قازىرگى تاڭدا بالالارعا ارنالعان كينو نەگە جوق؟

استانا. قازاقپارات - ەلىمىزدە بالالارعا ارنالعان كينو نەگە جوق؟ «ساعان كۇشىك كەرەك پە؟»، «بايتەرەك»، «اڭشى بالا» سياقتى فيلمدەردى جوققا شىعارۋدان اۋلاقپىز.

شىنىن ايتقاندا، وتاندىق كينورەجيسسەرلاردىڭ بارى وسى عانا بولىپ تۇر. رەجيسسەرلار نەگە بالالار تاقىرىبىنان قاشادى؟ وسى ساۋالداردى «قولىمىزعا تۇسكەن» رەجيسسەرلاردان سۇراپ كوردىك...

قاناعات مۇستافين، رەجيسسەر:

- ەلىمىزدە بالالارعا ارنالعان كينولار وتە از. «قازاق فيلمدە» سوڭعى جىلدارى بالالارعا ارنالعان ەكى كينو شىقتى. نەگىزى بالالار كينوسىنا سۇرانىس وتە كوپ، سوندىقتان دا كوبىرەك ءتۇسىرۋىمىز كەرەك. ماعان رەجيسسەر رەتىندە تالاي سەناري ۇسىندى. سونىڭ ىشىندە بالالارعا ارنالعان بىردە- ءبىر سەناري جوق. كوبى اۆتورلىق جوبالار. ءار رەجيسسەر ءوزىنىڭ قالاعان، تۇسىنگەن تاقىرىبىنا باراتىنى بەلگىلى. ەگەر جاقسى سەناريست بولسا، مەن بالالار كينوسىن تۇسىرۋگە قارسى ەمەسپىن. بالالارمەن تالاي جۇمىس جاسادىم. وتە قيىن. ويىن قۋىپ كەتەدى، تەز جالىعادى. ءبىر دۋبلدى 8-9 رەت تۇسىرۋگە تۋرا كەلەدى...

ساتىبالدى نارىمبەتوۆ، رەجيسسەر:

- بالالار كينوسىن تۇسىرۋگە كوپ رەجيسسەردىڭ جۇرەگى داۋالامايتىنى راس. قازىرگى كۇنى بالالاردى تاڭعالدىرۋ دا وتە قيىن. سوسىن ابدوللا اعا قارساقبايەۆتان اسىرىپ كينو تۇسىرە المايدى ءبىزدىڭ رەجيسسەرلار. ونىڭ ىشىندە ءوزىم دە بارمىن. مەنىڭ كينولارىمنىڭ باسىم كوپشىلىگى قالىڭ كورەرمەنگە ارنالعان. بولاشاقتا دا بالالارعا ارناپ كينو تۇسىرەمىن دەپ ايتا المايمىن. ولاردىڭ پسيحولوگياسىن ءبىلۋ وتە قيىن.

رۇستەم ءابدىراش، رەجيسسەر:

- كۇنى بۇگىنگە دەيىن تۇسىرگەن تۋىندىلارىمنىڭ اراسىندا بالالارعا ارنالعانى جوق. ءبىراق، بالالاردىڭ دا كورۋىنە رۇقسات بەرىلگەن. ەلىمىزدە بالالار رەجيسسەرى از، دەگەنمەن، ءتاۋىر تۋىندىلاردى دۇنيەگە اكەلىپ جاتقان ازاماتتارىمىزدىڭ ەڭبەگىن جوققا شىعارۋعا بولمايدى. مۋلتفيلم جانرىندا دا بالالارعا ارنالعان تۋىندىلار بار. كوڭىلىم تولمايتىنى، بالالاردىڭ كينوسىن كينوتەاترلاردا بەرىپ جاتسا، قازاق تىلىندەگى كورسەتىلىمىنە كوپ ەشكىم بارمايدى. ال ورىس تىلىندەگى كورسەتىلىمىنە بيلەت بولماي قالادى. ءوز ەلىڭدە جاسالىپ، ءوزىڭنىڭ تىلىڭدە شىعىپ جاتقان دۇنيە بولعاندىقتان، جانىم اشيدى. كينونى تۇسىرگەن سوڭ ونى كورەتىن كورەرمەنى بولۋى كەرەك. ءبىز قازاق تىلىندە تۇسىرەمىز. الايدا قازاقتار ورىس تىلىندەگى كورسەتىلىمىنە بارادى. سوسىن قازاق تىلىندەگى كورسەتىلىمىن ساتىلىمنان الىپ تاستايدى.

ءيا، رەجيسسەر اعالارىمىز سەناري جازاتىن ادام بولسا، كينونى كورەتىن قالىڭ كورەرمەنى بولسا عانا بالالارعا ارناپ تۇسىرە الادى ەكەن. ال، ءبىز عاسىر جىلجىسا دا ومىرشەڭدىگىن جويماعان «مەنىڭ اتىم - قوجا»، «سۇيرىك»، «وجەت قىزدى» كورىپ جۇرە تۇرامىز...

ساۋالنامانى دايىنداعان گۇلدانا نۇرلىحانوۆا

«اق جەلكەن»، №6