قىتاي قورشاعان ورتانى لاستايتىن كاسىپورىندارىن سانكسيامەن قورقىتتى
شامادان تىس كومىرقىشقىل گازىن شىعاراتىن قىتايلىق كاسىپورىندارعا جەردى پايدالانۋ مەن نەسيە بەرۋدە شەكتەۋ ەنگىزىلەدى، دەلىنگەن ق ح ر قورشاعان ورتانى قورعاۋ مينيسترلىگىنىڭ مالىمدەمەسىندە.
قاجەتتى ەكولوگيالىق ساراپتاماسىز زاۋىتتار مەن كاسىپورىندار تۇرعىزاتىن كومپانيالارعا دا قىتاي بيلىگى وسىنداي شارا قولدانۋدى جوسپارلاپ وتىر.
ق ح ر قورشاعان ورتانى قورعاۋ مينيسترلىگى ەكولوگيالىق ستاندارتتى بۇزۋشىلارعا جازانى كۇشەيتۋ شارالارى تۋرالى 30 مەكەمەمەن، سونىڭ ىشىندە ورتالىق بانكپەن كەلىسىمگە كەلدى.
مينيسترلىك حابارلاماسىندا ايتىلعانداي، جاقىن ارادا مەكەمە ەكولوگيالىق زاڭنامالاردى ورەسكەل بۇزۋشىلاردىڭ ءتىزىمىن قۇرادى.
سوڭعى جىلدارى قىتاي ەكولوگيالىق ستاندارتتى بۇزۋشىلارعا ايىپپۇلدى كەنەتتەن كوتەرىپ جىبەردى. ءبىراق، ايماقتارداعى جۇمىس ورىندارىنىڭ نەگىزگى كوزى بولعان ءىرى كاسىپورىنداردى جاۋاپقا تارتۋ باستى ماسەلە بولىپ وتىر. ەكولوگيا سالاسىنداعى قاتاڭ ستاندارتتارعا قاراماستان، قىتايداعى ءىرى كومپانيالار جاۋاپكەرشىلىكتەن سىتىلىپ كەتۋدە.
قىتاي ۇكىمەتىنىڭ تاپسىرىسىمەن، ەكى جىل بۇرىن جۇرگىزىلگەن زەرتتەۋگە سايكەس، قىتايدىڭ بىردە-ءبىر قالاسى ەكولوگيالىق نورمالارعا ساي ەمەس. جانە ق ح ر ۇكىمەتىنىڭ مالىمەتتەرىنشە، ەلدەگى %70 وزەن مەن كول قاتتى لاستانعان.
ق ح ر ەكونوميكاسىنىڭ جىلدام ءوسۋى ەكولوگياداعى كوپتەگەن ماسەلەلەرگە اكەپ سوقتى. ەكولوگتار قىتاي مەن شەت ەلدەردە قىتايداعى قورشاعان ورتا لاستانۋىنا حالىقارالىق ينستيتۋتتار مەن كوپشىلىكتىڭ نازارىن اۋدارۋ ءۇشىن قارسىلىق اكسيالارىن ءجيى وتكىزەدى.
