سەۋلدە قازاقستاندىق بالانىڭ جۇرەگىنە تەگىن وپەراتسيا جاسالدى
دەپ حابارلادى www.24.kz.
كوپ بالالى وتباسى كلينيكانىڭ قايىرىمدىلىق شارالار باعدارلاماسىنا ىلىكتى. ومار سيتەربايەۆ شىر ەتىپ دۇنيەگە كەلگەننەن باستاپ جۇرەگىندە كىناراتى بارى انىقتالدى. نەبارى 9 ايلىق نارەستەگە العاش رەت وپەراتسيا جاسالادى. ەكى جىلدان كەيىن ونى تاعى قايتالاۋ كەرەك بولدى. الايدا ەكىنشى وپەراتسيادان كەيىن دە اعزاسى جەتىلىپ كەلە جاتقان بالانىڭ جاعدايى كۇننەن كۇنگە ناشارلاي بەردى. تىنىسى تارىلىپ، دەمالا الماي، قينالاتىن ساتتەرى جيىلەدى. وسى كەزدە بالاعا شيپا ىزدەپ شارق ۇرعان وتباسىنىڭ سۇراعانى الدىنان تابىلدى. سيتەربايەۆتار تۇرىپ جاتقان اۋىلعا وڭتۇستىك كورەياداعى «سيەۆەرانس» اۋرۋحاناسىنىڭ ماماندارى كەلدى. شەتەلدىك كارديوحيرۋرگ بوزبالانىڭ دەنساۋلىعىن تەكسەرىپ، شۇعىل تۇردە ءۇشىنشى وپەراتسيا جاساۋ كەرەكتىگىن جەتكىزدى.
«گازەتتەن كورەيالىق دارىگەرلەرلەردىڭ ءبىزدىڭ اۋرۋحاناعا كەلىپ، جەرگىلىكتى تۇرعىنداردىڭ دەنساۋلىعىن تەگىن تەكسەرىپ جاتقانىن وقىدىق. مەن بالامدى الىپ باردىم. كارديوحيرۋرگ دارىگەر قاجەتتى اناليزدەردى الىپ، ءبىزدى سەۋل قالاسىنا وپەراتسيا جاساۋعا شاقىردى. دارىگەر وماردى مىندەتتى تۇردە ەمدەپ شىعامىن دەگەن ۋادە بەردى»، - دەيدى وماردىڭ اناسى ءزۇلفيا سيتەربايەۆا.
مۇنداي شەشىم سيتەربايەۆتار ءۇشىن توسىن سىي بولدى. سەبەبى 5 بالالى وتباسىنىڭ كۇردەلى وپەراتسيا جاساتۋعا قاراجاتى بولعان جوق. قازىر ناۋقاس بالانىڭ وكپەسىنە جۇرەك ارقىلى كەلەتىن قان كولەمى جەتكىلىكسىز. سول سەبەپتى ونىڭ اعزاسىنا جانۋاردىڭ بيولوگيالىق ماتەريالىنان جاسالعان تەتىك وتىرعىزىلۋدا. دارىگەرلەردىڭ ايتۋىنشا، مۇنداي تەتىك 10 جىلعا دەيىن جارامدى بولادى. ياعني كەلەسى وپەراتسيانى ومار 21 جاسقا تولعاندا جاساتۋعا تۋرا كەلەدى. «سيەۆەرانس» كلينيكاسىندا وسىنداي ەمنىڭ قۇنى شامامەن 60 مىڭ دوللاردى قۇرايدى. ومارعا كەتەتىن بۇكىل شىعىن اۋرۋحانانىڭ قايىرىمدىلىق باعدارلاماسى مەن دەنساۋلىق ساقتاۋدى دامىتۋ ينستيتۋتى ەسەبىنەن وتەلدى. شەتەلدىك ماماندار زامانۋي تەحنولوگيالاردى قولدانىپ جۇرگىزگەن وپەراتسيا 5 ساعاتقا سوزىلدى. ونىڭ بارىسىندا حيرۋرگتار ءبىر قيىنشىلىققا كەزىكتى. ءبىراق ناتيجەسىندە ولار الدىنا قويعان ماقساتىنا جەتتى.
