تارازدا سوتتالعان ازامات تۇرمەدەگى فۋتبول ءۇشىن بوستاندىقتان باس تارتتى
ايتپەسە، سوتتالۋشىنىڭ تۇرمەدەن جەتى اي بۇرىن شىعۋىنا مۇمكىندىگى بار بولىپتى.
بۇل تۋرالى 31- ارنا حابارلادى.
بۇل تۇرمەدە دوپ تەبۋگە قۇمار جازاسىن وتەۋشىلەر اراسىندا جىل سايىن فۋتبولدان چەمپيونات وتكىزىلەدى. تارتىستى تۋرنيردى تاماشالايتىن دا، جانكۇيەرى دە تۇرمە باسشىلىعى. بيىلعى ويىندا ءوز كومانداسىمەن ماقسات ىقىلاسوۆ شەشۋشى كەزەڭگە جولداما العان. بۇل ساتتە سوتتا مەرزىمىنەن بۇرىن بوساپ شىعۋ ءوتىنىشى قاتار قاناعاتتاندىرىلعان. ءبىراق اقتىق ويىندا دوپ تەپپەي كەتىپ قالۋدى قالاماعان ول ەركىندىككە ەرتەرەك شىعۋدان باس تارتتى. فينالدىق ويىندى تۇرمەدە جەتى اي كۇتۋدى ءجون ساناپتى. ونىسىنا وكىنبەيدى.
«قالعانىما مەن وكىنىپ تۇرعان جوقپىن. دەگەنمەن دە اكە-شەشەم بار كۇتىپ وتىرعان. سول ەرتەڭ امان-ەسەن ورالايىن دەپ وتىرمىن»، - دەيدى جازاسىن وتەۋشى ماقسات ىقىلاسوۆ.
كوماندا كاپيتانى ماقسات ماقساتىنا جەتتى. كومانداسى التى دا بەس ەسەبىمەن ءبىرىنشى ورىن يەلەندى. «فۋتبول ويىنى ءۇشىن ىشكەن اسىن جەرگە قويعاندى كوردىك، ءبىراق باس بوستاندىعىنان باس تارتقاندى ءبىرىنشى رەت كوردىك دەگەن پروكۋرورلار سوتقا مەرزىمىنەن ەرتە شىعۋى ءۇشىن قايتا ءوتىنىش جولدادى.
«سوتتالعان ىقىلاسوۆ ءۇشىنشى وڭ دارەجەلى مىنەز قۇلىقتى، بەس ماداقتاۋى بار. جازالاۋلارى مۇلدەم جوق. تۇزەلۋ جولىنا ناقتى تۇرعان سەبەپتى ءبىز سوتقا ۇسىندىق»، - دەيدى تاراز قالاسى پروكۋراتۋراسىنىڭ اعا پروكۋرورى سايات سەيتجان.
بۇل وتىنىشكە سوت وڭ قاباق تانىتتى. كۇنى بۇگىن ماقسات تۇزەتۋ مەكەمەسىنىڭ 2016-جىلعى چەمپيونى دارەجەسىمەن بوستاندىققا شىقتى. ايتا كەتەيىك ول قاساقانا ادام ءولتىردى دەگەن ايىپپەن جازاسىن وتەگەن.
