باشقۇرتستاننان باستالعان جايىق جورىعى اتىراۋدا مارەگە جەتپەك

ورال. قازاقپارات - جايىق وزەنى بويىمەن ساپار شەگەتىن حالىقارالىق قازاقستاندىق-رەسەيلىك تاريحي-مادەني، ەكولوگيا ەكسپەديتسياسى ورال قالاسىنا جەتتى.

ەكسپەديتسيا جەتەكشىسى ەلەنا تاراسەنكونىڭ ايتۋىنشا، جيىرماسىنشى، مەرەيتويلىق جورىق بيىل قازاقستان تاۋەلسىزدىگىنىڭ 25 جىلدىعىنا ارنالدى. بيىلعى ەرەكشەلىك، بۇرىن ورىنبور نەمەسە باتىس قازاقستان وبلىسىنان جول تارتاتىن جورىق العاش رەت جايىق وزەنىنىڭ باشقۇرتستانداعى باستاۋ الاتىن جەرىنەن باستالدى. تابيعاتى كەرەمەت، 800 مەتردەي بيىكتىكتەگى تاۋداعى تازا بۇلاق ەكەن. سودان كەيىن ەكسپەديتسيا ورىنبور وڭىرىمەن جايىق وزەنىمەن ءجۇزىپ، ەلەك اۋدانىندا ايالدادى. وسىندا «ءبىز دوستىعىمىزبەن كۇشتىمىز!» اتتى قازاقستاندىق-رەسەيلىك جاستار فورۋمى وتكىزىلدى. ەكسپەديتسيا حالىقتار دوستىعىن، تاريحي-مادەني مۇرالاردى ناسيحاتتاۋمەن، جايىق وزەنىن كەلەسى ۇرپاق ءۇشىن ساقتاۋ باعىتىندا ەكى ەلدىڭ ۇكىمەتىنە ۇسىنىس-پىكىر جيناقتاۋمەن اينالىسادى.

باتىس قازاقستان وبلىسىنىڭ اكىمى التاي كولگىنوۆتىڭ سوزىنە قاراعاندا، بۇدان بىرنەشە كۇن بۇرىن باتىس قازاقستاندىقتار ورىنبوردا بولىپ، كورشىلەس ءوڭىر باسشىلىعىمەن جۇزدەستى. ورىنبور وبلىسىنىڭ گۋبەرناتورى يۋري بەرگپەن كەزدەسۋ كەزىندە جايىق وزەنىنىڭ جاي- كۇيى تالقىلاندى. ورىنبور وبلىسىنىڭ باسشىلىعى جايىققا سۋ جىبەرۋ ماسەلەسىن باقىلاۋدا ۇستادى. سونىڭ ناتيجەسىندە جايىقتاعى سۋ دەڭگەيى قالىپتى بولىپ وتىر. اتالمىش ەكسپەديتسيا مۇشەلەرى جيىرما جىل بويى بۇل ماسەلەنى ۇدايى كوتەرىپ كەلەدى. سونىڭ ناتيجەسىندە ۇكىمەتارالىق دەڭگەيدە كەلىسىمگە قول قويىلادى دەپ كۇتىلۋدە.

شارا بارىسىندا وبلىستىق قازاق دراما تەاترىندا ەكسپەديتسيانىڭ 20 جىلدىعىنا ارنالعان «جايىق-دوستىق وزەنى» اتتى فوتوكورمە دە ۇيىمداستىرىلدى.

بۇدان كەيىن ەكسپەديتسيا اقجايىق، يندەر اۋداندارى ارقىلى ساپارىن جالعاستىرىپ، جورىق اتىراۋ قالاسىندا مارەگە جەتپەكشى.

اۆتور: ەلجان ەرالى