لاڭكەستىك اكتىسىنە قاتىسۋشىلاردى تۇتقىندا ۇستاۋ مەرزىمى ۇزارتىلدى

اقتوبە. قازاقپارات - سوت قاۋلىسىمەن اقتوبەدە لاڭكەستىك اكتىسىن جاساعانداردى تۇتقىندا ۇستاۋ مەرزىمى ءتورت ايعا ۇزارتىلدى، دەپ حابارلادى وبلىستىق سوتتىڭ باسپا ءسوز قىزمەتى

ۆەدومستۆودان حابارلاعانداي، اقتوبە قالالىق №2 سوتىنا تۇتقىندا وتىرعانداردى ۇستاۋ مەرزىمىن ۇزارتۋ جونىندە قولداۋحات كەلىپ ءتۇستى. ەسكە سالا كەتەيىك، ولاردىڭ ءبارى دە «لاڭكەستىك اكتىسىن جاساۋ» 255-بابىنىڭ 4 -بولىمىندە كوزدەلگەن قىلمىستىق قۇقىق بۇزۋشىلىققا ايىپتالۋدا.
اقتوبە قالالىق №2 سوتىنىڭ 2016 -جىلعى 27 -شىلدەدەگى قاۋلىسىمەن ارسەن تاڭاتاروۆقا، اسحات يمانعاليەۆكە، باقىت قۋانىشبايەۆقا، جاڭاباي قۋانىشبايەۆقا، ءانۋار ساديقوۆقا، ازامات ءابدىراحمانوۆقا، ايدوس جۇبانوۆقا، الىبەك اقپانبەتوۆكە، اسحات راحمەتوۆكە قاتىستى تۇتقىندا ۇستاۋ مەرزىمى ۇزارتۋ تۋرالى قولداۋحات قاناعاتتاندىرىلىپ، ونىڭ مەرزىمى ءتورت ايعا دەيىن ۇزارتىلدى»، - دەلىنگەن سوتتىڭ باسپا ءسوز قىزمەتى تاراتقان حابارلامادا.
ەسكە سالا كەتەيىك، 5 -ماۋسىمدا اقتوبەدە لاڭكەستىك اكتى بولدى. لاڭكەستەر توبى قارۋ ساتۋ دۇكەنىنە شابۋىل جاساپ، قارۋلانىپ، ودان ءارى ۇلتتىق ۇلاننىڭ اسكەري بولىمشەسىنە جول تارتتى. لاڭكەستەر شابۋىلىنان سەگىز ادام قازا تاپتى، ونىڭ ۇشەۋى - اسكەري قىزمەتشىلەر. لاڭكەستىككە قارسى وپەراتسيا بارىسىندا 18 قىلمىسكەر جويىلدى، توعىز ادام ۇستالدى، قازىر ولار تۇتقىندا وتىر. ولارعا ءومىر بويىنا بوستاندىعىنان ايىرۋ جازاسى بەرىلۋى مۇمكىن.