تانىمال سۋرەتشى انا اتانۋدان نەگە باس تارتاتىنىن ءتۇسىندىردى

استانا. قازاقپارات - وسى كۇنگە دەيىن ءۇش رەت تۇسىك تاستاعان سەربيالىق سۋرەتشى بۇل ارەكەتىنىڭ سەبەبىن اشىپ ايتتى.

سەربيالىق سۋرەتشى- پەرفورمەر مارينا ابراموۆيچ وسى كۇنگە دەيىن ءۇش رەت تۇسىك تاستاعانىن مويىندادى. ول Tagesspiegel نەمىس باسىلىمىنا بەرگەن سۇحباتىندا جۇمىسقا كەدەرگى جاسايتىندىقتان، ەش ۋاقىتتا انا اتانعىسى كەلمەگەنىن ايتتى.

«ادامنىڭ تانىندە ەنەرگيا بەلگىلى ءبىر مولشەردە عانا بولادى. باسقا ادامدار سەكىلدى مەن دە ونى بىرنەشە سالاعا جۇمساۋىما تۋرا كەلەدى. ال مۇنىڭ بارلىعى مەنىڭ شىعارماشىلىعىمنىڭ توقىراۋىنا الىپ كەلەدى»، - دەيدى سۋرەتشى.

ونىڭ ايتۋىنشا، ايەلدەردىڭ ەر ادامدار سەكىلدى ونەردە جەتىستىككە جەتپەۋىنە بالا بوسانۋلارى سەبەپ. «تالانتتى ايەلدەر وتە كوپ. نەگە جاقسىنىڭ بارلىعى ەر ادامعا تيەسىلى بولۋى ءتيىس؟ مۇنىڭ جاۋابى وتە قاراپايىم. «ماحاببات، وتباسى، بالالار - ايەلدەر مۇنىڭ بارلىعىن قۇرباندىققا شالعىسى كەلمەيدى»، - دەيدى ابراموۆيچ.

مۇنىمەن قاتار، سۋرەتشى ۇنەمى الەمدى شارلاپ جۇرەتىندىكتەن، بالا بوسانۋعا مۇمكىنشىلىگىنىڭ بولمايتىنىن ايتىپ ءوتتى. «مەن كورمەلەرگە كارتينالاردى عانا جىبەرە المايمىن، ءوزىم دە بىرگە بارۋىم كەرەك»، - دەيدى ول.

مارينا ابراموۆيچ - سەربيالىق پەرفورمانس شەبەرى، «التىن ارىستان» جۇلدەسىنىڭ يەگەرى. اتالعان جۇلدەنى 47- ۆەنەتسيالىق بياننالەدە تانىستىرعان «بالقاندىق باروككو» تۋىندىسى ءۇشىن العان بولاتىن. 2010 -جىلى نيۋ-يورك قالاسىنداعى مۋزەيلەردىڭ بىرىندە ابراموۆيچ تۋىندىلارىنىڭ كورمەسى ءوتتى. ول 716 ساعات جانە 30 مينۋتقا سوزىلعان بولاتىن. ال كورمەنى تاماشالاۋعا 1,5 مىڭ ادام كەلگەن.