«وپەراتسيا قورىتىندىلارى وتە جاقسى بولدى دەپ ايتا الامىن. الايدا ومارعا وسىعان دەيىن 2 رەت وپەراتسيا جاسالعاندىقتان، ول ءبىز ءۇشىن ءبىرشاما قيىندىق تۋعىزدى. ونىڭ كەۋدەسى بۇرىن كەسىلگەن. ول جەردى قايتادان پىشاق تيگىزۋ قاۋىپتى بولعاندىقتان، ءبىز بالانىڭ قابىرعاسىنىڭ استىنان كەسۋدى ءجون كوردىك. كەيىن كاسىبي ماماندارمەن جينالىپ، وپەراتسيانى كەۋدە ارقىلى جۇرگىزۋدىڭ جولىن تاپتىق»، - دەيدى «سيەۆەرانس» اۋرۋحاناسىنىڭ كارديوحيرۋرگى حين حۆان پاك.
«سيەۆەرانس» اۋرۋحاناسىنىڭ جەتەكشىلەرى جىل سايىن وسىنداي قايىرىمدىلىق وپەراتسيالارىنا 1 ميلليون دوللار كولەمىندە قاراجات بولەدى. ياعني ءتۇرلى مەملەكەتتەن كەلگەن 20 بالا سەۋل قالاسىندا تەگىن ەم قابىلداي الادى. كلينيكا ماماندارى ءار ەلگە وزدەرى بارىپ، وپەراتسياعا مۇقتاج ناۋقاستاردى ىرىكتەپ الادى. بيىل ومارمەن قاتار تاعى 4 ءبۇلدىرشىن «سيەۆەرانسقا» جەتكىزىلەدى. كورەيا ەلىنىڭ دارىگەرلەرى تەك ناۋقاستارعا عانا كومەك كورسەتۋمەن شەكتەلمەيدى. ولار دارىگەرلەردىڭ بىلىكتىلىگىن ارتتىرۋعا ۇلكەن كوڭىل بولەدى.
«ءبىز قازاقستانعا ءجيى بارىپ تۇرامىز. جەرگىلىكتى دارىگەرلەرلەرگە شەبەرلىك ساعاتتارىن وتكىزەمىز. سونداي- اق، ولاردى وزىمىزگە شاقىرامىز. جاقىندا قازاقستاننان ەكى مامان كەلىپ، ءبىزدىڭ اۋرۋحانادا 1 اي بويى ءبىلىمىن شىڭدايدى. بىزدە كادر تاپشىلىعى ماسەلەسى جوق. سەبەبى اۋرۋحانا جانىندا «حنسە» ۋنيۆەرسيتەتى بار. وقۋ ورنى كاسىبي دەڭگەيى جوعارى دارىگەرلەردى دايىندايمىز. قازاقستان ەلىمەن ءوز تاجىريبەمىزبەن بولىسۋگە ءاردايىم دايىنبىز»، - دەدى «سيەۆەرانس» اۋرۋحاناسىنداعى كارديوۆاسكۋليارلى كلينيكانىڭ باس دارىگەرى كيەن چيەن يۋ.
زاماناۋي تەحنيكامەن جابدىقتالعان اۋرۋحانا مەديتسينا نارىعىندا 130 جىل بويى ىستەپ كەلەدى. جىل سايىن كلينيكا قىزمەتكەرلەرى 3 ميلليون ادامعا ەم كورسەتىپ، 80 مىڭعا جۋىق ءتۇرلى وپەراتسيا جۇرگىزەدى. وڭتۇستىك كورەيانىڭ ۇزدىك 4 اۋرۋحاناسىنا كىرەتىن «سيەۆەرانسقا» جاپونيا، قىتاي، رەسەي، ەۋروپا ەلدەرىنىڭ ازاماتتارى كەلىپ ەمدەلەدى. سوڭعى ۋاقىتتا قازاقستاندىقتار دا وسى كلينيكاعا باسىمدىق بەرىپ جاتىر. تەك وتكەن جىلدىڭ ىشىندە 4 مىڭ وتانداسىمىز ءوز دەنساۋلىعىن وسى ماماندارعا سەنىپ تاپسىردى. ولاردىڭ 10-ى ومار سيتەربايەۆ سىندى جۇرەك اۋرۋلارىن ەمدەپ شىقتى.
