استانادا «الەم جۇگىرىسى» ەستافەتاسى ءۇش اپتا ايالدايدى - فوتو

استانا. قازاقپارات - بۇگىن ەلورداعا «الەم جۇگىرىسى» حالىقارالىق جەڭىل اتلەتيكالىق الاۋ ەستافەتاسىنىڭ قۇراما كومانداسى كەلدى.

استانالىقتار پاۆلوداردان كەلگەن جۇگىرۋشىلەردى ستۋدەنتتەر ساياباعىنىڭ الاڭىندا قۋانىشپەن قارسى الدى. جۇگىرىسكە قاتىسۋشىلار ءوز كەزەگىندە قالالىقتارعا ەستافەتا سيمۆولى - جانىپ تۇرعان الاۋدى كورسەتتى.

الەمدىك الاۋدى قىتايلىق قاتىسۋشىلار ءبىزدىڭ جۇگىرۋشىلەرگە 2- شىلدەدە قورعاس قالاسىندا تاپسىرعان بولاتىن. ەستافەتانىڭ قازاقستاندىق كەزەڭىندە سيمۆول جاركەنتتە، الماتىدا، تالدىقورعاندا، وسكەمەندە، سەمەيدە، ەكىباستۇزدا جانە پاۆلوداردا بولدى، دەپ حابارلادى استانالىق اكىمدىك سايتى.

- استانادا ءۇش اپتالىق ءۇزىلىس جاسايمىز. كوماندا بەس ادامنان تۇرادى، كەيبىر قاتىسۋشىلار اۋىسادى. 26- تامىزدا ومبىعا بەت الامىز، وندا قيىر شىعىستان جۇگىرىپ كەلە جاتقان رەسەيلىك كوماندامەن كەزدەسەمىز. قۇراما كوماندا ودان ءارى ۋفاعا بارىپ، رەسەيدىڭ باتىس بولىگىمەن جۇگىرىپ كەلە جاتقان باسقا كوماندالارعا قوسىلادى. 21- قىركۇيەكتە ەستافەتا رەسمي تۇردە مارەگە جەتەدى، - دەيدى قازاقستانداعى «الەم جۇگىرىسى» ەستافەتاسى كومانداسىنىڭ كاپيتانى جانە ۇيلەستىرۋشىسى وسپانوۆ داۋرەن.

جالپى، مارافون 34 كۇنگە جالعاسادى، كوماندا كۇن سايىن 200 شاقىرىمدى باعىندىرادى، ءاربىر قاتىسۋشىعا تۇسەتىن جۇكتەمە كۇنىنە 15 جانە 40 شاقىرىمدى قۇرايدى.

د. وسپانوۆتىڭ ايتۋىنشا، قاتىسۋشىلاردىڭ كوبى ۇزىندىعى 42 شاقىرىمدىق كلاسسيكالىق مارافونعا بۇعان دەيىن دە قاتىسقان، ءبىراق ەستافەتاعا العاش رەت قوسىلعاندار دا بار.

- بىزگە ەرىپ جۇرگەن ەكى كولىك بار، بارلىق قاجەتتى زاتتاردى سوندا ساقتايمىز. جۇگىرگەن كەزدە اۋىسىپ وتىرامىز، ءبىرى جۇگىرسە، باسقالارى دەمالادى. كوماندا بولعاندا شىدامدىلىق تانىتۋ كەرەك، ءتۇرلى قيىندىقتار دا بولادى، ءبىز ءۇشىن جۇگىرۋ عانا سىن ەمەس، بۇل جەردە پسيحولوگيالىق تا توسقاۋىلداردى باعىندىرۋ قاجەت، - دەيدى مارافونعا قاتىسۋشى.

ايتا كەتەيىك، بۇگىنگى تاڭدا ەستافەتاعا التى ميلليوننان استام ادام قاتىسقان. الاۋ التى قۇرلىقتا الەمنىڭ 140 تان استام ەلىندە بولدى.