەنۋگە بولا ما» دەپ كۇمان بىلدىرگەن.
يرانداعى سەنزۋرا
سۋرەتكە تۇزەتۋ ەنگىزۋشىلەردىڭ ارەكەتى يران يسلام رەسپۋبليكاسىنداعى ب ا ق سەنزۋراسىنا تاعى دا نازار اۋداردى، بۇل ەلدە باسپا سوزدەگى ماقالالاردى مەملەكەت قاتاڭ باقىلايدى، سوندىقتان بيلىك باسىلىمدى جاۋىپ تاستاماۋى ءۇشىن رەداكسيالىق ىشكى سەنزۋرا دا كەڭ تاراعان.
تالەگانيدىڭ ۇلى مەحدي تالەگاني Shargh گازەتىندەگى سۋرەتتى «سەنزۋرانىڭ ايقىن مىسالى» دەپ اتادى. «بۇل ادامداردى قوعام الدىندا ءوزىمىز قالاعانداي ەتىپ كورسەتۋگە دەگەن ۇمتىلىستى بىلدىرەدى، ال ۇنامايتىن تۇسىن الىپ تاستايمىز» دەگەن ول.
ءدىنباسىنىڭ ۇلى مارقۇم اكەسىنىڭ ونداعان سۋرەتتە شىلىممەن تۇسكەنىن ايتادى. «كەيبىرەۋلەر شىلىم شەگۋدى زياندى ادەتكە جاتقىزادى، ءبىراق اكەم بۇل ادەتىن ەلدەن جاسىرعان جوق. تالەگانيدىڭ بۇل داعدىسىن كورسەتپەۋگە باسىلىمنىڭ قالاي ءداتى بارعانىن تۇسىنبەيمىن» دەدى ول Nasimonline.ir جاڭالىقتار سايتىنا.
سۋرەت اۆتورى، تەگى يراندىق Magnum فوتوگرافى ابباس تا Shargh گازەتىنىڭ تسەنزۋراسىن سىنعا الدى. Iranwire.com سايتىندا جاريالانعان اشىق حاتىندا ول «اياتوللا تالەگاني ءوزىن «شىلىم شەكپەيتىن ادام» رەتىندە سيپاتتاعاندى ءتاۋىر كورمەيتىن» دەپ جازادى.
«مەنىڭ اياتوللا تالەگانيدى تۇسىرگەن سۋرەتىمدى رۇقساتسىز جاريالاعاندارىڭىزدى بايقادىم. يراندا اۆتورلىق قۇقىق تۋرالى زاڭ جوعىن بىلەمىن، ءبىراق تىم بولماعاندا سۋرەتتى سول قالپىندا - تالەگانيدىڭ وڭ قولىنداعى شىلىمىن قالدىرىپ شىعارۋ كەرەك ەدى» دەپ جازعان ابباس Shargh گازەتىنە جولداعان حاتىندا.
«ەسكەرتە كەتەيىن، مەنىڭ قوولىمدا اياتوللا حومەينيدىڭ مۇشتىك ۇستاپ تۇرعان سۋرەتى بار» دەگەن ابباس.
سۋرەتتەگى وزگەرىستى Shargh ءتىلشىسى مەحدي گاديمي دە كەكەتىپ، Twitter پاراقشاسىنا تالەگانيدىڭ شىلىمقورلىعى تۋرالى انەكدوت جاريالادى. ول تالەگانيگە دەيىن اياتوللا بولعان، 1977 -جىلى تالەگانيمەن بىرگە تۇرمەدە جاتقان موحامماد ءالي مونتازەريدىڭ اتىنان باياندالعان. «ءبىر كۇنى تۇندە تالەگاني توقتاماي شىلىم شەكتى. مەن وعان «تەمەكى تۇتىنىنە تۇنشىعىپ بارامىز. نەگە جاتىپ ۇيىقتامايسىڭ؟ دەدىم».
جازىلماعان ەرەجە
Shargh گازەتىنىڭ باس رەداكتورى مەحدي راحمانيان گازەت تالەگانيدىڭ قولىنان شىلىمدى جويۋ ارقىلى شىلىمعا اۋەستەنبەۋدى ناسيحاتتاماق بولعان دەپ تۇسىندىرەدى. «اياتوللا تالەگانيدىڭ شىلىممەن تۇرعان سۋرەتى تەمەكىنى جارنامالايدى. ءبىز ولاي بولعانىن قالامايمىز» دەگەن مەحدي راحمانيان Mizan اگەنتتىگىنە.
ول يسلام رەسپۋبليكاسىندا سەنزۋرانىڭ جازىلعان جانە اۋىزەكى ەرەجەلەرى بار ەكەنىن ايتادى. «تەمەكى ۇستاعان سۋرەتكە زاڭمەن تىيىم سالىنا ما، جوق پا - بىلمەيمىن. ءبىراق وعان قاتىستى شەكتەۋلەر بار، ب ا ق ونى جاريالاماۋعا ءتيىس» دەيدى راحمانيان.
«سۋبەكت ءدىن قىزمەتكەرى مە، ساياسي تۇلعا ما دەگەنگە ءمان بەرەسىڭ، ەلدەگى ساياسي جاعدايدى ەسكەرەسىڭ، گازەت نەمەسە جۋرنالدىڭ ۇستانىمىنا قاراي كەرەك، ... مۇنداي سۋرەت گازەتتىڭ جابىلىپ قالۋىنا سەبەپ بولۋى مۇمكىن» دەپ جازدى ول. فوتوگراف Shargh پەن باسقا دا يراندىق گازەتتەردىڭ ىستەپ جاتقان ارەكەتى تەرىس دەيدى. ءبىراق ول وقىرماندارعا «نەگىزگى سىن يسلام رەسپۋبليكاسىنداعى سەنزۋرا جۇيەسى مەن ودان تۋىنداعان ءوزىن- ءوزى سەنزۋرالاۋعا ايتىلۋى كەرەك» دەپ ەسكەرتەدى.
گولناز ەسفاندياريدىڭ ماقالاسىن اعىلشىننان اۋدارعان - دينارا ءالىمجان.
«ازاتتىق»
