ىدىس تۋىنداتقان ۇرىس

استانا. قازاقپارات - زامان وزگەردى مە، الدە ادامنىڭ وزگەرگەنى مە، «قۇدا، قۇدا دەگىزگەن، قۇيرىق- باۋىر جەگىزگەن» دەپ ءبىر- ءبىرىن قۇدايىنداي سىيلايتىن وتباسىلاردىڭ اراسىندا دا داۋ- جانجال بولىپ تۇرادى.

ماحامبەت اۋدانىندا تۇراتىن قۇدالاردىڭ ءبىرى ءوز ارالارىنداعى ۇرىس-كەرىستى شەشۋ ءۇشىن سوتقا جۇگىنىپتى. قۇدالاردىڭ سىيلاستىعىنا سىنا تۇسۋىنە تومەندەگى جايت سەبەپ بولعان.

ءبىر-ءبىرىن ۇناتقان ەكى جاس وتاۋ قۇرىپ، زاڭدى نەكەگە تىركەلمەسە دە اتا-انالارى قۇدالاسىپتى. الايدا، ەنە مەن كەلىن اراسىندا داۋ تۋىنداپ، جاس جۇبايلار اجىراسىپ تىنعان. كوڭىلى ابدەن قالعان بولۋى كەرەك، ارادا ءبىراز ۋاقىت وتكەن سوڭ كەلىننىڭ اناسى قۇداعيىنان قىز جاساۋىن قايتارۋدى وتىنەدى. جىگىتتىڭ شەشەسى كەلىننىڭ جاساۋىنا بەرىلگەن زاتتاردى تۇگەلگە جۋىق قايتارعانمەن، تەك ەكى دانا حروم مەن شىنىدان جاسالعان ىدىستى بەرمەي قويعان.

كەرى قايتارىلماعان قوس ىدىس قۇداعيلار اراسىنداعى وكپە-رەنىشتى ودان سايىن ۇدەتىپ، اعايىن-تۋعانىنىڭ اراسىنا كەڭ جايىلعان داۋ سوتقا دەيىن جەتتى. سوت بارىسىندا داۋ-جانجالدىڭ تۋىنداۋىنا سەبەپ بولعان قوس ىدىستىڭ قۇنى 24000 تەڭگەنى قۇرايتىنى انىقتالدى. زاڭدى نەكەدە تۇرماسا دا ۇلىنا از ۋاقىت جار بولعان كەلىنىنىڭ قوس ىدىسىن بەرمەي كەرگىگەن قۇداعي سوتقا شاقىرتۋ العاندا جۇمسارىپ سالا بەردى. ءسويتىپ، جىگىتتىڭ اناسى قۇداعيىنىڭ قوس ىدىسىن ىڭ-شىڭسىز قايتاردى. قۇداعيلاردىڭ مەدياتسيالىق تارتىپپەن(تاتۋلاسۋ تارتىبىنە بايلانىستى) كەلىسىمگە كەلۋىنە بايلانىستى ءىس وندىرىستەن قىسقارتىلدى.

جولداسبەك شوپەعۇل،

«ەگەمەن قازاقستان»

اتىراۋ