رەسەيدەن كەلىپ قازاقشا كىتاپ وقۋدا
ءيا، قازىرگى كۇندە ءتۇرلى سەبەپتەرمەن بۇل ۇلت وكىلدەرىنىڭ پايىزدىق كورسەتكىشتەرى تومەندەگەنى شىندىق. دەگەنمەن، قازاق بولىپ كەتكەن باسقا ۇلتتىڭ وكىلدەرى باقۋاتتى ءومىر سۇرۋدە. سونىڭ ءبىرى - ۆالەنتينا ۋۆاروۆا اپامىز.
قازاقشا سويلەپ كەتكەندە شۇلدىرلەپ سويلەيتىن شالا قازاقتاردى ورتا جولدا قالدىراتىن اپامىزدى اۋىل تىك تۇرىپ قۇرمەتتەيدى دەسەك، ارتىق ەمەس. ءتىپتى، اپامىز اۋىلدا اتا- اناسىنان ايىرىلعان قازاق بالالارىنا وكىل انا بولىپ، ولاردى ەر جەتكىزگەنىن دە بىلەمىز. سول بالالار بۇگىندە ءبىر- ءبىر شاڭىراق يەلەرى. ۆاليا اپامىزدىڭ 80 جاستىق تويىنىڭ بەل ورتاسىندا ءجۇردى. مىنە، بۇل باۋىرمالدىق، ۇلى دوستىق دەۋگە بولادى.
ەندىگى ايتپاعىمىز، اپامىزدىڭ ۇل- قىزدارى سوناۋ رەسەيدىڭ ورتالىقتارىندا تۇرىپ جاتىر. ءبىراق ولار جىل سايىن وزدەرىنىڭ كىندىك قانى تامعان جەرگە كەلىپ، ءبىر اۋناپ كەتەدى. تەك وزدەرى عانا كەلىپ قويمايدى، بالالارىن دا ەرتىپ كەلەدى. سونىڭ ايعاعىنداي، جاقىندا ۆاليا اپانىڭ يۆانوۆو قالاسىنان قىزى نادەجدا، تۇمەن قالاسىنان كەلىنى ەلەنا ۇل- قىزدارىمەن كەلىپ، ۇلكەن شاڭىراقتى قۋانتىپ تاستادى.
ال ولار شاڭىراقتا عانا بولىپ قويماي، رۋحاني ورتالىق - كىتاپحاناعا كەلۋدى دە جىل سايىن داستۇرگە اينالدىرۋدا. كىتاپحانانىڭ بالالار بولىمىنە كەلىپ، بۇلدىرشىندەرى ۆيكتوريا مەن دەنيسكە قازاق تىلىندەگى كىتاپتاردى وقىتىپ، تانىستىردى.
«مىنا ءۇشىنشى سىنىپقا كوشكەن قىزىم ۆيكتوريا مەن اعامنىڭ ۇلى دەنيسكە جانە جەڭگەم ەلەناعا ءبىزدىڭ كىندىك قانىمىز تامعان تۋعان جەردى تانىستىرۋدى كوزدەسەم، ەكىنشى جاعىنان، قازاق دەگەن دارحان دا كەڭپەيىل حالىقتىڭ باي ءتىلىن، ادەت- عۇرپىن بىلگىزۋ تاعى ءبىر ماقساتىم. ويتكەنى، جولداسىم دا قازتالوۆ اۋىلىندا تۋىپ- وسكەندىكتەن، ەكەۋمىز قازاق ءتىلىن جاقسى بىلسەك تە، بالالارىمىز بۇدان بەيحابار عوي.
كەلگەننەن بەرى ەلەنا، دەنيس، ۆيكتوريا دا قازاقتىڭ كەيبىر سوزدەرىن ۇيرەنىپ قالدى. ال ۇيدە انامىز ۆاليا قوناققا كەلگەن نەمەرە- جيەندەرىنە قازاقشا سوزدەر ايتىپ قالا بەرەدى. ۇيرەنىپ قالعان داعدى عوي» دەپ نادەجدا ءبىر كۇلىپ قويدى.
كىتاپحانادا دەنيس پەن ۆيكتوريا بار ىنتالارىمەن كىتاپحاناشى اپالارىنان قازاق تىلىندەگى كىتاپتاردى الىپ، مازمۇنىن قىزىعا سۇراپ جاتقانىن بايقادىق.
وسىنداي كورىنىستى كورگەندە دوستىقتىڭ ءتىنى جالعاسا بەرەتىنىنە كوزىمىز جەتتى.
اسەم بولات باتىس قازاقستان وبلىسى،
قازتالوۆ اۋدانى
«ەگەمەن قازاقستان»
